Վարհեի. Եվրամիությունը պատրաստ է օպերատիվ կերպով խոշոր ներդրումներ կատարել՝ Հայաստանի տնտեսության արագ վերականգնման նպատակով

Արմինֆո. Եվրամիությունը պատրաստ է օպերատիվ կերպով խոշոր ներդրումներ կատարել Հայաստանի տնտեսության արագ վերականգնման ուղղությամբ։ Այդ մասին հուլիսի 9-ին Երեւանում կայացած ճեպազրույցի ժամանակ հայտարարել է Եվրոպական հանձնաժողովի հարևանության և ընդլայնման հարցերով հանձնակատար Օլիվեր Վարհեին։

Ճեպազրույցի ընթացքում եվրոպացի պաշտոնյան հաղորդել Է, որ իր այցը Հայաստան պետք է կայանար ավելի վաղ, սակայն հետաձգվել է կորոնավիրուսի համավարակի պատճառով: Միաժամանակ հույս է հայտնել, որ աշխարհը կամաց-կամաց վերադառնում է կյանքի բնականոն հուն։

Վարհեին պատմել է, որ Հայաստան այցի շրջանակներում արդեն հասցրել է բանակցություններ վարել փոխվարչապետի պաշտոնակատար Մհեր Գրիգորյանի եւ ՀՀ վարչապետի պաշտոնակատար Նիկոլ Փաշինյանի հետ, եղել է «Թումո»  կենտրոնում, այսօր նաեւ հանդիպումներ կունենա ՀՀ նախագահ Արմեն Սարգսյանի եւ Ամենայն Հայոց Կաթողիկոս Գարեգին Բ-ի հետ:

"Հիմա ես ավելի լավ եմ հասկանում, թե որ ոլորտներում կարող ենք զարգացնել համագործակցությունը։ Կցանկանայի մեկ անգամ ևս ընդգծել, որ Հայաստանը շարունակում է կարևոր գործընկեր մնալ ԵՄ համար, այդ թվում՝ բարեփոխումների իրականացման գործում: Ես բարձր եմ գնահատում Հայաստանի կառավարության հանձնառությունը շարունակելու բարեփոխումների օրակարգը, որոնք տեսանելի կլինեն ոչ միայն Եվրոպայում, այլև շոշափելի կլինեն ՀՀ քաղաքացիների համար", - ասել է նա։

Եվրահանձնակատարը նաեւ ողջունել է Հայաստանում ազատ եւ արդար ընտրությունների անցկացումը, ինչը իրենց գնահատականներում հաստատել են նաեւ ԵԱՀԿ/ԺՀՄԻԳ դիտորդները: Նրա համոզմամբ, շատ շուտով Հայաստանում կձեւավորվեն ուժեղ կառավարություն եւ խորհրդարանական մեծամասնություն, եւ շատ աշխատանք կա անելու։

"Ինչպես տեսնում եք, ԵՄ-ն աջակցում է Հայաստանի հետքովիդյան վերականգնմանը։ Անցյալ տարի մենք որպես օգնություն Հայաստանին ավելի քան 100 մլն եվրո ենք ուղարկել ճգնաժամի հաղթահարման եւ համավարակով պայմանավորված հրատապ մարտահրավերների լուծմանն աջակցելու համար", - ասել է նա,  հավելելով, որ այժմ աշխատանքներ են տարվում ՀՀ ողջ բնակչության պատվաստումն ապահովելու ուղղությամբ։

"Ոչ ոք անվտանգ չէ, քանի դեռ բոլորն անվտանգ չեն։ Ոչ ոք չի կարող ապահով լինել, քանի դեռ բոլորը չեն պատվաստվել: Հայաստանը ավելորդ ժամանակ չունի՝ այն դատարկ ծախսելու համար ։ Հայաստանի տնտեսությունը ևս ավելորդ ժամանակ չունի՝ այն դատարկ ծախսելու համար", - ասել է նա՝ ևս մեկ անգամ ընդգծելով ՀՀ բնակչության շուտափույթ և ամբողջական պատվաստման անհրաժեշտությունը։

Վարհեին նաեւ անդրադարձել է ղարաբաղյան հակամարտության գոտում անցած տարվա իրադարձություններին եւ նշել, որ վշտացած է եղել ղարաբաղյան հակամարտության ընթացքում զոհվածների առնչությամբ: Նրա խոսքով ՝ այդ կապակցությամբ Եվրամիությունը մոբիլիզացրել է 9-10 մլն եվրո մարդասիրական օգնություն, եւ շուտով այն կտրամադրվի հակամարտությունից տուժածներին:

"Պատրաստ եմ շատ ակտիվ դեր խաղալ հետկոնֆլիկտային շրջանում, միջոցառումներ իրականացնել վստահության միջոցների ամրապնդման, ճգնաժամի հաղթահարման ուղղությամբ եւ հետագայում, որպես հիմնական գործընկեր, տնտեսական աջակցություն տրամադրել հակամարտությունից տուժած տարածաշրջաններին եւ հարակից շրջաններին", - ասել է եվրահանձնակատարը:

Դրա հետ մեկտեղ՝ նա արձանագրել է, որ Երեւան իր այցի հիմնական նպատակը նոր ներդրումային փաթեթի ներկայացումն է։ "Ես ինձ հետ բերել եմ ներդրումային նախագիծ՝ որպես նվեր հետպատերազմյան ճգնաժամի հաղթահարման համար։ Մենք պատրաստ ենք օպերատիվ կերպով խոշոր ներդրումներ կատարել Հայաստանի տնտեսության արագ վերականգնման ուղղությամբ ՝ Արեւելյան գործընկերության ողջ տարածաշրջանի հետ միասին։ Մենք այդ նախագծերի վրա աշխատել ենք ՀՀ կառավարության հետ միասին։ Ըստ այդ նախագծի՝ բավական սեղմ ժամկետներում պետք է ապահովվի տնտեսական աճ, և ստեղծվեն նոր աշխատատեղեր, քանի որ հայ ժողովուրդը հենց դրա կարիքն ունի քովիդի ճգնաժամից հետո։ Բայց երբ մենք մշակում էինք այս նախագիծը,  նաեւ հաշվի ենք առել այն մարտահրավերները եւ խոչընդոտները, որոնք եղել են երկրում մինչեւ համավարակի ճգնաժամը: Այդ պատճառով մենք ցանկանում ենք շուտափույթ թվայնացում, անցում կանաչ տնտեսության, եւ, ամենակարեւորը, մենք ցանկանում ենք ստեղծել առեւտրային ուղիներ եւ կապեր եվրոպական շուկաների եւ տնտեսության հետ, ինչի շնորհիվ մենք կկարողանանք ավելի կարճ ժամանակում այս տարածաշրջանը մոտեցնել Եվրոպային", - ասել է Վարհեին։

Եվրահանձնակատարը նաեւ տեղեկացրել է, որ այսօր սեղանի վրա է  2,3 մլրդ եվրոյի դրամաշնորհային փաթեթ ողջ տարածաշրջանի համար եւ որով կարելի է ներգրավել առնվազն 17 մլրդ եվրոյի ներդրումներ ողջ տարածաշրջանի համար:

Նա հիշեցրել է, որ Հայաստանի համար ԵՄ-ն առաջարկում է 5 գերակա ոլորտներ, որտեղ ներդրումներ կկատարվեն, որոնց միջոցով հնարավոր կլինի էապես փոխել իրականությունը տեղերում ՝ ապահովել նոր աշխատատեղեր եւ տնտեսական մեծ դիմադրողականություն:

"Կարծում եմ, որ այս ծրագիրը ՀՀ-ի համար լուրջ հնարավորություններ կբացի, եւ ես լիահույս եմ, որ մենք կկարողանանք արդյունավետ աշխատել Հայաստանի հետ, մենք դրա համար ունենք առաջիկա 4 տարի", - ամփոփել է Վարհեին: