
Արմինֆո. ՀՀ ԱԳՆ հայտարարություն է տարածել Լատվիայի խորհրդանի կողմից Հայոց ցեղասպանությունը ճանաչող հռչակագրի ընդունման առնչությամբ:
ԱԳՆ մամուլի ծառայության հաղորդման համաձայն, հայտարարությունում ասվում է. «Ողջունում ենք Լատվիայի խորհրդարանի կողմից Հայոց ցեղասպանությունը ճանաչող հռչակագրի ընդունումը: Սա ևս մեկ քայլ է Հայոց ցեղասպանության համընդհանուր ճանաչման և դատապարտման ուղղությամբ: Այս հռչակագիրը կարևոր է ոչ միայն պատմական արդարության և ճշմարտության, այլև ապագայում նման հանցագործությունների կանխարգելման տեսակետից: Հայոց ցեղասպանության համընդհանուր ճանաչումը տարածաշրջանում հայ ժողովրդի անվտանգության կարևորագույն գրավականներից է: Կիսում ենք Լատվիայի խորհրդարանի դիրքորոշումն առ այն, որ նման հանցագործությունների ճանաչումը կոչված է կառուցելու այնպիսի ապագա, որտեղ հարգվում են մարդու իրավունքները, և յուրաքանչյուր անհատ կարող է լինել ազատ, անվտանգ և ապահով»։
Մինչդեռ, Լատվիայի օրենսդիր մարմնի կողմից համապատասխան փաստաթղթի ընդունումը վրդովմունք է հարուցել Անկարայում։ Թուրքիայի ԱԳՆ - ում հավաստիացրել են, որ 1915 թվականի իրադարձությունները որպես ցեղասպանություն ճանաչելու մասին Լատվիայի խորհրդարանի որոշումը "փորձ է վերաշարադրել պատմությունը քաղաքական դրդապատճառներով, անօրինական եւ իրավական հիմք չունեցող նախաձեռնություն": "Մենք մերժում եւ վճռականորեն դատապարտում ենք այդ անհաջող եւ անօրինական որոշումը։ Այս փորձը հակասում է մարդու իրավունքների եվրոպական դատարանի 1948 թվականի, 2013 թվականի եւ 2015 թվականի որոշումներին, որոնցում բացահայտ արտահայտված է 1915 թվականի իրադարձությունների վիճահարույց բնույթը, ինչպես նաեւ Ցեղասպանության հանցագործությունը կանխարգելելու եւ պատժելու մասին կոնվենցիայի պահանջներին: Մենք կոչ ենք անում լատվիական խորհրդարանին հրաժարվել այդ "սխալ" քայլից, այլ ոչ թե ծառայել որոշ շրջանակների օրակարգին, որոնք փորձում են թշնամություն ստեղծել պատմությունից", - նշել են Թուրքիայի ԱԳՆ-ում:
Հիշեցնենք, որ մայիսի 6-ին Լատվիայի խորհրդարանը ճանաչել է Հայոց ցեղասպանությունը ։ Բանաձևին կողմ է քվեարկել Սեյմի 100 պատգամավորներից 58-ը ։ Սեյմը կոչ է արել միջազգային հանրությանը գնահատական տալ 1915 թվականի իրադարձություններին ՝ հանուն ապագայի, որտեղ հարգվելու են մարդու իրավունքները եւ, առաջին հերթին, կյանքի իրավունքը: