Սեպտեմբեր ամսվա կենսաթոշակների և նպաստների վճարման գործընթացը կավարտվի առաջիկա օրերին. Աշխատանքի եւ սոցիալական հարցերի նախարարության

Արմինֆո. 2021 թվականի սեպտեմբեր ամսվա կենսաթոշակների եւ երեխայի խնամքի նպաստների վճարման գործընթացը կավարտվի առաջիկա օրերին, ֆեյսբուքյան իր էջում հաղորդել է Աշխատանքի եւ սոցիալական հարցերի նախարարության մամուլի քարտուղար Զառա Մանուչարյանը:

Նախօրեին "Հայփոստ" ՓԲԸ-ն հաղորդել էր, որ սեպտեմբերի 9-ին, ժամը 16:00-ից ժամանակավորապես չեն վճարվում կենսաթոշակներն ու մինչև 2 տարեկան երեխայի խնամքի համար կանխիկ նպաստները, քանի որ բավարար դրամական միջոցներ չեն ստացվել Աշխատանքի և սոցիալական հարցերի նախարարության միասնական սոցիալական ծառայությունից:

Աշխատանքի եւ սոցիալական հարցերի նախարարության ներկայացուցչի հավաստմամբ, պետական կենսաթոշակների եւ մինչեւ երկու տարեկան երեխայի խնամքի  նպաստների վճարման համար "Հայփոստը" եւ բանկերը սեպտեմբերին ստացել են վճարման ենթակա գումարի 97 տոկոսի չափով ֆինանսավորում:

Մանուչարյանը հավաստիացրել է, որ վճարման գործընթացը կավարտվի առաջիկա օրերին: