Արմինֆո.Ռուսաստանը առանցքային դեր է խաղացել Լեռնային Ղարաբաղի ժողովրդի դեմ ավելի քան 6 շաբաթ տևած թուրք-ադրբեջանական ագրեսիայի կասեցման գործում ։
Այս մասին դեկտեմբերի 7 - ին Ռուսաստանի ԱԳ նախարար Սերգեյ Լավրովի հետ բանակցությունների ամփոփիչ մամուլի ասուլիսի ժամանակ հայտարարել է Հայաստանի արտգործնախարար Արա Այվազյանը։ Այս համատեքստում նա հիշեցրել է, որ ՌԴ նախագահ Վլադիմիր Պուտինի անձնական միջնորդությամբ հնարավոր է դարձել նոյեմբերի 9-ին համատեղ եռակողմ հայտարարության համաձայնեցում եւ ստորագրում, որը թույլ է տվել դադարեցնել կրակը տեղերում եւ տեղակայել ռուսական խաղաղապահ զորակազմ Լեռնային Ղարաբաղում:
Ընդ որում Այվազյանը գտնում է, որ ռուս խաղաղապահների ներկայությունը պայմաններ է ստեղծում տարածաշրջանում կայունության եւ հանգստության վերականգնման համար, ինչպես նաեւ Ադրբեջանի, նրա տարածաշրջանային հովանավորի եւ նրանց կողմից հավաքագրված օտարերկրյա զինյալ ահաբեկիչների կողմից սադրանքներ թույլ չտալու երաշխիք է: Միեւնույն ժամանակ, ՀՀ ԱԳՆ ղեկավարը գտնում է, որ ռազմական գործողությունների դադարեցումը հնարավորություններ է բացում ԵԱՀԿ Մինսկի խմբի շրջանակներում խաղաղ գործընթացի վերականգնման շուրջ քննարկումները վերսկսելու համար:
"Մենք քննարկել ենք նաեւ Լեռնային Ղարաբաղի ծայրահեղ ծանր հումանիտար իրավիճակով պայմանավորված հարցերի բլոկը, որը ստեղծվել է Ադրբեջանի զինված ուժերի կողմից խաղաղ բնակավայրերի եւ քաղաքացիական ենթակառուցվածքների կարեւոր օբյեկտների նպատակաուղղված եւ մեթոդական գնդակոծությունների արդյունքում: Մենք երախտապարտ ենք Ռուսաստանին ՝ մարդասիրական հարցերի արագ և արդյունավետ լուծման համար", - ասել է հայ նախարարը՝ այս համատեքստում կարևորելով միջազգային մասնագիտացված կազմակերպությունների ներգրավումը մարդասիրական հարցերի լուծման համար։
Նա նշել է գերիների եւ ռազմագերիների, զոհված զինծառայողների մարմինների փոխանակման, ինչպես նաեւ անհայտ կորածների որոնման առաջնահերթությունը՝ նշելով այդ հարցի անհապաղ լուծման անհրաժեշտությունը: Հիշեցնելով, որ Հայաստանը պատրաստ է փոխանակել "բոլորին բոլորի դիմաց" սկզբունքով, Այվազյանը հույս է հայտնել, որ ադրբեջանական կողմից գործընթացը ձախողելու փորձեր չեն լինի: Նա նաեւ մատնանշել է Ադրբեջանի անմարդկային վերաբերմունքը ռազմագերիների եւ քաղաքացիական անձանց նկատմամբ: "Մեր ռազմագերիներն ու խաղաղ բնակիչները, որոնք չեն հասցրել լքել իրենց տները, ենթարկվում են դաժան կտտանքների եւ գլխատվում են ուղիղ նույն կերպ, ինչպես Մերձավոր Արեւելքում ԻՊ-ը վարվում էր պատանդների հետ ։ Վանդալիզմի եւ սրբապղծության վրդովեցուցիչ դրսեւորում է նկատվում Արցախում հայկական հուշարձանների եւ կրոնական օբյեկտների, եկեղեցիների եւ տաճարների նկատմամբ", - ասել է Հայաստանի գլխավոր դիվանագետը, միաժամանակ մատնանշելով ադրբեջանական հասարակության մեջ հայատյացության նոր ալիքի պոռթկումը, որը տասնամյակներ շարունակ սերմանվել է Ադրբեջանի ղեկավարության կողմից:
Դրա հետ մեկտեղ, նա արձանագրել է, որ ըստ էության, Թուրքիան, որը Ղարաբաղում պատերազմի հիմնական հրահրողն է, այսօր էլ շարունակում է իրականացնել տարածաշրջանի համար կործանարար քաղաքականություն, ինչը ստիպում է միջազգային հանրությանը կիրառել բոլոր հնարավոր լծակները, որպեսզի ստիպի Անկարային ձեռնպահ մնալ ցանկացած գործողությունից, որը կարող է էլ ավելի սրել լարվածությունը: Այվազյանն ընդգծել է, որ Թուրքիան պետք է դուրս բերի իր զինված անձնակազմը եւ նրա հետ փոխկապակցված խմբավորումները Լեռնային Ղարաբաղի հակամարտության գոտուց եւ, ընդհանուր առմամբ, Հարավային Կովկասից: Այս առնչությամբ հայ նախարարն արձանագրել է, որ դեռեւս հստակ ազդանշաններ չկան տարածաշրջանից օտարերկրյա ահաբեկիչ գրոհայինների դուրսբերման մասին, մինչդեռ հավաստի տեղեկություններ կան Արցախի օկուպացված տարածքները զինյալ վարձկաններով բնակեցնելու Ադրբեջանի մտադրության մասին: Միաժամանակ, Այվազյանը կարևորել է Արցախի 150 հազար բնակչության բոլոր իրավունքների վերականգնումը։ "Լեռնային Ղարաբաղի հակամարտության կարգավորման համատեքստում կցանկանայի շատ հստակ նշել, որ հակամարտության կարգավորման հիմքում ընկած է Արցախի ժողովրդի ինքնորոշման սկզբունքը։ Հայաստանը հանդես է եկել և
շարունակում է հանդես գալ Արցախի ժողովրդի ինքնորոշման իրավունքի
եւ անվտանգության դիրքերից: Հակամարտության երկարաժամկետ և ամուր կարգավորման
պետք է հասնել բանակցությունների ճանապարհով ՝ ԵԱՀԿ Մինսկի խմբի հովանու ներքո ", -
ամփոփել է Այվազյանը։