Արմինֆո. Հայաստանի տարածքային ամբողջականության կորստի, Ադրբեջանի կողմից հանրապետության տարածքի զգալի մասի օկուպացման հեռանկարը շատ քիչ հավանական է թվում։ ԱրմԻնֆո-ին այդպիսի կարծիք է հայտնել ԱՊՀ երկրների ինստիտուտի եվրասիական ինտեգրման և ՀՇԿ զարգացման բաժնի վարիչ, ռազմական փորձագետ Վլադիմիր Եվսեևը։
"Հասկանալի է, որ Ռուսաստանը դա, պարզապես, թույլ չի տա։ Այո, Ռուսաստանը փաստացի չի միջամտել Արցախում 44-օրյա պատերազմին, քանի որ դա չէին նախատեսում մեր դաշնակցային պարտավորությունները։ Սակայն, Հայաստանի հանդեպ այդ պարտավորությունները կան, և Մոսկվան ամեն դեպքում դրանք կկատարի։ Այլ բան է, որ Ադրբեջանը կարող է փորձել որոշ խորությամբ ներթափանցել Հայաստանի տարածք։ Եվ ահա այստեղ շատ բան կորոշվի Հայաստանի զինված ուժերի մարտունակությունից, սեփական տարածքից ադրբեջանական ստորաբաժանումներին դուրս մղելու ունակությունից", - ընդգծել է նա։
Այս ամենում, փորձագետի գնահատմամբ, որոշակի դեր կարող է խաղալ Հայաստանի և Ադրբեջանի սահմանին ռուսական նոր ուղեկալների տեղակայումը։ Մեկնաբանելով Ադրբեջանի հետ սահմանին ՀԱՊԿ դիտորդներ տեղակայելու մասին Երեւանից հնչած առաջարկը՝ Եվսեեւն այն գնահատել է որպես "հում" եւ չմշակված: Նրա կարծիքով, նման ձեւաչափերի խնդիրը, որպես կանոն, հանգում է դիտորդների մոտ վերահսկողության տեխնիկական միջոցների բացակայության եւ միջադեպերի հետաքննության բուն մեխանիզմի անկատարության:
Մեկնաբանելով Հավաքական անվտանգության պայմանագրի կազմակերպության գլխավոր քարտուղար Ստանիսլավ Զասի այցը Հայաստան, Եվսեեւը նշել է, որ Ադրբեջանի հետ սահմանին բավականին տագնապալի իրավիճակի, բազմաթիվ այլ խնդիրների ֆոնին՝ այս այցը սպասելի էր: Այս համատեքստում փորձագետն ընդգծել է ՀԱՊԿ-ում առկա գործիքակազմի կիրառման և անվտանգության ապահովման ուղղությամբ Երևանի տարբեր առաջարկները քննարկելու անհրաժեշտությունը:
"Մենք Ձեր այցին սպասում էինք դեռ մայիս ամսին: Հայաստանի համար այդ պահին բավական լարված ժամանակահատված էր, բայց, ցավոք սրտի, Ձեր այցը տեղի չունեցավ: Այսօր մեր սահմաններին ձևավորվել է կայուն ծանր իրավիճակ: Մայիս ամսին ադրբեջանական զինված ուժերը, երկու ուղղությամբ, ներխուժեցին հայկական տարածք: Դա մեզ անչափ անհանգստացնում է: Մենք խաղաղության կողմնակից ենք: Մենք, որևէ պարագայում, չենք ուզում իրադրության լարում մեր սահմաններին: Միևնույն ժամանակ, մենք պատրաստ չենք համակերպվել գործողությունների հետ, որոնք կարող են հանգեցնել Հայաստանի պետական սահմանի խախտմանը: Մենք վճռականորեն պաշտպանելու ենք մեր տարածքները: Մենք, իհարկե, ձգտում ենք խաղաղ ճանապարհով լուծել այս խնդիրը՝ ի ցույց դնելով մեր խաղաղասիրությունը: Միևնույն ժանանակ, մեր համբերությունը նույնպես անսպառ չէ, և մեր սահմաններին ստեղծված իրադրության խաղաղ հանգուցալուծման բացակայության պարագայում մենք իրավունք ենք վերապահում խնդիրը լուծել ուժի կիրառմամբ", - ՀԱՊԿ գլխավոր քարտուղարի հետ հանդիպման ժամանակ հայտարարել է Հայաստանի պաշտպանության նախարար Արշակ Կարապետյանը:
Եվսեեւի գնահատմամբ, հաշվի առնելով Ռուսաստանի առանցքային դերը ՀԱՊԿ-ում, ինչպես նաեւ Մոսկվայի միջնորդությունը Երեւանի եւ Բաքվի միջեւ, սահմանին տիրող իրավիճակին ՀԱՊԿ-ի միջամտության հեռանկարը բավականին խնդրահարույց է թվում: Այս լույսի ներքո փորձագետը նաեւ նշել է, որ շատ հարցեր այս առումով լուծվում են ուղղակիորեն Մոսկվայի եւ Երեւանի միջեւ ռազմաքաղաքական հարաբերությունների շրջանակներում:
ՀԱՊԿ գլխավոր քարտուղարն աշխատանքային այցով Երեւան է ժամանել օգոստոսի 9-ին: Բացի Հայաստանի պաշտպանության նախարարից, Ստանիսլավ Զասը արդեն հանդիպել է Հայաստանի արտգործնախարարի պաշտոնակատար Արմեն Գրիգորյանի հետ: Օգոստոսի 10-ին սպասվում է նրա հանդիպումը ՀՀ վարչապետ Նիկոլ Փաշինյանի հետ: