Քաղաքական գործիչ. Հայաստանն իրավունք չունի չնկատել Ֆրանսիայի մեկնած օգնության ձեռքը  

Արմինֆո. Այսօր վարչապետի պաշտոնակատար Նիկոլ Փաշինյանը բավականին բարդ իրավիճակում է հայտնվել: Նա փորձում է Հայաստանի ներսում և դրսում ցույց տալ մի իրավիճակ, որը վաղուց գոյություն չունի, մասնավորապես՝ որ Ռուսաստանը Հայաստանի անվտանգության ապահովման երաշխավորն է։ ԱրմԻնֆո-ին այդպիսի կարծիք է հայտնել Հայաստանի կառուցողական կուսակցության առաջնորդ, "Ազատ հայրենիք" դաշինքի վարչապետի թեկնածու Անդրիաս Ղուկասյանը։

"Բայց չէ որ Հայաստանի և Ռուսաստանի միջև պայմանագրերում հստակ ամրագրված փաստեր կան, որոնք թաքցնել հնարավոր չէ ։ Առաջին հերթին, ես նկատի ունեմ պայմանագրում հստակ ամրագրված կետը՝  արտաքին ռազմական սպառնալիքի դեպքում Հայաստանի տարածքում հայ-ռուսական համատեղ ռազմական խմբավորման՝ մեր երկրի ռազմական ղեկավարության վերահսկողության ներքո անցնելու մասին։ Ադրբեջանցի զինվորականներն անցել են մեր սահմանը, բայց մենք տեսնում ենք, որ ոչ մի նման բան տեղի չի ունեցել։ Չկա անգամ ՀԱՊԿ արձագանքը Հայաստանի օգնության մասին դիմելուն", - ընդգծել է նա։

Նման իրողությունները, քաղաքական գործչի գնահատմամբ, խոսում են այն մասին, որ Ռուսաստանի կողմից Հայաստանի անվտանգության ապահովումը, փաստացի, բախտի քմահաճույքին թողնելու պայմաններում այսօր արդեն ոչինչ չի խանգարում Երևանին ընդունել Ֆրանսիայի ռազմական աջակցությունը։ Հատկապես, այն պայմաններում, երբ վերջինս այդ աջակցությունը գրեթե բացահայտ է առաջարկում։ Այս համատեքստում՝ նա ընդգծել է, որ Փաշինյանի վերջերս Փարիզ կատարած այցը տեղի է ունեցել նախագահ Մակրոնի հրավերով, ինչը, ըստ Ղուկասյանի, պայմանավորված էր Ադրբեջանի հետ սահմանին ԵԱՀԿ Մինսկի խմբի դիտորդներ տեղակայելու Փաշինյանի առաջարկությամբ։

Ազգային Անվտանգության խորհրդի մայիսի 27-ի նիստում վարչապետի պաշտոնակատար Նիկոլ Փաշինյանը ներկայացրել է Ադրբեջանի հետ սահմանին տիրող իրավիճակից դուրս գալու իր ծրագիրը, որի էությունը սահմանից երկու կողմերի զինված ուժերի անհապաղ հայելային հետ քաշումն է մշտական տեղակայման վայրեր: Սահմանի երկայնքով պետք է տեղակայվեն միջազգային դիտորդներ ՌԴ-ից կամ ԵԱՀԿ Մինսկի խմբի մյուս համանախագահ երկրներից։ Փաշինյանը այդ ծրագիրը համարում է ամենակարճ ճանապարհը դեպի սահմանային իրավիճակի ապաէսկալացում։ Ֆրանսիան և Եվրամիությունն արդեն իրենց աջակցությունն են հայտնել Փաշինյանի ծրագրին։

Այսպիսով, Ֆրանսիան, նրա կարծիքով, ոչ միայն աջակցություն է հայտնել Փաշինյանի ծրագրին,այլեւ պատրաստակամություն է հայտնել աջակցել Հայաստանին երկրի տարածք ադրբեջանական ռազմական ներխուժման ներկա իրավիճակում: Եվ չարձագանքել բավական համառ հրավերին և չմեկնել Փարիզ՝ ՀՀ վարչապետը, ըստ Ղուկասյանի, պարզապես, չէր կարող։ Քաղաքական գործչի կարծիքով,  Ֆրանսիայի և ուժի մի շարք այլ կենտրոնների համար ստեղծված իրավիճակում կարևոր է թվում ադրբեջանական ներխուժման խնդրի լուծումը։ Մասնավորապես, կարևոր էր ցույց տալ, որ Հայաստանն ամենեւին էլ միայնակ չէ, ինչպես նաև՝ որ կա այլընտրանք Հայաստանի ու Ադրբեջանի միջև սահմանների Մոսկվայի կողմից առաջարկվող սահմանազատման և սահմանագծման եռակողմ ձևաչափին՝ ԵԱՀԿ ՄԽ-ը:

Հայաստանի վարչապետի պաշտոնակատար Նիկոլ Փաշինյանը հունիսի 1-ին Փարիզում հանդիպում է ունեցել Ֆրանսիայի նախագահ Էմանուել Մակրոնի, Ֆրանսիայի Ազգային ժողովի նախագահ Ռիչարդ Ֆեռանի, Սենատի նախագահ Ժերար Լարշեի, Փարիզի քաղաքապետ Անն Իդալգոյի հետ: Հունիսի 2-ին Նիկոլ Փաշինյանը մեկնել է Բրյուսել, որտեղ հանդիպում է ունեցել Բելգիայի վարչապետ Ալեքսանդր դե Կրոյի հետ:

"Այլ հարց է Մոսկվայից խորը կախվածության մեջ գտնվող Հայաստանի ղեկավարության՝ իրեն մեկնած ձեռքը սեղմելու եւ դրանով իսկ սահմանին տիրող իրավիճակը կտրուկ փոխելու պատրաստակամությունը։ Անձամբ՝ ես, նման պատրաստակամություն, ցավոք, չեմ տեսնում։ Փաշինյանը տատանվում է, և այն, որ, նույնիսկ, նրա ԱԳՆ-ը դեմ է հանդես եկել նրա քաղաքականությանը, խոսում է մեր երկրում իշխանափոխության անհրաժեշտության մասին։ Ֆրանսիայի հետ հարաբերությունների իրական, այլ ոչ թե դեկլարատիվ խորացումը թույլ կտա վերականգնել Հայաստանի անվտանգությունը։ Իսկ ֆրանսիայի աջակցությունը թույլ կտա վերականգնել, վերազինել և վերակազմավորել մեր զինված ուժերը։ Սա իրական այլընտրանք է, որն անտեսել մենք, պարզապես, իրավունք չունենք՝ մեր այսօրվա վիճակում", - ամփոփել է Ղուկասյանը։