Ալիեւը բացատրել է, թե ինչու է "Զանգեզուրի միջանցքը" քննարկվում Ռուսաստանի հետ  

Արմինֆո.Ադրբեջանի նախագահ Իլհամ Ալիեւը հայտարարել է Հայաստանի տարածքով "Զանգեզուրի տրանսպորտային միջանցքի" կառուցման հարցում տեղաշարժերի մասին:

"Ինչպես հայտնի է, այդ մասին (Զանգեզուրի միջանցքի մասին - խմբ.) ասվում է նոյեմբերի 10-ի համատեղ հայտարարության մեջ։ Այդ ժամանակից ի վեր Ադրբեջանի, Հայաստանի եւ Ռուսաստանի փոխվարչապետների մակարդակով աշխատանքային խմբի նիստերում այս հարցում շատ լուրջ քայլեր են ձեռնարկվել։ Կարող եմ վստահաբար ասել, որ երկաթուղային միջանցքը կբացվի", - ասել Է Ալիեւը Ադրբեջանի պետական հեռուստատեսությամբ հեռարձակված հարցազրույցում։

Ալիևը նաև բացատրել է, թե ինչու է այդ հարցը քննարկվում ՌԴ-ի հետ։ "Հայկական երկաթուղիները պատկանում են Ռուսաստանին։ Այդ պատճառով մենք այդ հարցը քննարկում ենք ռուսական կողմի հետ", - ասել է նա, հաղորդում է "ՌԻԱ Նովոստի" - ն։

Ադրբեջանի նախագահի հետագա ծրագրերում է "Արեւելյան Զանգեզուրի շրջանում գտնվող Զանգելանի միացումը Արեւմտյան Զանգեզուրի հետ, այնուհետեւ Օրդուբադի միջոցով՝ Նախիջեւանի եւ Թուրքիայի հետ": Նա նշել է, որ տրվել է Հորադիզ (Ֆիզուլիի շրջան) - Ագբանդ (Ադրբեջան) երկաթուղու կառուցման մեկնարկը, կկառուցվի ադրբեջանական Օրդուբադից մինչեւ Հայաստանի հետ սահման 15-16 կմ երկարությամբ տեղամաս: Նրա խոսքով ՝ արդեն գործում է Նախիջեւանի երկաթուղին, իրականացվում են ինչպես ուղեւորային, այնպես էլ բեռների փոխադրումներ, եւ Հորադիզ-Աղբանդ հատվածի կառուցմամբ կստեղծվի ողջ ենթակառուցվածքը Բաքվի վերահսկողության տակ գտնվող տարածքում:

Հիշեցնենք, որ Ռուսաստանի, Հայաստանի եւ Ադրբեջանի փոխվարչապետների մակարդակով աշխատանքային խումբ ստեղծելու մասին պայմանավորվածությունը ձեռք է բերվել հունվարի 11-ին Մոսկվայում երեք երկրների ղեկավարների հանդիպման ընթացքում: Աշխատանքային խումբ պետք է կենտրոնանա Ղարաբաղում տրանսպորտային եւ տնտեսական կապերի հաստատման վրա: Այդ պայմանավորվածությունները ղարաբաղյան հակամարտության գոտում ռազմական գործողությունների դադարեցման շուրջ 2020 թվականի նոյեմբերի 9-ի եռակողմ հայտարարության շարունակությունն էին։