Արմինֆո. ՀՀ-ում ԱՄՆ դեսպանությունը Հայաստանին շնորհավորում է Կրոնական ազատության միջազգային դաշինքին միանալու առիթով։
Դեսպանատան մամուլի ծառայության տարածած հաղորդագրությունում, մասնավորապես, ասվում է. «Հայաստանը մեկն է այն քսանինը երկրներից, որոնք միացել են 2020թ. փետրվարին ձևավորված Կրոնական ազատության միջազգային դաշինքին, որը նպատակ ունի պետական մակարդակով համակարգելու բոլորի կրոնի և դավանանքի ազատությունը պաշտպանելուն միտված ջանքերը։ Հետամուտ լինելով Մարդու իրավունքների համընդհանուր հռչակագրի 18-րդ կետի պահանջներին՝ դաշինքի անդամ պետությունները հանդես են գալիս բոլորի կրոնի ու դավանանքի ազատության պաշտպանության դիրքերից։ Սա նշանակում է, որ յուրաքանչյուր ոք ինքն է որոշում իր վերաբերմունքը կրոնի նկատմամբ, իրավունք ունի դավանելու ցանկացած կրոն կամ չդավանելու ոչ մի կրոն, ինքնուրույն կամ այլ քաղաքացիների հետ համատեղ կատարելու կրոնական ծեսեր»:
Ինչպես հունիսի 13-ին հաղորդել Էր Հայաստանի ԱԳՆ-ն, Հայաստանը միացել է 2020թ. փետրվարին ձևավորված Կրոնական ազատության միջազգային դաշինքին, որի կազմում ներառված են 29 երկրներ: «Որպես մարդու իրավունքների ջատագով՝ Հայաստանը մեծապես կարևորում է կրոնի ազատությունը՝ որպես մարդու անօտարելի իրավունք: Միանալով այս դաշինքին՝ Հայաստանը վերահաստատում է իր հանձնառությունը՝ կրոնական խմբերի հանդեպ հանդուրժողականության ամրապնդման և կրոնական հիմքով պայմանավորված ոտնձգությունների կանխարգելման ուղղությամբ գործադրվող համատեղ ջանքերին», - ասվում է ԱԳՆ հաղորդագրությունում: