Բլինքեն. ԱՄՆ-ը կշարունակի քննարկել 907 ուղղման կասեցման նպատակահարմարության հարցը  

Արմինֆո. Միացյալ Նահանգները կշարունակի քննարկել 907 ուղղման կասեցման նպատակահարմարության հարցը, որը սահմանափակում է ԱՄՆ-ի կողմից Ադրբեջանին ռազմական օգնության տրամադրումը: Այդ մասին հայտարարել է ԱՄՆ պետքարտուղար Էնթոնի Բլինքենը։

Ինչպես հաղորդում է Ամերիկայի Հայ դատի հանձնախումբը (ANCA), Վաշինգտոնի կողմից Բաքվին աջակցելու մասին հարցն արծարծվել է ԱՄՆ արտաքին քաղաքական գերատեսչության ղեկավարի մասնակցությամբ լսումների ժամանակ, որոնք նվիրված էին ԱՄՆ-ի արտաքին օգնությանը 2022 ֆինանսական տարում: Դրանք կայացել են ԱՄՆ Կոնգրեսի Սենատի արտաքին գործերի կոմիտեում ։ Կոմիտեի նախագահ Ռոբերտ Մենենդեսը հայտարարել է, որ հիասթափված է ԱՄՆ վարչակազմի որոշումից՝ բացառության կարգով շարունակել օգնություն ցուցաբերել Ադրբեջանի կառավարությանը, այդ թվում ՝ ռազմական՝ սառեցնելով 907 ուղղման գործողությունը:

Մենենդեսն ընդգծել է, որ Բայդենի վարչակազմն այդ քայլով արձակել է Ալիևի վարչակարգի ձեռքերը ՝ "կանաչ լույս" վառելով անպատիժ գործողությունների համար ։ "Ես հիասթափված էի, որ վարչակազմը կանաչ լույս տվեց 907-ի չեղարկման երկարաձգման համար, չնայած Լեռնային Ղարաբաղի վրա Ադրբեջանի հարձակմանը ։ Այժմ, 907-րդ ուղղումից հրաժարվելուց հետո,  տեղի է ունենում փաստացի միջամտություն Հայաստանի տարածքային ինքնիշխանությանը սահմանային հարցում, ռազմագերիների ազատ արձակումից հրաժարում՝ միջազգային իրավունքի խախտմամբ ։ Ես նկատի ունեմ, ես կարծում եմ, որ նրանք [Ադրբեջանը] կարող են անպատիժ գործել, եւ ես կարծում եմ, երբ մենք հրաժարվեցինք դրանից [բաժին 907], մենք նրանց "կանաչ լույս" տվեցինք նման գործողությունների համար", - ասել է կոնգրեսականը:

Ի պատասխան  Մենենդեսի՝ Բլինքենը վստահեցրել է, որ ԱՄՆ-ը կշարունակի քննարկել այդ հարցը։ "Ես ակտիվորեն աշխատում եմ այդ ուղղությամբ։ Հատկապես՝ գերիների վերադարձի, բանակցությունների շուրջ փոխգործակցության ուղղությամբ՝ նպատակ ունենալով [Լեռնային Ղարաբաղի հակամարտության] իսկական կարգավորումը", - հավելել է ԱՄՆ դիվանագիտության ղեկավարը։

Հիշեցնենք, որ 907-րդ ուղղումն ընդունվել Է Կոնգրեսի կողմից 1992 թվականին եւ արգելել է ԱՄՆ վարչակազմի կողմից կառավարական գծով Բաքվին օգնության ցուցաբերումը՝ Ադրբեջանի եւ Հայաստանի միջեւ հակամարտության կապակցությամբ: Սակայն 2001 թվականի սեպտեմբերի 11-ի ահաբեկչությունից հետո Կոնգրեսն օրենք ընդունեց արտասահմանյան գործառնություններին հատկացման մասին ՝ նախագահին վերապահելով 907-րդ ուղղումից հրաժարվելու իրավունք։ Դա անհրաժեշտ էր ԱՄՆ-ին, երբ պետք էր մատակարարել Աֆղանստանում ամերիկյան զորքերին։ Բուշի եւ Օբամայի վարչակազմերը շարունակում էին հրաժարվել այդ արգելքի իրագործումից։ Երկար տարիներ ադրբեջանական դիվանագիտությունն ապարդյուն փորձում էր հասնել դրա չեղարկմանը, սակայն իրավիճակը փոխվեց 2018 թվականին ՝ Թրամփի վարչակազմի գալով, որը կասեցրել է ուղղման գործողությունը։ Ընթացիկ տարվա մայիսի սկզբին հայտնի էր դարձել, որ Բայդենի վարչակազմը սառեցրել է 907 ուղղման գործողությունը։