Դիվանագետ. Սյունիքում ադրբեջանական փոքր չարաճճիությունները Մոսկվայի համար խոչընդոտ չեն

Արմինֆո. Ռուսաստանը սեփական ձեռքով բացեց Հարավային Կովկասի դարպասները Թուրքիայի առջև։ Ավելին, անցած տարվա պատերազմի արդյունքում Արցախում պայմաններ ապահովեցին մեր տարածաշրջանում թուրքական ընդարձակ ռազմական ներկայության համար։ ԱրմԻնֆո-ին այդպիսի կարծիք է հայտնել Արցախի Հանրապետության արտաքին գործերի նախկին նախարար, արտակարգ և լիազոր դեսպան Արման Մելիքյանը։

"Այս լույսի ներքո՝ ոչ մի հիմք չկա Հայաստանում շրջանառվող այն կարծիքի ձևավորման համար, ըստ որի, Ռուսաստանին կարող են ինչ-որ կերպ վնասելՀայաստանի Սյունիքի մարզում ադրբեջանական, այսպես ասենք,  փոքրիկ չարաճճիությունները։ Հայաստանն Իրանի հետ կապող միջպետական ավտոմայրուղու Գորիս-Կապան հատվածի արգելափակումը, մի քանի այլ ոչ բարեկամական գործողությունները, ադրբեջանական ղեկավարության գործողություններն ու հայտարարությունները ես գնահատում եմ բացառապես Հայաստանի դեմ ուղղված", - ընդգծել է նա։

Դիվանագետն ընդգծել է, որ նման իրողությունների ֆոնին՝ Բաքվի գործողությունները որպես նաեւ Մոսկվայի դեմ ուղղված ներկայացնելու Հայաստանի ղեկավարության ձգտումը սեփական պասիվությունը բացատրելու և սեփական անգործությունն Արցախից ռուսական խաղաղապահ զորակազմի դուրս բերումը կանխելու մտադրությամբ արդարացնելու ցանկություն է: Վերջինս, ի թիվս այլ բաների, ըստ նրա, պայմանավորված է Հայաստանի ղեկավարության կողմից հստակ և ընթացիկ իրողություններին համապատասխան վերլուծության բացակայությամբ։ Մելիքյանը համոզված է, որ հենց դա է խանգարում Հայաստանի ղեկավարությանը իրավիճակին համապատասխան պատասխան գործողություններ ձեռնարկել:

Մինչդեռ, հաշվի առնելով հանգամանքը, որ հենց ՌԴ խաղաղապահներն են հանդիսանում նույն Արցախում խաղաղության և կայունության պահպանման երաշխավորը, հենց նրանց առաջին պարտականությունն է, ըստ դիվանագետի, կանխել ադրբեջանցի զինվորականների ցանկացած ագրեսիվ գործողություն: Եվ, իհարկե, նման իրավիճակները պահանջում են Մոսկվայի համապատասխան, համաչափ դիվանագիտական պատասխան։

"Համոզված եմ, որ Մոսկվայում շատ լավ գիտեն, թե ինչպես պետք է լուծել նման հարցերը։ Եվ, այսպես թե այնպես, բայց Հայաստանի քաղաքացիների աչքերում ներկա իրավիճակն առանց կորուստների կարգավորելու համար հիմնական պատասխանատուն հենց Հայաստանի քաղաքական վերնախավն է։ Ժամանակն ինքնին ցույց տվեց այս կամ այն հարցի շուրջ հրապարակային մասնագիտական խորհրդատվությունների լիակատար անիմաստ լինելը։ Լուրջ խնդիրներ են պահանջում լուրջ վերաբերմունք, համապատասխանաբար, լուրջ աշխատանք, որը պետք է գիտակցվի և պահանջված լինի երկրի համար պատասխանատու ղեկավարության կողմից", - ամփոփել է դիվանագետը։