Փորձագետ. Լոռիում նոր հանքավայրի բացումից հետո կարելի է մոռանալ մարզում զբոսաշրջության, թեթեւ արդյունաբերության եւ նորարարական գյուղատնտեսության զարգացման մասին  

Արմինֆո.Երեք տարի շարունակ Լոռու մարզում համառ աշխատանք է տարվել զբոսաշրջության, թեթև արդյունաբերության, նորարարական գյուղատնտեսության զարգացման ուղղությամբ ։ Լոռու մարզում զբոսաշրջության հետազոտությունների և զարգացման կենտրոնի համակարգող Գևորգ Վարդանյանի խոսքով ՝ վերջին 2 տարիներին անգամ փակ սահմանների պայմաններում, ներքին զբոսաշրջության հաշվին, Լոռիի մարզում հաջողվել է պահպանել ակտիվությունը զբոսաշրջային այցելությունների տեսանկյունից:

Ավելին, վերջին 2 տարում, ինչպես շարունակել է Վարդանյանը, Լոռու մարզում ներդրումները կազմել են 11.5 միլիոն դոլար: Սակայն, ըստ նրա, ՀՀ տարածքային կառավարման և ենթակառուցվածքների նախարարությունը այդ ծավալը լուրջ  ներդրումներ չի համարում։ "Նրանց համար ավելի լուրջ են հանքավայրի շահագործման հետ կապված ներդրումները", - հավելել է նա: Վարդանյանն իր հայտարարությունները պայմանավորել է տարածքային կառավարման եւ շրջակա միջավայրի նախարարությունների կողմից վերջին երկու շաբաթվա ընթացքում համայնքային կառույցների հետ հանդիպումների արդյունքներով, որոնք շահագրգռված չեն Լոռու մարզում զբոսաշրջության զարգացմամբ՝ այս պահի դրությամբ:

Լոռու մարզի զբոսաշրջության զարգացման և հետազոտությունների կենտրոնի համակարգողի խոսքով ՝ Լոռիում հերթական հանքավայրի բացման որոշումը կայացվել է կաբինետային քննարկումների շրջանակում: "Այդ հանդիպումներից ես իմացա, որ այն անձինք, ովքեր շահագործման թույլտվություն են տվել, նույնիսկ չգիտեն այդ գյուղերի գտնվելու վայրը", - պատմել է նա:

Այս համատեքստում Վարդանյանն ընդգծել է, որ Լոռու մարզում հանքերի շահագործումից ազատ միակ ճանապարհը Վանաձոր-Թումանյան հատվածն է: Այս պահին, ըստ նրա, Լոռիում 9 հանքավայրերի շահագործման թույլտվություններ կան։ "Եվ եթե մենք դրանք բացենք, ապա արդեն կարելի է մոռանալ Լոռու մարզի զարգացման այլ ոլորտների մասին, այդ թվում զբոսաշրջության, արտադրության, գյուղատնտեսության, ինչը թույլ կտար հավասարակշռել տարածաշրջանի սոցիալ-տնտեսական համակարգը", - ասաց փորձագետը:

Սակայն ներկայիս կառավարությունը պատրաստ չէ դրան, վերջիններս, ըստ Վարդանյանի, առաջնահերթություն են տալիս հանքարդյունաբերությանը, հաշվի առնելով, որ տնտեսությունը գտնվում է դժվարին կացության մեջ ՝ հանքի շահագործումը համարելով տնտեսական աճի վերականգնման միակ ճանապարհը։

Միաժամանակ, նա անդրադարձել է նոր հանքի շահագործմանը վերաբերող հասարակական լսումների անցկացման հարցին: Հիմնականում, դրանք անցել են գաղտնի, ինչի մասին արդեն հայտնի էր դարձել հետ-ֆակտում։ Հիմա, ինչպես շարունակել է փորձագետը, միջոցներ են ձեռնարկվում, որպեսզի հետագայում բացառվեն նման դեպքերը ։ Միաժամանակ, Վարդանյանը մտահոգություն է հայտնել, որ լսումներին հրավիրվում են տարածաշրջանի առավել խոցելի ընտանիքները, որոնց մասնակցության համար գումար են տրամադրում:

Ամփոփելով ասվածը ՝ Վարդանյանն ընդգծել է, որ Լոռու մարզում նոր հանքի բացումը միանշանակ մեծ սխալ է, որը կխորացնի տարածաշրջանում առկա մի շարք այլ հանքերի շահագործման հետևանքները:

Հիշեցնենք, որ վերջերս հայտնի էր դարձել, որ Լոռու մարզում նախատեսվում է հերթական բազմամետաղային հանքավայրի բացում, որը մտադիր է շահագործել Lusajur Ventures Invest ընկերությունը, որը պատկանում է Չեխիայից չնշված ներդրողներին: Նախագիծն ընդգրկում է Լոռու մարզի 5 համայնքների շահերը ՝ Դեբեդ, Եղեգնուտ, Վահագնի, Վահագնաձոր եւ Մարգահովիտ ։ Չեխ ներդրողների շահերը ներկայացնող երկրի սոցիալական ապահովության ծառայության նախկին ղեկավար Վազգեն Խաչիկյանը, ով դեռևս նախորդ իշխանության օրոք դատապարտվել էր առանձնապես խոշոր չափերի գումարներ հափշտակելու համար, համայնքի բնակիչներին հավաստիացրել է, որ խոսքը պոչամբար չունեցող հանք արդյունահանման փակ մեթոդի մասին է ։ Այստեղ չի լինի նաև հարստացուցիչ ֆաբրիկա։ Սակայն հանքավայրի հարակից համայնքներից մեկի բնակիչները դեմ են հանդես եկել հանքի շահագործմանը ՝ հաշվի առնելով այն ակնհայտ վնասը, որը կարող է պատճառվել մարդկանց առողջությանը եւ Լոռու մարզի շրջակա միջավայրին: Նրանք հայտարարել են, որ մարզի առաջնահերթությունն այսօր զբոսաշրջության զարգացումն է, ուստի նոր մետաղական հանքավայրերի շահագործման մասին խոսք լինել չի կարող ։