Տաթևում կկայանա «Մենք ենք, մեր սարերը» ոչխարների խուզման և արհեստների փառատոնը

Արմինֆո.  Հուլիսի 10-ին «ՏաԹևեր» ճոպանուղու «Հալիձոր» կայանի հարևանությամբ տեղի կունենա «Մենք ենք, մեր սարերը» արհեստների փառատոնը, որն իրականացվում է «Տաթևի վերածնունդ» հիմնադրամի կողմից Զբոսաշրջության և քաղաքաշինության բարեգործական հիմնադրամի հետ համագործակցությամբ։

Նախաձեռնության մամուլի ծառայության հաղորդման համաձայն, փառատոնի շրջանակում կանցկացվի արդեն հայտնի դարձած ու սիրված ոչխարերի խուզման միջոցառումը՝ ներառյալ «Բրդից` կարպետ» վարպետության դասը։ Վերջինս կազմակերպվում է 5-րդ անգամ այս տարածաշրջանում։

«Մենք ենք, մեր սարերը» փառատոնի նպատակն է առավել ճանաչելի դարձնել Սյունիքի և Վայոց Ձորի ավանդույթները, մշակույթն ու արհեստները, ներկայացնել մարզերի տեղական արտադրանքը, ինչպես նաև խթանել զբոսաշրջության զարգացումը տարածաշրջանում։

Փառատոնի մուտքն ազատ է բոլոր ցանկացողների համար։ Այն բաղկացած կլինի մի քանի տարբեր բաղադրիչներից․ Սյունիքից ու Վայոց ձորից 15 վարպետների մասնակցությամբ կանցկացվեն արվեստների ու արհեստների բաց վարպետության դասեր (խեցեգործություն, կարպետագործություն, տոհմածառի ստեղծում, տիկնիկագործություն, ճյուղագործություն, մեղրամոմով քսուկների պատրաստում և նկարչություն), Տաթև խոշորացված համայնքի 7 գյուղերի բնակիչների կողմից կներկայացվեն ազգային ուտեստների տեսականիներ, ինչպես նաև կկազմակերպվեն հետաքրքիր շրջայցեր դեպի հինավուրց պատմական գյուղեր։

«Փառատոնը հնարավորություն կընձեռի Տաթև խոշորացված համայնքի բնակիչներին ներկայացնելու իրենց տեղական արտադրանքը, զբոսաշրջային ծառայություններն ու գրավիչ տուրիստական փաթեթները, ինչպես նաև ձեռքի աշխատանքները, մշակույթն ու տեղի արհեստները։ Կարծում ենք, նման փառատոնի անցկացումը խիստ կարևոր է Հայաստանի, մասնավորապես՝ այս տարածաշրջանի համար, կորոնավիրուսով պայմանավորված համավարակից և Արցախյան պատերազմից հետո ստեղծված մարտահրավերները հաղթահարելու, զբոսաշրջային ոլորտն ու ենթակառուցվացվածքները վերականգնելու նպատակով»,-ասում է Զբոսաշրջության և քաղաքաշինության բարեգործական հիմնադրամի տնօրեն Ելենա Աբովյանը։

Փառատոնի մասնակիցները, հյուրերն ու զբոսաշրջիկները հնարավորություն կունենան համտեսելու տարածաշրջանի համեղ ուստեստները, մասնակցելու մրցույթների և շրջայցերի, ձեռք բերելու գեղեցիկ հուշանվերներ և վայելելու «Լավ Էլի» խմբի համերգը Տաթևի չքնաղ բնության գրկում։ Սա հրաշալի հնարավորություն է օգտվելու նաև «ՏաԹևեր» ճոպանուղուց, վայելելու Որոտանի կիրճի չքնաղ տեսարանը և այցելելու միջնադարյան Հայաստանի ամենահայտնի հոգևոր, մշակութային և լուսավորչական կենտրոններից մեկը՝ 9-րդ դարում կառուցված Տաթևի վանական համալիրը:

Փառատոնի ամփոփումից հետո՝ հուլիսի 11-ին, այցելուներն ու հյուրերը կարող են մասնակցել նաև Վարդավառին, Տաթևում։

Փառատոնի իրականացման համար պետական աջակցություն կտրամադրվի ՀՀ Էկոնոմիկայի նախարարության Զբոսաշրջության կոմիտեի կողմից:

Սյունիքի և Վայոց ձորի արհեստավորները կմասնակցեն փառատոնին «Իմ Հայաստան» ծրագրի միջոցով, որը ֆինանսավորվում է ԱՄՆ Միջազգային զարգացման գործակալության (ԱՄՆ ՄԶԳ) և իրականացվում Սմիթսոնյան ինստիտուտի կողմից:

«Տաթևի վերածնունդ» հիմնադրամի մասին

Շուրջ 10 տարի գործող «Տաթևի վերածնունդ» հիմնադրամի նպատակն է Տաթևի վանական համալիրի վերականգնումն ու հարակից համայնքների զարգացումը, համալիրի պատմամշակութային, կրթական և հոգևոր կյանքի վերածնունդը, զբոսաշրջային և հանրային ենթակառուցվածքների ստեղծումը, ինչպիսին «ՏաԹևեր» ճոպանուղին է։

«Տաթևի վերածնունդ» հիմնադրամը գործում է՝ ի բարօրություն տարածաշրջանի բնակիչների, իրավամբ համարվելով Սյունիքի մարզի և թերևս Հայաստանի ամբողջ հարավի կայուն զարգացման կարևորագույն ծրագիրը։

Հիմնադրամի խարսխային ծրագրերից է «ՏաԹևեր» Ճոպանուղու կառուցումը, որով մենք խթանեցինք տնտեսական աճը տարածաշրջանում՝ արձանագրելով տարեկան 150,000 այցելու, նպաստելով տեղացիների կողմից ձեռնարկությունների զարգացմանն ու առաջխաղացմանը։

«Զբոսաշրջության և քաղաքաշինության» (TUF) բարեգործական հիմնադրամի մասին

«Զբոսաշրջության և քաղաքաշինության» (TUF) բարեգործական հիմնադրամը 2020 թ. հուլիսից ստանձնել է «Հայաստանի զարգացման նախաձեռնություններ» (IDeA) հիմնադրամի զբոսաշրջության և քաղաքաշինության զարգացմանը միտված բոլոր ծրագրերը (Դիլիջան, Տաթև, Արցախ և Երևան)։ Հիմնադրամը մշակում է զբոսաշրջային և քաղաքաշինական նորարար ծրագրեր, խթանում տարածքային կայուն զարգացումը ու դիրքավորում Հայաստանը համաշխարհային քարտեզի վրա՝ որպես մրցունակ զբոսաշրջային երկիր։