Գերմանական Eurowings լոուքոսթերը օգոստոսի 6-ից ուղիղ չվերթներ է գործարկում Քյոլնի/Բոննի օդանավակայանից Երեւան

Արմինֆո. Գերմանական Eurowings բյուջետային ավիաընկերությունն առաջին անգամ չվերթեր կիրականացնի դեպի Հայաստան:

Օգոստոսի 6-ից Eurowings-ը կառաջարկի ուղիղ չվերթեր դեպի Հայաստան՝ իր ուղևորների համար առաջին անգամ հնարավորություն ստեղծելով Քյոլնից/Բոնից մեկնել Հայաստանի մայրաքաղաք Երևան: Յուրաքանչյուր ուրբաթ օր Airbus A320 օդանավը Հայաստան կմեկնի 14:20-ին և կժամանի 20:40-ին: Հետադարձ թռիչքը կիրականացվի նույն օրը՝ ժամը 21:30-ին, և Քյոլնի/Բոնի օդանավակայանում վայրէջք կկատարի ժամը 00:20-ին: Թռիչքի բոլոր ժամերը ներկայացված են տեղական ժամանակով:

«Արմենիա» միջազգային օդանավակայաններ» ՓԲ ընկերության տնօրեն Մարսելո Վենդեն նշել է. «Ուրախ ենք, որ Eurowings-ը մուտք է գործում հայկական շուկա: Շնորհավորում ենք ավիաընկերությանը և մաղթում հաջող գործունեություն ու անվտանգ թռիչքներ: Այսուհետ դեպի Եվրոպա ուղիղ մեկնելու հնարավորություններն ավելի կմեծանան»:

«Մեզ համար Eurowings-ում մեծ հաճույք է առաջին անգամ սպասարկել հայաստանյան շուկան և առաջարկել կանոնավոր թռիչքներ Երևանի «Զվարթնոց» միջազգային օդանավակայանից դեպի Քյոլն: Austrian Airlines-ի, Brussels Airlines-ի, հաջորդ ուրբաթ օրվանից Lufthansa-ի և արդեն Eurowings-ի հետ միասին, որն առաջատար եվրոպական low-cost ավիափոխադրողներից է, մենք ուրախ ենք մեծացնել մեր` Lufthansa խմբի ներկայությունը Երևանում և, հետևաբար, ավելի շատ հնարավորություններ առաջարկել Հայաստանից ճանապարհորդների համար»,- նշել է Lufthansa խմբի Ուկրաինայի, Բելառուսի, Թուրքմենստանի և Հարավային Կովկասի վաճառքի գծով գլխավոր մենեջեր Ռենե Կոինչակը:

Չվերթեր կարելի է ամրագրել eurowings.com կայքի, հավելվածի կամ տուրիստական գործակալությունների միջոցով:

Eurowings GmbH գերմանական բյուջետային ավիաընկերությունը, որը տեղակայված է Դյուսելդորֆում, Lufthansa Group ավիացիոն հոլդինգի դուստր ստորաբաժանումներից մեկն է: Մինչեւ 2014 թվականի հոկտեմբերն իրականացնում էր ներքին տարածաշրջանային եւ եվրոպական որոշ չվերթներ Lufthansa Regional ապրանքանիշի ներքո, ինչից հետո սկսել է աշխատել Germanwings-ի անունից:

Deutsche Lufthansa AG (FWB: LHA), առավել հայտնի է որպես Lufthansa (Lufthansa), Գերմանիայի առաջատար ավիափոխադրողն է, Եվրոպայի խոշորագույն ավիակոնցեռնը, որն իր մեջ ներառում է նաեւ այնպիսի խոշոր ավիաընկերություններ, ինչպիսիք են Swiss International Airlines -ը եւ Austrian Airlines-ը: Այսպես, Austrian Airlines-ը Վիեննայից Երևան չվերթներ է իրականացնում վերջին 20 տարիների ընթացքում, Բրյուսելյան ավիաուղիները (Brussels Airlines) առաջարկում են շաբաթական 5 չվերթ Բրյուսելից Երևան ։ Lufthansa-ն նաեւ աշխարհի ամենահին եւ խոշորագույն Star Alliance ավիացիոն դաշինքի համահիմնադիրն է, որը ստեղծվել է 1997 թվականին:

Հուլիսի 15-ին տեղեկացվել էր, որ Lufthansa ավիաընկերությունը երկարատև բանակցությունների արդյունքում որոշում է կայացրել ս. թ. օգոստոսի 13 - ից մուտք գործել հայկական շուկա ՝ շաբաթական 3 անգամ պարբերականությամբ թռիչքներ իրականացնել Ֆրանկֆուրտ - Երևան-Ֆրանկֆուրտ ուղղությամբ: Մասնավորապես, Ֆրանկֆուրտից Երևան չվերթները հասանելի կլինեն երեքշաբթի, հինգշաբթի և կիրակի օրերին, իսկ Երևանից Ֆրանկֆուրտ ՝ երկուշաբթի, չորեքշաբթի և ուրբաթ օրերին։