Զինվորականների հայտարարությունը օրինաչափ պատասխան էր Փաշինյանի ՝ պարտության համար պատասխանատվությունից խուսափելու փորձին. ռուս քաղաքագետ

Արմինֆո. ՌԴ - ի արձագանքը Հայաստանում տեղի ունեցող վերջին իրադարձություններին,այն է՝  տեղի ունեցածը Հայաստանի ներքին գործն է, ըստ էության, չէր կարող այլ լինել։  Նման կարծիք է հայտնել ռուս քաղաքագետ Անդրեյ Արեշևը։

«Մենք տեսնում ենք, որ Մոսկվան ՀՀ ԶՈՒ գլխավոր շտաբի հայտարարության շուրջ ստեղծված իրավիճակին արձագանքում է այնպես, ինչպես 2018-ին․ ընթացիկ խնդիրների լուծումը հայ ժողովրդի գործն է, և վերջինիս փոխարեն ոչ ոք դրանք չի լուծի: Մյուս կողմից, հայկական փխրուն պետականությունն ի սկզբանե բոլորովին այլ մոտեցում էր պահանջում։ Եվ ոչ ադեկվատ մարդու՝ "փողոցից" իշխանության գալը  ոչ մի կերպ այն չի ամրացրել», - ընդգծել է նա ։

Փետրվարի 25-ին Հայաստանի Զինված ուժերի գլխավոր շտաբը հանդես է եկել Հայաստանի վարչապետի հրաժարականի պահանջով՝ երկրի քաղաքական ղեկավարությանը մեղադրելով «պետությանը վտանգավոր եզրին կանգնեցնելու մեջ»: Պահանջը հնչեցվել է գլխավոր շտաբի պետի առաջին տեղակալ, գեներալ-լեյտենանտ Տիրան Խաչատրյանի պաշտոնանկությունից հետո ։

Նրա գնահատմամբ, զինվորականների հայտարարությունը սպասելի էր։ Եվ այն, որ դրան հաջորդեց Փաշինյանի՝ վերջին պատերազմում կրած պարտության համար սեփական պատասխանատվությունը անմիջականորեն գլխավոր շտաբի ղեկավարության վրա դնելու փորձը, նույնպես սպասելի էր։ Արեշևը տեղի ունեցող և սաստկացող ներքաղաքական լարվածությունը և հասարակության նյարդայնությունը համարում է Փաշինյանի ՝ պատասխանատվությունից խուսափելու և ցանկացած եղանակով իշխանության ղեկին մնալու օրինաչափ արդյունքը:

 «Իսկանդերների» 10% - անոց արդյունավետության մասին ՀՀ վարչապետի հայտարարությունն Արեշևը լավագույն դեպքում գնահատում է որպես բացարձակ ոչ կոմպետենտ մարդու կողմից արտահայտված հիմարություն։  Նրա կարծիքով, վատագույն տարբերակը Փաշինյանի ՝ ռուսական սպառազինություններն անարդյունավետ ներկայացնելու դիտավորյալ փորձն է ՝ հայ-ռուսական ռազմաքաղաքական և ռազմատեխնիկական համագործակցության մեջ պառակտում մտցնելու նպատակով։

«Ասել, թե որքան կդիմանա Փաշինյանը, շատ դժվար է։  Ինձ համար մի բան ակնհայտ է. ամեն օր նրա իշխանությունը Հայաստանը դարձնում է ավելի թույլ, ավելի անկազմակերպ։  Այս փակուղուց դուրս գալու ուղիների որոնումը հեշտ չէ, բայց այն կա։   Ժամանակավոր, հնարավոր է ՝ ռազմական, կառավարության ձևավորման և որոշ ժամանակ անց արտահերթ ընտրությունների անցկացման այլընտրանքը պետության և պետականության հետագա թուլացումն է», - ամփոփել է ռուս քաղաքագետը։

Վարչապետ Նիկոլ Փաշինյանը փետրվարի 25-ին տեղի ունեցածը որակել է որպես հեղաշրջման փորձ ՝ քաղաքացիներին կոչ անելով հավաքվել Հանրապետության հրապարակում և պաշտպանել հեղափոխությունը:  Փաշինյանն արդեն ստորագրել է գլխավոր շտաբի պետ Օնիկ Գասպարյանի հրաժարականի մասին որոշումը, որը նախագահը դեռ չի ստորագրել: Դրանից հետո Հանրապետության հրապարակում տեղի ունեցավ հանրահավաք ՝ ի պաշտպանություն Փաշինյանի։  Զուգահեռաբար Ազատության հրապարակում տեղի ունեցավ գործող իշխանության հակառակորդների հանրահավաքը։