Արմինֆո. Հանրապետության նախագահը կարևորում է ՀՀ զինված ուժերի գլխավոր շտաբի պետ Օնիկ Գասպարյանին պաշտոնից ազատելու հարցի վերաբերյալ առաջացած քաղաքական ճգնաժամի հրատապ հանգուցալուծումը: Ինչպես ասվում է ՀՀ նախագահի մամուլի ծառայության հայտարարությունում, այդ նպատակով հանդիպումներ են եղել վարչապետի, գեներալ-գնդապետ Օնիկ Գասպարյանի և զինված ուժերի բարձրագույն հրամանատարական կազմի հետ:
«Ուսումնասիրվել են ազատելու մասին հրամանագրի նախագծի առնչությամբ Նախագահի առարկությունները չընդունելու վերաբերյալ վարչապետի հիմնավորումները: Ակնհայտ է, որ ստեղծված իրավիճակը արդյունք է պատերազմական և հետպատերազմական ժամանակաշրջանում քաղաքական և ռազմական գործիչների շրջանում առկա տարաձայնությունների՝ երբեմն խիստ անձնավորված մոտեցումներով: Չեն կարող անտեսվել նաև հրամանագրի ստորագրմանն առարկելու համար հիմք հանդիսացած իրավական առումով խնդրահարույց մեկնաբանությունները, իրավակիրառ պրակտիկան, օրենքի հնարավոր բացը:
Հանրապետության նախագահն իր նախորդ հայտարարություններում ընդգծել է, որ խնդրի շուտափույթ և Սահմանադրության շրջանակներում կարգավորումը Հայաստանի և Արցախի անվտանգության ու կայունության համար առաջնային կարևորություն ունի և բացարձակ անհրաժեշտություն է պետականության պահպանման, հասարակության հետագա պառակտումը կանխելու, ժողովրդի միասնությունը և հանրային համերաշխությունը վերականգնելու, ստեղծված անորոշ վիճակից դուրս գալու և վերջնական հանգուցալուծման հասնելու համար:
Հանրապետության նախագահը որոշել է չստորագրել հրամանագրի նախագիծը: Միաժամանակ, առաջնորդվելով Սահմանադրության 169-րդ հոդվածի 1-ին մասի 4-րդ կետով, Հանրապետության նախագահն առանձին դիմումով դիմելու է սահմանադրական դատարան «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի՝ Սահմանադրությանը համապատասխանելու հարցը որոշելու խնդրանքով: Հանրապետության նախագահը, հավատարիմ իր հանձնառությանը, շարունակելու է իրավիճակի հետագա կայունացմանն ուղղված քայլերը և կոչ է անում բոլորին՝ նախագահի ինստիտուտը ծառայեցնելով որպես հարթակ, բանակցել առկա բոլոր խնդիրների համապարփակ լուծումը գտնելու նպատակով», - ասվում է հայտարարությունում:
Հիշեցնենք, որ փետրվարի 28-ին վարչապետ Նիկոլ Փաշինյանը երկրորդ անգամ ՀՀ նախագահին էր ուղարկել ԶՈՒ գլխավոր շտաբի պետի պաշտոնանկության վերաբերյալ հրամանագրի նախագիծը: Նման որոշման առիթ էր հանդիսացել փետրվարի 25-ին ՀՀ ԶՈՒ գլխավոր շտաբի տարածած հայտարարությունը ։ Այն ժամանակ գլխավոր շտաբի պետն ու 40 բարձրաստիճան սպաներ հանդես էին եկել համատեղ հայտարարությամբ, որում վարչապետին կոչ էին արել հրաժարական տալ։ Փաշինյանն այդ կոչն ընկալել է որպես "ռազմական հեղաշրջման փորձ" և հրամանագիր ստորագրել Գասպարյանին պաշտոնանկ անելու մասին։ Սակայն փետրվարի 27-ին ՀՀ նախագահը առարկություններով մերժել է Գասպարյանին պաշտոնից ազատելու հրամանագրի նախագիծը։
Նախօրեին և Անվտանգության խորհուրդը կոչ է արել նախագահին ստորագրել Գասպարյանին պաշտոնանկ անելու մասին հրամանագիրը' ընդգծելով երկրում քաղաքական գործընթացներին բանակի միջամտության անընդունելիությունը: