Դրամաշնորհային ծրագրի հաղթողները իրենց բիզնես նախագծերը կիրականացնեն Գյումրիում

Արմինֆո.  Չորս գյումրեցիներ իրենց ստեղծարար բիզնես–նախագծերը կիրականացնեն Գյումրու Տիգրան Մեծ պողոտայում՝ դարձնելով այն ավելի գրավիչ տեղացիների և այցելուների համար։

Նախագծերն իրականացվում են «Բաց Գյումրի» նախաձեռնության և ԱՄՆ պետքարտուղարության Շրջանավարտների ներգրավվածության նորարարական հիմնադրամի (AEIF) 2019-2020 դրամաշնորհային ծրագրի աջակցությամբ։  Վերջինիս նպատակն է նպաստել Գյումրիում Տիգրան Մեծ պողոտայի համայնքում փոքր և միջին բիզնեսների ստեղծմանը։

Հաղթող նախագծերի իրականացման արդյունքում Գյումրին կունենա «Ֆրանգուլյան» ֆոտո արհեստանոց, Kristina G Zayimtsyan Boutique նորաձևության տուն, ինչպես նաև ձեռքի աշխատանքի յուրահատուկ գործեր, որոնք կներկայացնեն Rashani and Jevo Art Studio-gallery–ն և Թաղիաքործության արվեստանոցը։ Նախագծի չորս հաղթողներից մեկի Հովհաննես Ֆրանգուլյանի հիմնադրվելիք «Ֆրանգուլյան» ֆոտոարհեստանոցի նպատակն է նպաստել Գյումրի քաղաքի հին մշակույթի տարածմանը և գրավել արտերկյա զբոսաշրջիկների հետաքրքրությունը։ Ֆոտոարհեստանոցը սպասարկելու է Գյումրի այցելող զբոսաշրջիկներին` նրանց լուսանկարելով հին ալեքպոլյան հագուստով քաղաքի ամենահայտնի մշակութային միջավայրերում։

Քրիստինա Զայիմցյանի նորաձևության տունը ուղղված կլինի կանանց և երիտասարդության համար նորաձև և ոճային հագուստի կարի գործունեությանը։ Արտադրանքը լինելու է ձեռքի աշխատանք` բաղկացած հեղինակային արտադրած կտորներից և բրենդից։

Rashani and Jevo Art Studio-gallery կներկայացնի Անի Ռաշոյանի ձեռքի աշխատանքները`զարդեր, նկարներ, կերամիկա: Աշխատանքները պատրաստված են բնական քարերից, մրգերի կորիզներից, փայտից, ակրիլից, յուղաներկից և այլ նյութերից։

Թաղիաքործության արվեստանոցը նվիրված կլինի բրդյա զանազան ապրանքների պատրաստմանը` բրդյա պայուսակներ, հողաթափեր, բաճկոններ, վերարկուներ, շարֆեր, հուշանվերներ և այլ տեսակի բրդյա իրեր։  Արվեստանոցը կգործի նաև որպես թաղիքի պատրաստման, ուսուցման և վաճառքի վայր։

Դրամաշնորհային ծրագիրը  մեկնարկել է 2019 թ.–ի նոյեմբերին`շարունակվելով մինչև 2020 թ.–ի ապրիլը։ Այս ընթացքում շուրջ 30 մասնակիցներ հաճախել են ստեղծարարական ոլորտում ձեռներեցության զարգացման ուսուցաղական դասընթացների և ոլորտի առաջատար փորձագետների խորհրդատվությունների շնորհիվ  ձեռք բերել անհրաժեշտ գիտելիքներ և հմտություններ ձեռներեցության առաջխաղացման և հաղորդակցության ոլորտներում։

Ութ մասնակիցները դասընթացների ավարտին ներկայացրել են իրենց բիզնես նախագծերը մասնագիտական ժյուրիի անդամներին։ Մրցույթի արդյունքում հաղթող չորս մասնակիցներից երեքը ստացել է յուրաքանչյուրը 1 000 ԱՄՆ դոլար մրցանակ, իսկ չորրորդ հորիզոնականը զբաղեցրած մասնակիցը՝ 868 ԱՄՆ դոլար: