Ռուսաստանը Հայաստանին շարժական լաբորատոր համալիր է  փոխանցել

Արմինֆո. Ռուսաստանի Դաշնության պատվիրակության Հայաստան կատարած այցի ընթացքում "Ռոսպոտրեբնադզորի" ղեկավար Աննա Պոպովան հայկական կողմին է փոխանցել մանրէաբանական եւ ինդիկացիոն լաբորատորիաներից կազմված շարժական համալիր:

Ինչպես հաղորդում Է "Ռոսպոտրեբնադզորի" մամուլի ծառայությունը, Աննա Պոպովան ընդգծել է, որ նոր կորոնավիրուսային վարակի համաճարակի այսօրվա պայմաններում համատեղ աշխատանքը առավել քան երբեւէ արդիական է: "Վերջին 5 տարիների ընթացքում ավելի քան 120 մասնագետներ վերապատրաստման դասընթացներ են անցել Ռոսպոտրեբնադզորի գիտական կազմակերպություններում։ Այսօր Հայաստանում ակտիվորեն կիրառվում են 3 շարժական լաբորատորիաներ և 3 շարժական կլինիկաներ, որոնք փոխանցվել են Ռոսպոտրեբնադզորին ԱՀԿ միջազգային առողջապահական կանոնների ներդրման և ՄԻԱՎ/ՁԻԱՀ-ի դեմ պայքարի ծրագրերի շրջանակներում: Նման համալիրներ, որոնք մշակվել են "Ռոսպոտրեբնադզորի" կողմից, այսօր կիրառվում են ոչ միայն Ռուսաստանում, այլեւ Արեւելյան Եվրոպայի, Կենտրոնական Ասիայի 9 երկրներում, ինչպես նաեւ Գվինեայի Հանրապետությունում, Կոնգոյի Դեմոկրատական Հանրապետությունում  եւ Վիետնամում: Դրանք բազմիցս օգտագործվել են սանիտարական-համաճարակաբանական բարեկեցության ոլորտում արտակարգ իրավիճակների կանխման եւ վերացման համար ինչպես Ռուսաստանի Դաշնության տարածքում, այնպես էլ նրա սահմաններից դուրս վարակիչ հիվանդությունների բռնկումների օջախներում աշխատելիս, ինչպես նաեւ կարեւոր զանգվածային միջոցառումների անցկացման եւ հետազոտությունների մեծ ծավալներով տարածաշրջանների լաբորատոր բազայի ուժեղացման համար: Համալիրն ունի շարժունակություն, գործունեության ինքնավարություն և կենսաբանական անվտանգության բարձր մակարդակ, անձնակազմի աշխատանքի համար հարմարավետ պայմաններ։ Շարժական լաբորատորիայի ինդիկացիայի հզորությունը կազմում է օրական մինչեւ 1600 նմուշ: Մանրէաբանական շարժական լաբորատորիան թույլ է տալիս կատարել պաթոգենության III-IV խմբի վարակիչ հիվանդությունների հարուցիչների առկայության 300 փորձանմուշների հետազոտություն:

Բացի այդ, մանրէաբանական լաբորատորիան կարող է իրականացնել ՊՇՌ-ախտորոշում, ինչը հատկապես արդիական է COVID-19 համաճարակի շրջանում: Աննա Պոպովան վստահություն է հայտնել, որ շարժական համալիրը կամրապնդի վարակիչ հիվանդություններին արձագանքելու Հայաստանի հնարավորությունները եւ կնպաստի երկրում եւ եվրասիական տարածաշրջանում ընդհանուր առմամբ սանիտարահամաճարակային բարեկեցության բարձր մակարդակի պահպանմանը",-նշվում է գերատեսչության հաղորդագրության մեջ: