Արմինֆո. Հայաստանի Հանրապետություն է ներկրվել կորոնավիրուսային հիվանդության (COVID-19) դեմ պատվաստանյութի՝ «COVAX FACILITY» նախաձեռնության միջոցով առաջին խմբաքանակը՝ 24 հազար դեղաչափ:
Այն նախատեսված է ռիսկի խմբերի շրջանում, մասնավորապես՝ բուժաշխատողների, 65 տարեկան և բարձր տարիքի անձանց, քրոնիկ հիվանդների, տարեցների խնամքի կենտրոնների բնակիչների և աշխատակիցների, սոցիալական խնամքի կենտրոնների աշխատակիցների, կամավորության սկզբունքով, կորոնավիրուսային հիվանդության (COVID-19) դեմ պատվաստելու համար:
Ինչպես հաղորդում է Հայաստանի առողջապահության նախարարության մամուլի ծառայությունը, COVID-19-ի դեմ «AstraZeneca» ընկերության պատվաստանյութը ձեռք է բերվել «COVAX FACILITY» նախաձեռնության շրջանակներում: «AstraZeneca» պատվաստանյութն ունի Առողջապահության համաշխարհային կազմակերպության (ԱՀԿ) կողմից արտակարգ իրավիճակներում կիրառման թույլտվություն: Այն կիրառելի է 18 տարեկան և բարձր տարիքի անձանց համար: Նկատենք, որ առողջապահության նախարարության գործադրած ջանքների շնորհիվ, բանակցությունների արդյունքում, հնարավոր եղավ պատվաստանյութի առաջին խմբաքանակը ստանալ նախանշված ժամկետներում: Հայաստանն այն բացառիկ երկրներից է, որը հնարավորություն է ստացել ձեռք բերել երկար սպասված պատվաստանյութը, երբ այսօր աշխարհում մի շարք երկրներ դեռևս պայքարում են այդ իրավունքի համար:
Նշենք, որ կորոնավիրուսային հիվանդության (COVID-19) համավարակի կանխարգելման գործընթացում առանցքային դեր ունի պատվաստանյութի կիրառումը: Իսկ ներկրված պատվաստանյութի արդյունավետության և անվտանգության տվյալները համապատասխանում են ԱՀԿ-ի կողմից սահմանված չափանիշներին: Հարկ է նշել, որ ԱՄՆ-ում «AstraZeneca-ի կլինիկական փորձարկման 3-րդ փուլի վերաբերյալ վերջին հայտարարության (03/25/2021) համաձայն, պատվաստանյութն ապահովում է՝ ախտանշանային COVID-19-ի կանխարգելում` 76% արդյունավետություն, հիվանդության ծանր կամ ծայրահեղ ծանր դեպքերի և հոսպիտալացման կանխարգելում՝ 100% արդյունավետություն, 65 տարեկան և բարձր տարիքի անձանց շրջանում ախտանշանային COVID-19-ի կանխարգելում՝ 85% արդյունավետություն։ Հիշեցնենք, որ Հայաստանի Հանրապետությունում պատվաստումներն իրականացվում են բացառապես կամավորության սկզբունքով», - ասվում է նախարության հաղորդագրությունում:
Հիշեցնենք, որ ԵՄ մի շարք երկրներ հրաժարվել են AstraZeneca պատվաստանյութի մատակարարումից կամ դադարեցրել են իրենց քաղաքացիների պատվաստման գործընթացը ՝ գրանցված հետեւանքների պատճառով: Հաղորդվել է, որ պատվաստում ստացած քաղաքացիների մոտ ներարկումից հետո զարգացել են թրոմբոէմբոլիկ բարդություններ, բացի այդ գրանցվել են մահվան դեպքեր: Մասնավորապես, առաջինը դեղամիջոցի կիրառումից հրաժարվել են Ավստրիայում, որտեղ պատվաստումից հետո մի կին մահացել է, իսկ մյուսի մոտ ախտորոշվել է թոքային զարկերակի թրոմբոէմբոլիա: Ավստրիայից հետո ժամանակավորապես դադարեցրել են պատվաստումը Դանիայում, Նորվեգիայում և Իսլանդիայում, Էստոնիայում, Լիտվայում, Լյուքսեմբուրգում, Կիպրոսում, Լատվիայում, Իտալիայում և այլն:
Միեւնույն ժամանակ, Դեղամիջոցների եվրոպական գործակալությունը (EMA) հայտարարել է, որ պատվաստանյութն արդյունավետ է եւ անվտանգ՝ համեմատ տեսական վտանգի: Նշենք, որ Հայաստանում համավարակի բռնկման պահից ի վեր հաստատվել է կորոնավիրուսով վարակման 190 741 դեպք, ինչը կազմում է թեստ հանձնած քաղաքացիների ընդհանուր թվի 22,6% - ը։ Ընդ որում, ապաքինվել է 172 096 մարդ (90,2 տոկոս), մահացել է 3 476 մարդ (1,8 տոկոս) ։