Շաբաթ, 15 Օգոստոսի 2020 13:30

Արմինֆո. «Լիդիան Արմենիա» ընկերությունը հանդես է եկել հերթական հայտարարությամբ, որում մատնանշել է այն պնդումների անհեթեթությունը, թե Ամուլսարի հանքում ուրանի վտանգ կա:

 

«Տևական ժամանակ է Ամուլսարի շուրջ միտումնավոր կեղծիքի տարածման վրա մասնագիտացած որոշ շրջանակներ, այլ անհեթեթություններին ավելացրել էին այն թեզը, թե իբրև Ամուլսարի հանքավայրում ուրանի հետ կապված վտանգ կա` հղում անելով խորհրդային տարիներին (1952-54թթ.) արված «Գրոմովյան»

հետազոտությանը:

 

Ս.թ. օգոստոսի 14-ին Միջուկային անվտանգության կարգավորման պետական կոմիտեն, հիմնվելով «Գրոմովյան» հաշվետվության, Ամուլսարի ծրագրի ՇՄԱԳ հաշվետվության, շուրջ 50 000 հորատանմուշների, ինչպես նաև առավել հետաքրքրություն ներկայացնող փորձանմուշների կրկնակի ստուգողական ուսումնասիրության լաբորատոր արդյունքների և դաշտային չափումների վրա, Շրջակա միջավայրի նախարարությանն  է տրամադրել ստուգողական հետազոտության արդյունքերը (պատճենը` «Լիդիան Արմենիային»): Արդյունքները ապացուցում են «Լիդիանի» իրավացիությունը նաև այս հարցում։ Մասնավորապես ըստ հետազոտության արդյունքների`

 

  - «Գրոմովյան» հաշվետվության մեջ նշված տարածքը դուրս է Ամուլսարի հանքավայրի տարածքից,

- «Լիդիան Արմենիայի» կողմից իրականացված հետազոտական աշխատանքները բավարար են ՇՄԱԳ և ԲՍԱԳ փաստաթղթերի կազմման համար,

- ՇՄԱԳ և ԲՍԱԳ փաստաթղթերի համապատասխան բաժինները բավարարում են ՀՀ Ճառագայթային անվտանգության նորմերին և կանոններին, ինչպես նաև Ատոմային Էներգիայի Միջազգային Գործակալության (ՄԱԳԱՏԷ) անվտանգության ստանդարտների պահանջներին,

- Ճառագայթային անվտանգության մասով ՇՄԱԳ և ԲՍԱԳ փաստաթղթերի վերանայման անհրաժեշտություն չկա։

 

«Լիդիանը» բազմիցս ապացույցներ էր ներկայացրել առ այն, որ ուրանի վտանգի մասին պնդումները հերթական կեղծիքն են, և, որ Ամուլսարի Շրջակա միջավայրի ազդեցության գնահատումը ապացուցում է, որ բոլոր հետազոտությունները արվել են պատշաճ, ո'չ ճառագայթման, ո'չ ուրանի վտանգ Ամուլսարում չկա:

 

Այսպիսով, հույս ունենք, որ Ամուլսարի շուրջ այս հերթական կեղծիքի էջը կարելի է համարել փակված՝ անառարկելի գիտական հիմնավորմամբ», - ասվում է ընկերության տարածած հաղորդագրությունում:

 

Ամուլսարի նախագծի ընդհանուր արժեքը կազմում է 370 մլն դոլար: Հանքավայրի շահագործման ժամկետը կազմում է 10 տարի եւ 4 ամիս, ընդ որում, տարեկան կտրվածքով նախատեսվում է արդյունահանել միջինը 200 հազար ունցիա ոսկի: Հավելենք, որ «Լիդիան Արմենիան» բրիտանական օֆշորային Lydian International-ի դուստր ձեռնարկությունն է: Բնապահպաններն ու շարքային քաղաքացիները մտահոգված են, որ հանքի շահագործումը կարող է հանգեցնել Սեւանա լճի եւ Ջերմուկի եւ հանքային ստորերկրյա ջրերի աղտոտմանը: Բացի ջրային ավազանից, հանրության մտահոգությունն է առաջացնում նաև հանքավայրում ուրանի երեւակումների հնարավոր առկայությունը։ Բնապահպաններն ու ակտիվիստները պահանջում են անվավեր ճանաչել նախագծի ՇՄԱԳ-ի վերաբերյալ դրական եզրակացությունը, քանի որ այն ընդունվել է օրենսդրական խախտումներով, իսկ փաստաթղթում առկա են խնդիրներ և թերություններ: Օգոստոսի 12-ին Վերակառուցման եւ զարգացման եվրոպական բանկը (EBRD) հայտարարել է Ամուլսարի հանքավայրի շահագործման նախագծին իր մասնակցության ավարտի մասին: Այս տարվա սկզբին Lydian International-ը, որը հայտնվել էր ֆինանսական ծանր դրության մեջ, հայտարարեց վերակազմավորման մասին եւ անցավ Տորոնտոյի ֆոնդային բորսայում ապացուցակման ըննթացակարգ: Վերակառուցման եւ զարգացման եվրոպական բանկն ի սկզբանե մասնակցել է Ջերսիում գրանցված օֆշորային Lydian International ընկերության կապիտալին ՝ միջազգային ֆինանսական կորպորացիայի (IFC) հետ միասին, որը նախագծից դուրս է եկել դեռեւս 2 տարի առաջ: Այդ միջազգային դոնոր գործընկերների մասնակցությունը օֆշորային ընկերությանը թույլ տվեց դուրս գալ Կանադայի բորսայական շուկա և ներգրավել ինստիտուցիոնալ ներդրողների լրացուցիչ ներդրումներ ՝ ի դեմս ներդրումային և կենսաթոշակային հիմնադրամների։ Այսօրվա դրությամբ հիմնական վարկատուներն են Orion Resource Partners-ը, Osisko Mining-ը եւ Resource Capital-ը: Բանկի պատասխանատու աշխատակից Ֆիդանկա Մաքգրատը նշում է, որ Ամուլսարի հանքավայրի շուրջ ընթացող իրադարձությունները զգալիորեն վնասում են ՎԶԵԲ-ի հեղինակութթյանը, նույնիսկ, այն բանից հետո, երբ "Lydian International"-ում ՎԶԵԲ-ի բաժնետոմսերի փաթեթը վերացվի: