Արմինֆո.Այսօր իր հոբելյանն է նշում ՀԽՍՀ ժողովրդական արտիստ, երգիչ, երգահան, մանկավարժ Ռուբեն Մաթևոսյանը: Ժողովրդական արտիստը դարձավ 80 տարեկան։
Մաթևոսյանի ծննդյան օրվա կապակցությամբ ՀՀ մշակույթի, գիտության, կրթության և սպորտի նախարարությունը տարածել է հետևյալ հաղորդագրությունը:
"Այսօր մեծանուն արվեստագետ, պրոֆեսոր, ՀԽՍՀ ժողովրդական արտիստ Ռուբեն Մաթևոսյանի 80-ամյակն է։ Անգնահատելի են սիրելի երգչի մեծ փորձն ու անմնացորդ նվիրումը հայ երգարվեստի զարգացման և հանրահռչակման գործում: Նրա անզուգական կատարումներն ու երգարվեստի նկատմամբ յուրօրինակ մոտեցումը տարիներ շարունակ նոր շունչ են հաղորդել հայկական ժողովրդական երգացանկին:
Ռուբեն Մաթևոսյանի կատարմամբ հնչող աշուղական, ժամանակակից հայ կոմպոզիտորների երգերն ու ռոմանսները բոլոր ժամանակներում հիացրել են սերունդներին և հարստացրել հոգևոր-մշակութային կյանքը: Նրա լավագույն կատարումներից են՝ «Հորովել», Շերամի «Պարտեզում վարդ էր բացված», «Դու իմ մուսան ես», Ջիվանու «Ձախորդ օրերը», Առնո Բաբաջանյանի «Չքնաղ երազ», Ալեքսեյ Հեքիմյանի «Բարի արագիլ» և այլն։ Լավագույն բարեմաղթանքներով շնորհավորում ենք պարոն Մաթևոսյանին և ցանկանում անսպառ ուժ ու եռանդ, ամուր առողջություն, ստեղծագործական փայլուն գաղափարների իրականացում":