Ալիև․ Մենք դեմ ենք հակամարտությանը երրորդ երկրների մասնակցությանը

Արմինֆո.Ադրբեջանի նախագահ Իլհամ Ալիեւը երրորդ երկրներին կոչ է արել հրաժարվել Լեռնային Ղարաբաղի հակամարտության մեջ ներգրավվելու ցանկացած ձեւից:

<Մենք դեմ ենք հակամարտությանը երրորդ երկրների մասնակցությանը։ Բոլոր սահմանակից երկրները մեր գործընկերներն ու բարեկամներն են>, - ասել Է Ալիեւը գերմանական ARD հեռուստաալիքին տված հարցազրույցում ։ Ընդ որում, Ադրբեջանի ղեկավարը, չգիտես ինչու, մոռացել է ասել, որ ինքը ռազմական ագրեսիայի հենց սկզբից օգտվել է <մեծ եղբոր>՝ Թուրքիայի օգնությունից, իսկ վերջինս Արցախի խաղաղ բնակչության դեմ կռվում  ներգրավել է Մերձավոր Արևելքից վարձկանների ։

Ընդ որում, նա հերթական անգամ ցինիկաբար հայտարարել է, որ Ադրբեջանը բանակցային գործընթացում միշտ հանդես է եկել հակամարտության խաղաղ կարգավորման օգտին, որը ենթադրում է <հայկական ստորաբաժանումների փուլային դուրսբերում>:

<Սակայն, Երևանը դեմ էր նախաձեռնությունների իրականացմանը։ Դա կարող են հաստատել նաև ԵԱՀԿ Մինսկի խմբի համանախագահները։ Կարգավորման հիմնական սկզբունքների համաձայն, Ադրբեջանը պետք է վերադարձներ վերահսկողությունը Լեռնային Ղարաբաղի շուրջ հինգ շրջանների, իսկ հետո եւս երկու շրջանների նկատմամբ>, - ասել Է Ալիեւը հերթական անգամ փորձելով կեղծել պատմությունը՝ վստահեցնելով, որ հայերը երբեք չեն ապրել այդ տարածքներում:

Ամփոփելով ՝ Ալիեւը վստահեցրել է, որ բանակցությունների սեղանի շուրջ հայկական ղեկավարության ռազմավարությունը  <երկխոսությունը մինչեւ անվերջություն ձգձգելու նպատակ ուներ>:

Այսօր ՀՀ վարչապետ Նիկոլ Փաշինյանը դիմել է ՌԴ նախագահին սկսելու անհապաղ խորհրդակցություններ՝ սահմանելու աջակցության տեսակները և չափը, որը Ռուսաստանի Դաշնությունը կարող է հատկացնել Հայաստանի Հանրապետությանը՝ իր անվտանգության ապահովման համար՝ հիմք ընդունելով Հայաստանի և Ռուսաստանի միջև դաշնակցային հարաբերությունները և  1997թ. օգոստոսի 29-ի «Բարեկամության, համագործակցության և փոխադարձ աջակցության մասին» պայմանագրի 2-րդ հոդվածը։

 ՌԴ ԱԳՆ-ն արձագանքել է Հայաստանի այս կոչին ՝ ընդգծելով, որ Ռուսաստանը Երևանին կտրամադրի անհրաժեշտ օժանդակություն, եթե բախումները տեղափոխվեն անմիջապես Հայաստանի տարածք։