Արմինֆո. «Էյչ-Էս-Բի-Սի Բանկ Հայաստան» ՓԲԸ-ն (HSBC Հայաստան) և «Հայաստանի մանուկներ» բարեգործական հիմնադրամն (ՔՈԱՖ) առցանց ձևաչափով ամփոփեցին 2019-2021 ուսումնական տարիների կրթաթոշակների ծրագիրը, որի նպատակն է աշխատաշուկայում մրցունակ, գիտակ և մասնագիտական հմտություններ ունեցող կադրերի պատրաստումը։
Նշված տարիների համար ծրագրային ընդհանուր ֆոնդը կազմել է 13.1 միլիոն ՀՀ դրամ, որից 9.7 միլիոն ՀՀ դրամը տրամադրել է HSBC Հայաստանը: Կրթաթոշակ են ստացել 20 մարզաբնակ ուսանողներ (ընդհանուր առմամբ՝ 50 կրթաթոշակ), որոնցից 18-ն արդեն անցել են մասնագիտական պրակտիկա Հայաստանի լավագույն 10 կազմակերպություններում։
Երկու կազմակերպությունների վեցամյա համագործակցության արդյունքում ավելի քան 100 մարզաբնակ ուսանողների ընձեռվել է Հայաստանի պետական և մասնավոր բուհերում ու միջին մասնագիտական հաստատություններում ստացիոնար և հեռակա կրթություն ստանալու հնարավորություն։ Մինչ օրս ծրագրի արժեքը կազմել է ավելի քան 80․000 ԱՄՆ դոլար։
«Գյուղական համայնքների բնակիչներին, մասնավորապես երիտասարդներին, իրենց ողջ ներուժի բացահայտման ու կիրառման հնարավորությունների ընձեռումը ՔՈԱՖ-ի առաքելության առանցքում է, ուստի HSBC Հայաստանի հետ համատեղ իրականացվող այս ծրագիրը մեզ համար շատ կարևոր է․ պատահական չէ, որ արդեն 6 տարի շարունակ իրագործում ենք այն»,- ընդգծում է ՔՈԱՖ-ի գործադիր տնօրեն Կորյուն Խաչատուրյանը։
Ի լրումն ֆինանսական աջակցության՝ ՔՈԱՖ-ն ու HSBC Հայաստանն ուսանողների համար մշակել են կարիերայի զարգացման փաթեթ, որը ներառում է պրակտիկա, մենթորություն և աշխատունակության հմտությունների զարգացման դասընթացներ: HSBC Հայաստանի աշխատակիցները ծրագրի մենթորության բաղադրիչի շրջանակում հանդես են եկել նաև որպես կամավորներ:
«Մենք HSBC Հայաստանում քաջ գիտակցում ենք, որ կրթված և բանիմաց երիտասարդները հանդիսանում են երկրի տնտեսական և սոցիալական աճն ապահովող հիմնական ուժը: Հենց այս պատճառով արդեն իսկ 6 տարի է, ինչ ՔՈԱՖ-ի հետ համատեղ իրականացնում ենք կրթաթոշակների ծրագիրը` հնարավորություն ընձեռելով մարզաբնակ երիտասարդներին իրենց լուման ունենալ երկրի և մասնավորապես իրենց հարազատ համայնքների զարգացման և բարգավաճման գործում», - նշեց HSBC Հայաստանի գլխավոր գործադիր տնօրեն Իրինա Սեյլանյանը:
HSBC Խումբ
HSBC Holdings plc-ը՝ HSBC Խմբի ընկերության գլխամասը, գտնվում է Լոնդոնում: Խումբը ծառայություններ է տրամադրում 65 երկրներում և տարածաշրջաններում՝ Եվրոպայում, Ասիայում, Հյուսիսային և Լատինական Ամերիկայում, ինչպես նաև Մերձավոր Արևելքում և Հյուսիսային Աֆրիկայում: HSBC-ն հանդիսանում է աշխարհի ամենախոշոր և հզոր ֆինանսական կառույցներից մեկը, որի ակտիվները 2020թ. մարտի 31-ի դրությամբ կազմել են 2,918 միլիարդ ԱՄՆ դոլար:
HSBC Հայաստան
«Էյչ-Էս-Բի-Սի Բանկ Հայաստան» ՓԲԸ-ը հիմնադրվել է 1996թ-ին։ Բանկը համատեղ ձեռնարկություն է, որի
70%-ը պատկանում է HSBC Խմբին, իսկ 30%-ը` արտերկրի հայ գործարարի: Էյչ-Էս-Բի-Սի Հայաստանը սպասարկում է շուրջ 30 000 հաճախորդի Երևան քաղաքում գտնվող իր 8 գրասենյակների և մոտ 362 աշխատակիցների միջոցով: 2020թ.-ի մարտի 31-ի դրությամբ բանկի ակտիվները կազմել են 298 միլիարդ ՀՀ դրամ՝ ներառյալ Էյչ-Էս-Բի-Սի Բանկ Փի-Էլ-Սի Լոնդոնի կողմից Բանկի միջնորդությամբ տրամադրված վարկեր:
«Հայաստանի մանուկներ» բարեգործական հիմնադրամի մասին
«Հայաստանի մանուկներ» բարեգործական հիմնադրամը (ՔՈԱՖ) բարեգործական կազմակերպություն է, որի նպատակն է բարձրացնել Հայաստանի գյուղաբնակների կյանքի որակը համայնքային զարգացման երեխայակենտրոն ծրագրերի միջոցով: Հիմնադրամի համակողմանի ծրագրային մոդելի իրագործումը սկսվել է 2004 թ., և այդ ժամանակից ի վեր իրականացվում են կրթական, առողջապահական, սոցիալական և տնտեսական ծրագրեր, ինչպես նաև հիմնանորոգվում են համայնքների համար կենսական նշանակություն ունեցող ենթակառուցվածքները: Այս ծրագրերի շահառուներն են Հայաստանի Արմավիրի, Արագածոտնի, Լոռու, Գեղարքունիքի, Շիրակի և Տավուշի մարզերի 64 համայնքների ավելի քան 107,000 բնակիչները:
2015թ. սկսած՝ ՔՈԱՖ-ը մշակել և իրագործում է նոր տեսլական՝ ՍՄԱՐԹ նախաձեռնություն: ՍՄԱՐԹ-ը կրթության միջոցով առաջխաղացում է ապահովում գյուղական աշխարհի համար, ինչի արդյունքում շահում են անհատները, հասարակությունը և միջավայրը:
ՔՈԱՖ ՍՄԱՐԹ առաջին կենտրոնը տեղակայված է Լոռու մարզի Դեբետ գյուղում. բացումը կայացել է 2018 թ. մայիսի 27-ին: