Լավրովը մեկնում է Անթալիա՝  Չավուշօղլուի հետ բանակցելու  

Արմինֆո.Ռուսաստանի արտգործնախարար Սերգեյ Լավրովը հունիսի 30-ին կայցելի Անթալիա ՝ Թուրքիայի ԱԳ նախարար Մեւլութ Չավուշօղլուի հետ բանակցելու համար: Հանդիպման ընթացքում նախարարները կքննարկեն երկկողմ հարաբերությունների վիճակը և զարգացման հեռանկարները, ինչպես նաև տարածաշրջանային և միջազգային օրակարգի արդիական հարցեր:

Ինչպես հաղորդում է ՌԴ ԱԳՆ-ը, Անթալիայում բանակցությունների ընթացքում նախատեսվում է անդրադառնալ երկկողմ և միջազգային օրակարգի հարցերի լայն շրջանակի: Կքննարկվեն Անդրկովկասի իրավիճակը, իրավիճակը Մերձավոր Արեւելքում եւ Հյուսիսային Աֆրիկայում, Աֆղանստանում, իրավիճակը Ուկրաինայում, Կենտրոնական Ասիայում, արեւելյան միջերկրածովյան եւ սեւծովյան տարածաշրջանում:

Նախատեսվում է սիրիական հակամարտության քաղաքական կարգավորման ընթացքի առարկայական քննարկում՝ 2021 թվականի մայիսի 26-ին Սիրիայում կայացած նախագահական ընտրությունների եւ Ժնեւում Սահմանադրական կոմիտեի խմբագրական հանձնաժողովի վեցերորդ նստաշրջանի նախապատրաստման ֆոնին: Օրակարգում են լինելու նաեւ տեղի բնակիչներին հումանիտար աջակցության ավելացմանը, Իդլիբում եւ Սիրիայի հյուսիս-արեւելքում տիրող իրավիճակին, ահաբեկչության դեմ պայքարին վերաբերող հարցեր: Տեղի կունենա մտքերի առարկայական փոխանակում Լիբիայում իրավիճակի զարգացման հեռանկարների շուրջ ՝ հաշվի առնելով այդ երկրում ճգնաժամի համալիր կարգավորման գործում Մոսկվայի և Անկարայի արտաքին քաղաքական նախաձեռնությունների դրական ներդրումը։

Հանդիպման ընթացքում զգալի ուշադրություն կդարձվի երկկողմ առեւտրատնտեսական համագործակցության ակտիվացման եւ դրա որակական աճի ապահովման ուղիներին: Արձանագրենք, որ 2021 թվականի հունվար-ապրիլ ամիսներին փոխադարձ ապրանքաշրջանառությունն աճել է 22,5 տոկոսով ՝ հասնելով 9,1 մլրդ դոլարի, այդ թվում ՝ ռուսական արտահանումը ՝ 21,1 տոկոսով ՝ մինչեւ 7,2 մլրդ դոլար, իսկ ներմուծումը ՝ 27,8 տոկոսով ՝ մինչև 1,9 մլրդ դոլար։  Միևնույն ժամանակ, արդիական է մնում Թուրքիայի կողմից կիրառվող առևտրային արգելքների վերացման ուղղությամբ տարվող աշխատանքը ։ Ռուսական կողմը մտադիր է ընդգծել հայրենական ապրանքների լայն անվանացանկի համար լրացուցիչ ներմուծման մաքսատուրքերի վերացման անհրաժեշտությունը:

Առանձին ուշադրություն կհատկացվի բարձր տեխնոլոգիական ոլորտներում համագործակցության ընդլայնմանը, ներառյալ ռազմատեխնիկական համագործակցությունը: Նախատեսվում է քննարկել Թուրքիայում գտնվող Ռուսաստանի քաղաքացիների կյանքի եւ առողջության անվտանգության ապահովման հարցերը ՝ հաշվի առնելով երկկողմ ուղեւորատար ավիահաղորդակցության լիարժեք վերսկսումը 2021 թվականի հունիսի 22-ից: Կքննարկվեն երկու երկրների պրոֆիլային մարմինների փոխգործակցության թեմաները ՝ կորոնավիրուսային վարակի դեմ պայքարում ջանքերի մեծացման համար, ռուսական "Սպուտնիկ V" պատվաստանյութի կիրառումը եւ թուրքական դեղագործական ընկերությունների կողմից դրա արտադրության շուտափույթ կարգավորումը:

Երկկողմ օրակարգում է նաև ռուս - թուրքական մշակութային-հումանիտար համագործակցության վիճակի և երկրների քաղաքացիական հասարակության ինստիտուտների ուղղությամբ փոխգործակցության վերաբերյալ կարծիքների փոխանակումը: Ակնկալվում է, որ նախարարների առաջիկա հանդիպումը կնպաստի Ռուսաստանի և Թուրքիայի միջև բազմապլան հարաբերությունների հետագա զարգացմանը ։