Կանխատեսում. Աշխարհաքաղաքական թեքումով իր ռազմատենչության արդյունքում Ալիեւը կարող է ստանալ ճիշտ հակառակ արդյունք  

Արմինֆո.Սպիտակ տուն դեմոկրատների վերադարձից հետո ձեռք բերելով ամուր, ուժային թիկունք՝ Եվրամիությունը, հատկապես վերջին շրջանում, էապես ակտիվացրել է ջանքերը Հարավային Կովկաս իր "վերադարձի" ուղղությամբ։ ԱրմԻնֆո-ին այդպիսի կարծիք է հայտնել "Ազատ քաղաքացի "հասարակական կազմակերպության ղեկավար Հովսեփ Խուրշուդյանը։

"Այդ մասին է վկայում ինչպես խոստացված աննախադեպ ֆինանսական աջակցությունը, այդ թվում՝ Հայաստանին, այնպես էլ եվրոպացի դիվանագետների  Հայաստան այցերի թիվը։ Եվ, իհարկե, Ֆրանսիայի նախագահ Մակրոնի սպասվող այցը։ Մասնավորապես, կարեւոր եմ համարում նշել ԵՄ հետաքրքրությունը տարածաշրջանային հաղորդակցությունների, ընդհանուր առմամբ, նաեւ Հյուսիս-Հարավ ավտոմայրուղու կառուցման նախագծի նկատմամբ: Մենք գիտենք, որ ԵՄ-ը արդեն պատրաստակամություն է հայտնել այդ նախագծում ներդնել 600 մլն եվրո։ Հայտնի է նաև, որ նման ներդրումները միշտ պաշտպանվում են", - ընդգծել է նա։

Այս ֆոնին, փորձագետի կանխատեսմամբ, շատ շուտով Մինսկի խումբը Ռուսաստանի առջև հարց կդնի անցյալ տարվա նոյեմբերի 9-ի և ընթացիկ տարվա հունվարի 11-ի եռակողմ հայտարարությունների շրջանակում ստանձնած պարտավորությունների կատարման ժամկետների մասին։ Հայաստանի, Ադրբեջանի եւ Թուրքիայի մասնակցությամբ ողջ տարածաշրջանում հաղորդակցությունների ապաշրջափակման գծով պարտավորությունների իրագործմանը: Եվ, իհարկե, Արցախում բազմաթիվ մարդասիրական խնդիրների լուծման գծով Մոսկվայի չկատարած պարտավորությունները։ Դրանցից մեկը հայ փախստականների վերադարձն է Շուշի և Հադրութ, ինչպես նաև բոլոր գերիների վերադարձը՝ առանց բացառության։

"Պուտինը կանգնեցրեց պատերազմը, դա փաստ է։ Նա իր զորքերն Արցախ մտցրեց, դա նույնպես փաստ է։ Բայց ահա հաղորդակցությունների ապաշրջափակման, գերիների ու փախստականների վերադարձի մասով իր մյուս պարտավորությունները նա չի կատարել։ Մինչդեռ, ռուս խաղաղապահների հայտնվելը ուղեկցվում էր մարտական գործողությունների դադարեցման մյուս բոլոր պայմանները կատարելու հստակ պարտավորություններով ։ Եվ, շատ լավ հասկանալով, որ Ալիևը երբեք չի համաձայնի հայ բնակիչների վերադարձին իրենց տները Շուշիում և Հադրութում, Պուտինն այսօր շտապում է Արևմուտքին ցույց տալ առաջընթաց հաղորդակցությունների ապաշրջափակման գործընթացում։ Ինչում, իհարկե, շահագրգռված է նաեւ ինքը՝ Ռուսաստանը", - նկատել է Խուրշուդյանը։

Սակայն Ալիևը, որպես հաղորդակցությունների ապաշրջափակման անքակտելի մաս, ըստ փորձագետի, այսօր Պուտինից պահանջում է կատարել, ըստ ամենայնի, ժամանակին իր տված խոստումն՝ Ադրբեջանին Սյունիքի մարզի տարածքով դեպի Նախիջևան միջանցք տրամադրելու վերաբերյալ։ Ինչին չի համաձայնում Փաշինյանը։ Որպես արդյունք, չստանալով խոստացածը, Ալիևը, Խուրշուդյանի գնահատմամբ, հիմա արդեն Երասխի ուղղությամբ է սրում իրավիճակը, ցույց տալով այն տարածքն անկայունության գոտու վերածելու սեփական հնարավորությունները, որով, ըստ էության, պետք է անցներ ապաշրջափակված հաղորդակցությունների կարևորագույն մասը։

"Սակայն, աշխարհաքաղաքական թեքումով իր ռազմատենչության արդյունքում՝ Ալիևը կարող է ստանալ ակնկալածի ճիշտ հակառակ արդյունք՝ սահմանին միջազգային դիտորդների տեղակայման և հայ-ադրբեջանական սահմանին սահմանազատման և սահմանագծման գործընթացին նրանց մասնակցության տեսքով։ Դա, անկասկած, մեր շահերից է բխում, և նման մասնակցության պատրաստակամություն արդեն Երևանում հնչեցրել է Եվրախորհրդի նախագահ Շառլ Միշելը։ Այս լույսի ներքո՝ ներկայիս աշխարհաքաղաքական իրավիճակը  պարունակում է ինչպես Հայաստանի համար մարտահրավերներ ու սպառնալիքներ, այնպես էլ՝ հնարավորություններ: Եվ այս ամենը պայմանավորված և հիմնավորված է հետաքրքրությամբ, որը, ի վերջո, սկսեց դրսեւորել Երևանն Արևմուտքի նկատմամբ", - ամփոփել է Խուրշուդյանը։