Արմինֆո. Տնտեսական ոլորտում մեր նպատակը ոչ այնքան առևտուրն է, որքան ներդրումները Հայաստանում։ Այդ մասին հայտարարել է Հայաստանում Ֆրանսիայի դեսպան Ժոնաթան Լաքոտը՝ անդրադառնալով հայ-ֆրանսիական առեւտրատնտեսական հարաբերությունների զարգացման հեռանկարներին։
Այդ տեսանկյունից նա ուշադրություն է հրավիրել այն հանգամանքին, որ հենց ներդրումներն են ստեղծում ավելացված արժեք, դրանք աշխատատեղեր են ստեղծում Հայաստանում։ Դիվանագետի խոսքով ՝ այդ տեսանկյունից Ֆրանսիան Ռուսաստանից հետո երկրորդ տեղն է զբաղեցնում Հայաստանում:
"Ուրախ եմ, որ Հայաստանում ներկա ֆրանսիական ընկերությունների մեծ մասը շատ լավ դիմակայեցին 2020 թվականի տարբեր ճգնաժամերը։ Այս տարվա սկզբին Ֆրանսիան հայտարարեց Հայաստանին ֆինանսական բացառիկ օժանդակություն տրամադրելու իր պատրաստակամության մասին։ Սա մի օժանդակություն է, որը թույլ կտա Հայաստանում կատարել ֆրանսիական նոր ներդրումներ, հաստատել ֆրանսիական նոր ընկերություններ։ Ընդհանուր առմամբ, ցանկանում ենք, որ մեր տնտեսական ներկայությունը ոչ միայն առաջընթաց գրանցի, այլև որակական առումով թռիչք կատարի։ Օրինակ՝ որպեսզի Ֆրանսիան ներկա լինի էներգետիկ ոլորտում։ Ենթակառուցվածքների ոլորտում, մասնավորապես՝ երկաթուղային ոլորտում", - նշել է Լաքոտը։
Ընդ որում, նա պարզաբանել է, որ ֆինանսական օգնության գումարը կախված կլինի այն ծրագրերից, որոնք կներկայացնի հայկական կողմը: "Որպեսզի գաղափար ունենանք, թե ինչի մասին է խոսքը, կարող եմ ասել, որ բյուջետային օժանդակության մասով պատրաստ ենք տրամադրել 50-ից 100 միլիոն եվրոյի չափով փոխառություն։ Բյուջետային այս օժանդակությանը կարող են գումարվել առանձին օժանդակություններ՝ հատուկ ծրագրերի համար։ Ինչ վերաբերում է երկաթուղային ոլորտին, մտածում ենք, մասնավորապես, մի ծրագրի մասին, որով գնացքով կկապվեն Երևանը, «Զվարթնոց» օդանավակայանը, Էջմիածինն ու Արմավիրը։ Եվ, իհարկե, մենք պատրաստ ենք նաև դիտարկել տարածաշրջանային երկաթուղային ծրագրեր", - ասել է նա։
Միեւնույն ժամանակ, անդրադառնալով Եվրամիության կողմից Հայաստանին 2,6 մլրդ եվրոյի չափով ֆինանսական օգնությանը, դիվանագետը նշել է. "Իսկապես, Շարլ Միշելի այցով և 2.6 միլիարդ եվրո այս բացառիկ աջակցության մասին հայտարարությամբ նշանավորում է տարածաշրջանում և Հայաստանում Եվրոպայի նոր հանձնառությունը։ Ֆրանսիայի մասնակցությունը եվրոպական այդ օժանդակության մեջ կազմում է 18 տոկոս։ Մենք լիովին կողմնակից ենք, որ Հայաստանը դրանից օգտվի։ Եվ սա մի օժանդակություն է, որն իսկապես միտված է ուժեղացնելու Հայաստանի կարողությունները բոլոր ոլորտներում։ Խոսքը ենթակառուցվածքների մասին է, բայց, ընդհանուր առմամբ, կա նաև Հայաստանում ժողովրդավարության և օրենքի գերակայության ուժեղացմանն ուղված օժանդակություն։ Եվրոպական այս օժանդակությունը Հայաստանի ապագայի հանդեպ վստահության արտահայտումն է։ Կարծում եմ՝ Ֆրանսիան կսատարի Եվրոպայի այս հանձնառությունը։ Այն կնպաստի նաև Հայաստանի և Եվրամիության անդամ պետությունների միջև երկկողմ հարաբերությունների զարգացմանը",- ասել է Լաքոտը "Ազատություն" ռադիոկայանի հայկական ծառայությանը տված հարցազրույցում։
Նշենք, որ ԵՄ երկրների հետ Հայաստանի առեւտրաշրջանառությունը 2021թ. հունվար-մայիս ամիսներին հասել է 16,6% աճի (նախորդ տարվա 19,8% անկումից) 'կազմելով 573,2 մլն դոլար: ԵՄ երկրների հետ Հայաստանի առեւտրի բացասական սալդոն կազմել է 125 մլն դոլար' տարեկան 4,1% անկումով (2020թ. նույն ժամանակահատվածում 18,5% անկման դիմաց): Դա պայմանավորված էր արտահանման եւ ներմուծման տարեկան դինամիկայի բարելավմամբ ՝ 20,2-19,5 տոկոս անկումից մինչեւ 24-12,2 տոկոս աճ, որոնց բացարձակ մեծությունը հունվար-մայիսին կազմել է, համապատասխանաբար, 224.1 մլն դոլար եւ 349.1 մլն դոլար ։ ՀՀ վիճակագրական կոմիտեի վերջնական տվյալների համաձայն, արդյունքում ԵՄ երկրների հետ Հայաստանի առևտրաշրջանառության մասնաբաժինը արտաքին առևտրի ընդհանուր կառուցվածքում տարեկան կտրվածքո աճել է 19,2% - ից մինչև 20%:
ԵՄ երկրների հետ Հայաստանի արտաքին առեւտրի կառուցվածքում ամենամեծ մասնաբաժինը պատկանւոմ է Գերմանիային՝ 19,9 տոկոս կամ 114,3 մլն դոլար (տարեկան դինամիկայի բարելավմամբ ՝ 30,7 տոկոս անկումից մինչեւ 25 տոկոս աճ): Ֆրանսիան գտնվում է 5-րդ հորիզոնականում՝ 7% կամ 39.9 մլն դոլար (տարեկան թրենդի 2,1% անկումից մինչեւ 7,1% աճ շրջադարձով): Հայկական ապրանքների արտահանումը Ֆրանսիա աճել է 2,9 անգամ ՝ մինչեւ 3.5 մլն դոլար, Ֆրանսիայից ապրանքների ներմուծման 1 տոկոսով, մինչեւ 36.3 մլն դոլար աճի դեպքում, մինչդեռ, մեկ տարի առաջ հակառակ պատկերն էր դիտվել. արտահանման 74,8 տոկոսով պատկառելի անկումն ուղեկցվել է ներմուծման 8,9 տոկոս աճով: Հայկական ապրանքների ՝ ԵՄ երկրներ արտահանման ծավալով Ֆրանսիան 8-րդ հորիզոնականում է ։ Ֆրանսիան ԵՄ երկրների շարքում, Իտալիայից եւ Գերմանիայից հետո ներմուծման ծավալով առաջատար եռյակում է: