Երկուշաբթի, 7 Հունիսի 2021 19:28

Արմինֆո. Ռուսաստանի նախագահ Վլադիմիր Պուտինը եւ Եվրոպական խորհրդի նախագահ Շառլ Միշելը հեռախոսազրույցի ընթացքում քննարկել են նաեւ Լեռնային Ղարաբաղում տիրող իրավիճակը:

 

Ինչպես հաղորդում է Կրեմլը, հեռախոսազրույցի ընթացքում հանգամանալից քննարկվել են Ռուսաստանի եւ Եվրամիության հարաբերություններին առնչվող, ինչպես նաեւ մի շարք հրատապ միջազգային խնդիրներ:

Ինչպես ընդգծել Է Վլադիմիր Պուտինը, թեեւ Ռուսաստանն ու Եվրամիությունը առեւտրի եւ ներդրումների ոլորտում միմյանց համար բավական նշանակալի գործընկերներ են մնում, այնուամենայնիվ, Ռուսաստան-ԵՄ կապերի ներկայիս վիճակը չի կարելի բավարար համարել: Նշվել է, որ պրագմատիկ եւ հարգալից ձեւով համագործակցությանը վերադառնալը կհամապատասխաներ ընդհանուր շահերին ։ Երկուստեք կարծիք է հայտնվել այնպիսի կոնկրետ ուղղություններով փոխգործակցության ակտիվացման կարեւորության մասին, ինչպիսիք են առողջապահությունը, կլիմայական օրակարգը, տարածաշրջանային հակամարտությունների կարգավորումը: Քննարկվել են կորոնավիրուսային վարակի տարածման դեմ պայքարի հարցերը, այդ թվում՝ ԵՄ-ում ռուսական "Սպուտնիկ V"-ի սերտիֆիկացման հեռանկարները եւ հակահամաճարակային սահմանափակումների պահպանմամբ քաղաքացիների փոխադարձ ուղեւորությունների պայմանների ապահովումը:

 

Քննարկվել է նաեւ Լեռնային Ղարաբաղի շուրջ առկա իրավիճակը՝ հաշվի առնելով Ռուսաստանի, Ադրբեջանի եւ Հայաստանի ղեկավարների 2020 թվականի նոյեմբերի 9-ի եւ 2021 թվականի հունվարի 11-ի հայտարարությունների հետագա հետեւողական իրականացման կարեւորությունը: Առաջնահերթ խնդիրների թվում նշվել է տարածաշրջանում տնտեսական եւ տրանսպորտային կապերի ապաշրջափակումը, բնակչության հումանիտար խնդիրների լուծումը: Շառլ Միշելն իր աջակցությունն է հայտնել իրականացվող աշխատանքին, այդ թվում՝ ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրանսիա) գծով:

 

Եվրամիության կողմից Բելառուսի նկատմամբ պատժամիջոցային ճնշման լրացուցիչ միջոցների ձեռնարկման կապակցությամբ Վլադիմիր Պուտինն ընդգծել է նման մոտեցման, ինչպես նաեւ, ընդհանուր առմամբ, այդ ինքնիշխան պետության ներքին գործերին միջամտելու ցանկացած փորձի հակաարդյունավետությունը:

 

Ներուկրաինական ճգնաժամի շուրջ կարծիքների փոխանակման ժամանակ երկու կողմից արձանագրվել է, որ 2015 թվականի Մինսկի "միջոցառումների համալիրը" մնում է կարգավորման անայլընտրանք հիմք: Ռուսաստանի նախագահը ընդգծել է Կիեւի իշխանությունների կողմից նախկինում ձեռք բերված բոլոր պայմանավորվածությունների անվերապահ կատարման անհրաժեշտությունը, նախեւառաջ, Դոնեցկի եւ Լուգանսկի հետ ուղիղ երկխոսություն հաստատելու եւ Դոնբասի հատուկ կարգավիճակի իրավական ձեւակերպման առումով:

Լիբիայում տիրող իրավիճակի քննարկման ընթացքում Վլադիմիր Պուտինը եւ Շառլ Միշելը  արտահայտվել են քաղաքական գործընթացի առաջխաղացմանը եւ անցումային շրջանում իշխանության ձեւավորված մարմիններին աջակցության օգտին: