Արմինֆո.Անկախ իր արդյունքից՝ "Իմ քայլի" և "Բարգավաճ Հայաստանի" միջև քաղաքական բախումը հազիվ թե ի զորու լինի մոտ ապագայում էապես ամրապնդել ներգրավված կողմերի դիրքերը։ ԱրմԻնֆո-ին այդպիսի կարծիք է հայտնել Արցախի ԱԳՆ նախկին ղեկավար, արտակարգ եւ լիազոր դեսպան Արման Մելիքյանը:
Հունիսի 16-ին 87 կողմ ձայնով "Իմ քայլը" դաշինքը ԲՀԿ նախագահ Գագիկ Ծառուկյանին զրկեց պատգամավորական անձեռնմխելիությունից ՝ թույլ տաաալով նրա նկատմամբ քրեական հետապնդումը։ Քիչ անց Ազգային ժողովը գաղտնի քվեարկությամբ կողմ քվեարկեց Ծառուկյանին ազատությունից զրկելու ՀՀ գլխավոր դատախազ Արտակ Դավթյանի ներկայացրած միջնորդության բավարարմանը,: Ծառուկյանի կուսակցությունն ու" Լուսավոր Հայաստանը " գաղտնի քվեարկությանը չեն մասնակցել։ ԱԺ կանոնակարգի համաձայն, պատգամավորին կարելի է զրկել անձեռնմխելիությունից՝ միջնորդությանն առնվազն 67 գործընկերի աջակցության դեպքում:
"Իմ կարծիքով ՝ Գագիկ Ծառուկյանի պարագայում 2015-ի սցենարի կրկնության մասին խոսելը վաղաժամ է։ 2015-ին հանգուցալուծումը բավականին արագ եղավ։ Պարոն Սերժ Սարգսյանը ՀՀԿ-ի նիստում հստակ նկարագրեց, թե կոնկրետ ինչով է իրեն անձամբ պարտական պարոն Ծառուկյանը, ինչից հետո նրա հետ ունիսոնի մեջ հնչեցին կուսակիցների ձայները։ Ծառուկյանը "բարգավաճողների" հետ լուռ եւ, գլխավորը, առանց ֆինանսական կորուստների հետ քաշվեցին նախկին դիրքերը։ Այդպիսով ընդդիմադիր ուժերի կոնսոլիդացիայի գործընթացն ամբողջությամբ տապալվեց։ Նման սցենարի իրագործումն այսօր քիչ հավանական եմ համարում", - ընդգծել է նա։
Մելիքյանի կանխատեսմամբ՝ գործող կառավարության հակառակորդ տարբեր ուժեր լիովին ի վիճակի են օգտագործել իշխանությանն ու վարչապետ Փաշինյանին անձամբ քաղաքական վերջնագիր ներկայացնելու և այլ պատրվակներ։ Սակայն, նրա կարծիքով, այսօր այդ բոլոր ուժերը զանգվածներ փողոց դուրս բերելու ներուժ չունեն։ Եվ նման պայմաններում կառավարության հեռանալուն կարող են ապավինել բացառապես դավադրության միջոցով։
"Կարող եմ կանխատեսել, որ այս դիմակայության մասնակիցները կփորձեն միմյանց նկատմամբ կիրառել իրենց տրամադրության տակ եղած ողջ զինանոցը։ Կկոշտանա նաև հռետորաբանությունը, փոխադարձ մեղադրանքները։ Իհարկե, իշխանությունն առնվազն նյութատեխնիկական առավելություն ունի ընդդիմության նկատմամբ։ ԱԱԾ և Ոստիկանության ղեկավարության փոփոխությունը ես դիտարկում եմ հենց այս համատեքստում", - ամփոփել է Մելիքյանը։