Արմինֆո.Հայ-ադրբեջանական սահմանին իրավիճակն այս պահին հանգիստ է, ՀՀ զինված ուժերն ամբողջովին տիրապետում է իրավիճակին։ Այդ մասին հաղորդել է ԶՈւ վարչակազմակերպչական վարչության տեղեկատվության բաժնի պետ, գնդապետ Սամվել Ասատրյանը։
Գնդապետի ասելով՝ հայ-ադրբեջանական սահմանի որոշ հատվածներում, հատկապես, նախիջևանյան ուղղությամբ, վերջին իրադարձություններով պայմանավորված, որոշ լրատվամիջոցներում նաև շրջանառվում են խուճապային նյութեր, որոնք կարող են բացասական ազդեցություն ունենալ ոչ միայն ազգաբնակչության վրա, այլև որոշակի խոչընդոտներ են ստեղծում ՀՀ ԶՈւ գործունեության համար։ «ՀՀ զինված ուժերն ամբողջ ծավալով և մեծ պատասխանատվությամբ կատարում է իր վրա դրված խնդիրները, պատրաստ է իրադարձության ցանկացած զարգացման և ակնկալում է հանրության լիարժեք վստահությունն ու աջակցությունը»,- ընդգծել է Սամվել Ասատրյանը՝ «Արմենպրեսի» հետ զրույցում:
Նշենք, որ անցած շաբաթվա վերջին Ադրբեջանի զինված ուժերը բազմիցս գնդակոծել են հայկական դիրքերը Նախիջևանի և Քարվաճառի ուղղությամբ։ Հակառակորդի կողմից Երասխի ուղղությամբ ձեռնարկած սադրանքներից մեկի հետևանքով զոհվել է ՀՀ ԶՈՒ պայմանագրային զինծառայող: