Կանխատեսում. Եվրոպական ակտիվացումը հատուկ փոփոխությունների չի մտցնի հետպատերազմյան իրողություններում  

Արմինֆո.Եվրախորհրդի նախագահ Շառլ Միշելի այցը եւ նպատակները պետք է դիտարկել "Արեւելյան գործընկերության" ծրագրի մասնակից մյուս երկրների ղեկավարության հետ նրա հանդիպումների նպատակների շարքում: ԱրմԻնֆո-ին այդպիսի կարծիք է հայտնել "Ռուսաստանը գլոբալ քաղաքականությունում" ամսագրի գլխավոր խմբագիր, "Վալդայ" բանավիճային ակումբի գիտական տնօրեն Ֆյոդոր Լուկյանովը։

"Խոսքը Հայաստանի, Վրաստանի, Ադրբեջանի, Ուկրաինայի եւ Մոլդովայի ղեկավարության հետ հանդիպումների մասին է։ ԵՄ-ն այսօր փորձում է ակտիվացնել "Արևելյան գործընկերությունը" և այդ ամենի մեջ մեծ դեր են խաղում ինչպես Ղարաբաղում 44-օրյա պատերազմի արդյունքները, այնպես էլ Բելառուսի դիրքորոշումը ՝ հօգուտ այդ ծրագրից դուրս գալու։ Այս բոլոր իրողությունները թուլացնում են, ընդհանուր առմամբ, ԱԳ-ի իրականացումը, եւ Բրյուսելը միանգամայն սպասելի կերպով ձգտում է վերջնականապես չկորցնել ազդեցության լծակները", - ընդգծել է նա։

Հուլիսի 16-17-ը Երեւանում Եվրոպական խորհրդի նախագահ Շառլ Միշելը Նիկոլ Փաշինյանի հետ համատեղ ճեպազրույցի ժամանակ հնչեցրել Է Եվրամիության "տարածաշրջանում ներգրավված լինելու" ցանկությունը: "ԵՄ-ն ցանկանում է Հայաստանի հավատարիմ և ակտիվ գործընկերը դառնալ նրա բարեկեցության, կայունության և անվտանգության ապահովման գործում։ Ես ձեզ շատ ուժեղ ուղերձ եմ հղում ՝ մենք ձեր կողքին ենք։ Ես վերահաստատում եմ, որ ԵՄ - ն մտադիր է տրամադրել 2.6 մլրդ եվրո աննախադեպ ֆինանսական փաթեթ՝ Հայաստանի առաջնահերթ խնդիրների լուծմանն աջակցելու նպատակով", - նշել Է Միշելը։

Վերլուծաբանի գնահատմամբ՝ շատ լավ տեսնելով և գիտակցելով այս բոլոր իրողությունները՝ ԵՄ-ն ԱԳ երկրներում նոր առաքելություն է նախաձեռնել այս ծրագրի ակտիվացման միջոցով ՝ նրանց քաղաքականության մեջ սեփական ներգրավվածությունը բարձրացնելու նպատակով ։ Եվ Հայաստանն այդ իմաստով,  ըստ նրա, բացառություն չէ։ Իսկ Եվրախորհրդի ղեկավարի այցը Երեւան, ըստ Լուկյանովի, այդ առաքելության անբաժան մասն է։

Նշելով, որ այս ամբողջ եվրոպական գործունեությունը ծավալվում է ռուսական ազդեցության գոտում, վերլուծաբանն ընդգծել է, որ, օրինակ, նույն Հայաստանի մասով Ռուսաստանը նույնպես բավականին ակտիվ ներգրավվածություն ունի։ Առաջին հերթին, հանրապետության անվտանգության ապահովման հարցերում, որոնցում Մոսկվայի նկատմամբ Երեւանը,  նախկինի պես, այլընտրանք չունի։ Լուկյանովը վերջին պնդումը հիմնավորել է՝ հիշեցնելով անցյալ տարի Ղարաբաղում պատերազմի օրերին հավաքական Արևմուտքի պասիվ կեցվածքի մասին՝ ի դեմս ԵԱՀԿ Մինսկի խմբի։

"Ամեն դեպքում, վերլուծելով ԵՄ ակտիվացման հնարավոր հեռանկարները, առաջին հերթին, անհրաժեշտ է ելնել իրողություններից։ Իսկ իրողությունը Ղարաբաղում ռուս խաղաղապահներ եւ Հայաստանում ռուս զինվորականների առկայությունն է։ Որոնց թիվը, ի դեպ, անընդհատ ավելանում է։ Այս լույսի ներքո, ես չեմ կարծում, թե ԵՄ-ի "Արեւելյան գործընկերության" ծրագրի ակտիվացումը եւ, նույնիսկ, ԱՄՆ - ի զուգահեռ ակտիվացումը հետխորհրդային տարածքում, ընդհանուր առմամբ, էական փոփոխություններ կմտցնի այդ իրողություններում", - ամփոփել է ռուս վերլուծաբանը:

Եվրամիությունը մտադիր է առաջիկա 5 տարում Հայաստանին տրամադրել ավելի քան 2,6 մլրդ եվրո՝ հինգ առանցքային ծրագրերի համար, այդ թվում ՝ Սյունիքի մարզի զարգացման համար: Փաստաթուղթը ներկայացվել եւ հաստատվել է հուլիսի 2-ին Բրյուսելում, դրանում նշված են այն նախաձեռնությունները, որոնք Եվրահանձնաժողովը մտադիր է իրականացնել մինչեւ 2025 թվականը "Արեւելյան գործընկերության" անդամ երկրներում