Արմինֆո. Սյունիքի մարզ ուղեւորությունը հասունացել էր, ես այն ծրագրել էի, քանի որ դա շատ զգայուն տարածաշրջան է ինչպես Հայաստանի համար, այնպես էլ ընդհանուր տարածաշրջանային մասշտաբով։
Այդ մասին ԱրմԻնֆո-ի թղթակցի հետ զրույցում հայտարարել է Հայաստանում Ռուսաստանի դեսպան Սերգեյ Կոպիրկինը՝ անդրադառնալով Սյունիք կատարած այցին։ Ընդ որում, նա նշել է, որ ՀՀ հարավային մարզ է այցելել դեսպանության ռազմաօդային կցորդի, ինչպես նաեւ Հայաստանում Ռուսաստանի անվտանգության դաշնային ծառայության սահմանապահ վարչության պետի տեղակալի հետ:
"Մենք շատ լավ հասկանում ենք, թե ինչքանով է այս տարածաշրջանում իրավիճակը կարևոր և զգայուն Հայաստանի, հայ բնակչության համար։ Եվ այդ ըմբռնմամբ է պայմանավորված այն, որ մեր սահմանապահները դիրքեր են գրավել հայ-ադրբեջանական սահմանի առավել զգայուն տեղամասերում, ինչն, իրականում, դուրս է պայմանագրային պայմանների շրջանակից (Հայաստանի եւ ՌԴ միջեւ- խմբ.)", - ասել է դեսպանը, այդ համատեքստում հիշեցնելով, որ ռուս սահմանապահները ծառայություն են իրականացնում սահմանի թուրքական և իրանական հատվածներում:
Դրա հետ մեկտեղ, ռուս դիվանագետն արձանագրել է, որ ձեռնարկվել են շատ լուրջ ջանքեր' նյութական եւ կազմակերպչական, Ռուսաստանի սահմանապահ ներկայությունը մեծացնելու համար, բայց, որպեսզի դրանք տեղակայվեն առավել զգայուն տեղամասերում, եւ դրանով իսկ ապահովեն անվտանգությունն ու կայունությունը սահմանին։
"Եվ, ինչը շատ կարեւոր է, դրանով իսկ հանգստության եւ վստահության որոշակի լրացուցիչ տարր ընձեռել տեղի բնակչությանը, որը մարտական գործողությունների ավարտից հետո հայտնվել է իր համար բոլորովին անսովոր վիճակում", - ասել է Կոպիրկինը:
Դեսպանը տեղեկացրել է, որ այցելել է ռուսական պահակետեր, եղել է նաեւ այն դիրքերում, որտեղ ծառայություն են իրականացնում հայ սահմանապահները, եւ դրական տպավորություններ է ունի: "Իրավիճակը հանգիստ է եւ վերահսկելի։ Շատ լավ, եղբայրական փոխգործակցություն է ստեղծվել ռուս և հայ սահմանապահների միջև։ Զգացվում է, որ մարդիկ իսկապես մի գործ են անում, ինչը շատ կարեւոր է", - հավելել է դեսպանը։
Նա, միեւնեւյն ժամանակ, նշել է, որ ծանոթացել է ռուսական 102-րդ ռազմակայանի գումարտակային խմբի գործունեությանը, որի մի մասը տեղակայված է Գորիսում, իսկ ավիացիոն բաղադրիչը՝ Սիսիանում: "Ես տպավորված էի, թե որքան արագ հաջողվեց տեղակայել այդ խումբը, այսինքն, զինծառայողները գտնվում են շատ լավ պայմաններում և պատրաստ են արձագանքել իրավիճակի ցանկացած փոփոխության։ Իսկ դա շատ կարևոր է և լրացուցիչ կայունության, հանգստության և խաղաղության տարր է տարածաշրջանում։ Որքան ես հասկանում եմ, մեր սահմանապահներին եւ զինվորականներին հաջողվում է նորմալ կառուցողական հարաբերություններ պահպանել նաեւ ադրբեջանական կողմի հետ՝ համապատասխան կոնտակտային անձանց միջոցով", - նկատել է Կոպիրկինը, համոզմունք հայտնելով, որ վերը թվարկվածը ծառայում է այն բանին, որ տարածաշրջանում լինի բավականին կայուն, հանգիստ մթնոլորտ:
Ռուս դիվանագետը հույս է հայտնել, որ հայկական կողմի հետ այդ բոլոր համատեղ ջանքերը, ինչպես նաեւ ադրբեջանական կողմի հետ փոխգործակցությունը թույլ կտան պահպանել խաղաղությունն ու հանգստությունը՝ ստեղծված իրավիճակի ողջ բարդությամբ հանդերձ:
Հարցին, թե արդյոք Ռուսաստանը դիտարկում է իր զինվորականներին (սահմանապահներ, խաղաղապահներ) Գեղարքունիքի մարզի սահմանին տեղակայելու հնարավորությունը, Հայաստանի սահմաններին տեղի ունեցող իրադարձությունների ֆոնին եւ հաշվի առնելով ՀՀ վարչապետի պաշտոնակատարի առաջարկը, դեսպանը պատասխանել է, որ այս պահին պատրաստ չէ խոսել մանրամասների մասին, քանի որ ողջ այդ գործընթացի մաս չի հանդիսանում: "Բայց, որքան ես հասկանում եմ, տարբերակներն ուսունասիրվում են, քննարկվում են։ Կարծում եմ, որ ամեն ինչ արվելու է, որպեսզի իրավիճակը կայունանա, և երկրի բնակչությունն իրեն ավելի հանգիստ ու վստահ զգա, չնայած, նույնիսկ, այն հույզերին, որոնք հիմա հրահրում է ներքաղաքական իրավիճակը, առաջիկա ընտրությունները",
- ամփոփել է դեսպանը՝ մեկ անգամ ևս կարևորելով հայ-ռուսական փոխգործակցությունն անվտանգության ոլորտում։