Արմինֆո. Երկրում արտակարգ դրության ռեժիմը, ամենայն հավանականությամբ, կերկարաձգվի եւս մեկ անգամ։ Այդ մասին այսօր ճեպազրույցում հայտարարել է վարչապետ Նիկոլ Փաշինյանը։
Նրա խոսքով, անշուշտ, արտակարգ դրության ռեժիմը չի կարող անվերջ երկարաձգվել, իշխանությունները դա հասկանում են, բայց այսօրվա պայմաններում, այն ցուցանիշների դեպքում, որոնք գրանցվում են երկրում, այլ ելք չկա: Ընդ որում, նա խոստացել է համալիր մոտենալ այդ հարցին։
Այս համատեքստում նա արձանագրել է, որ Հայաստանում կորոնավիրուսի համավարակին առնչվող իրավիճակը շարունակում է ծանր մնալ, առողջապահական համակարգն աշխատում է ծանրաբեռնված վիճակում, և միայն հանգստյան օրերին գրանցվել է շուրջ 1000 նոր հիվանդ:
Ընդ որում, նա արձանագրել է, որ իրավիճակը ծանր է ոչ միայն Հայաստանում է, այլ նման պատկեր է ստեղծվում ողջ աշխարհում, որտեղից տեղեկություններ են ստացվում ճգնաժամի նոր ալիքի մասին:
Փաշինյանը ևս մեկ անգամ կրկնել է, որ համավարակի հաղթահարումը հնարավոր է միայն արմատապես փոխելով քաղաքացիների անհատական վարքագիծը, և միայն վարչական մեթոդներով հնարավոր չէ հասնել արդյունավետության։ Հիշեցնելով, որ երկրում արդեն 491 մարդ կորոնավիրուսի զոհ Է դարձել, նա կրկին քաղաքացիներին կոչ է արել պահպանել հակահամաճարակային միջոցները:
Կառավարության ղեկավարը նաեւ արձանագրել է, որ իշխանություններն ունեն մարտավարական կարմիր գիծ, որն անցնելով, ստիպված կլինեն վերադառնալ խիստ սահմանափակիչ միջոցների: "Հենց որ մենք զգանք, որ առողջապահության համակարգը չի կարողանում հաղթահարել, մենք կվերադառնանք սահմանափակումներին, եւ դրանք ավելի կոշտ կլինեն, քան նախկինում, եւ, անշուշտ, դրանք վնաս կհասցնեն նաեւ մեր տնտեսությանը, ինչը ցանկալի չէ։ Այս կապակցությամբ կոչ եմ անում մեր քաղաքացիներին լինել ավելի պատասխանատու եւ պահպանել պաշտպանության միջոցները", - ասել է Փաշինյանը։
Անդրադառնալով հարցին, թե ով է պատասխանատվություն կրելու արտակարգ դրության ռեժիմի ժամանակ թույլ տրված սխալների համար, Վարչապետն արձանագրել է, որ այդ հարցը հաճախ հնչեցվողներից մեկն է։ Սակայն, նրա համոզմամբ, դեռ վաղ է մեղավորներ փնտրել եւ եզրակացություններ անել, քանի որ հասկանալի է դարձել, որ մինչեւ տարեվերջ վարակի դեմ պատվաստանյութ չի լինի, եւ, ամենայն հավանականությամբ, բոլոր պետություններում ցուցանիշները մոտավորապես նույն մակարդակի կլինեն:
Փաշինյանը հիշեցրել է, որ Հայաստանը հրաժարվել է լոքդաունից, երբ երկրում գրանցվում էր մինչեւ 100 նոր վարակակիր, եւ երբ պարզ դարձավ, որ միայն ապրիլին երկրում փակվել է 72 հազար աշխատատեղ: Նրա խոսքով, եթե իշխանությունները չգնային այդ քայլին, ապա գործազրկությունն ավելի կմեծանար՝ ցավագին հարվածելով քաղաքացիների բարեկեցությանը:
Դրա հետ մեկտեղ, նա արձանագրել է, որ, անշուշտ, կան երկրներ, որոնք որոշել են իրենց վարակակիրների ցուցանիշները զրոյի հասցնել, եւ միայն հետո գործարկել տնտեսությունը, սակայն այժմ նրանք չեն կարողանում լիարժեք գործարկել տնտեսությունը: Որպես օրինակ նա նշել է Իսպանիան, որը հուլիսի 1-ից նախատեսում էր լիովին վերսկսել զբոսաշրջային սեզոնը, սակայն ստիպված էր հրաժարվել այդ նախաձեռնությունից։
Ընդ որում, նա հավելել է, որ Հայաստանում առաջին լոքդաունը թույլ է տվել երեք անգամ ավելացնել առողջապահական համակարգի հնարավորությունները եւ դիմակայել համավարակին:
ՀՀ վարչապետը նաև շնորհակալություն է հայտնել Կարմիր խաչին՝ Երևանում դիմակներ բաժանելու բարեգործական նախաձեռնության համար:
Հիշեցնենք, որ երկրում արտակարգ դրության ռեժիմը սահմանվել էր մարտի 16-ին եւ երեք անգամ երկարաձգվել է, վերջին անգամ՝ հունիսի 13-ին: