Արմինֆո. Ամերիկայի Հայ դատի հանձնախումբը (ANCA) նամակով դիմել է ԱՄՆ պետքարտուղարին, պաշտպանության նախարարին եւ ԵԱՀԿ ՄԽ համանախագահներին՝ մայիսի 18-ից 22-ը Ադրբեջանի կողմից իրականացվող հարձակողական զորավարժությունների կապակցությամբ:
Ինչպես ասվում է կազմակերպության այսօրվա հաղորդագրության մեջ, կոմիտեին սատարած կոնգրեսականներն անթույլատրելի են համարում Ադրբեջանի կողմից կորոնավիրուսի գլոբալ համավարակի օգտագործումը որպես այդ վտանգավոր ռազմական գործողությունների քողարկում: "Բաքվի անխոհեմ գործողությունները գլոբալ համավարակի պայմաններում կարող են ապակայունացնել Կովկասը", ասվում է հաղորդագրությունու:
"Մենք ցանկանում ենք երախտագիտություն հայտնել կոնգրեսական Փալոնեին եւ բոլոր նրանց, ովքեր միացել են նրան, որպեսզի զգուշացնեն վարչակազմին եւ միջազգային հանրությանը Ադրբեջանի անխոհեմ գործողությունների մասին, որոնք սպառնում են տարածաշրջանային պատերազմի վերսկսմանը գլոբալ համավարակի պայմաններում", - ասել է ANCA-ի կառավարական հարցերի գծով տնօրեն Թերեզա Երիմյանը:
Երկու առանձին նամակներում՝ առաջին պետքարտուղար Պոմպեոյին եւ պաշտպանության նախարար Էսպերին, իսկ երկրորդը՝ ԵԱՀԿ Մինսկի խմբի համանախագահների, ասվում է, որ այդ զորավարժությունները վտանգավոր են, խախտում են դիվանագիտական համաձայնագրերը եւ կարող են ապակայունացնել Հարավային Կովկասի անվտանգությունն այն ժամանակ, երբ COVID-19 համաշխարհային համավարակը հարյուր հազարավոր կյանքեր խլեց եւ վտանգեց շատերի առողջությունը: Նամակներում ԱՄՆ վարչակազմին եւ ԵԱՀԿ Մինսկի խմբի համանախագահներին կոչ է արվում հրապարակայնորեն դատապարտել Ադրբեջանի զորավարժությունները:
Նամակները ստորագրել են Ներկայացուցիչների պալատի անդամներ Ֆրենկ Փալոնեն, Ջեքի Սփեյերը, Գուս Բիլիրակիսը, Ադամ Շիֆը, Ջուդի Չուն, Քեթրին Քլարկը եւ այլ կոնգրեսականներ:
Պետքարտուղար Պոմպեոյին եւ պաշտպանության նախարար Էսպերին ուղղված նամակում հատուկ մտահոգություն է հայտնվել Ադրբեջանի անվտանգության ոլորտին ԱՄՆ կողմից 100 մլն դոլար հատկացնելու կապակցությամբ, եւ նշվել է, որ այդ օգնությունը, ըստ երեւույթին, Ադրբեջանին թույլ է տվել ռեսուրսները տեղափոխել հարձակողական հնարավորությունների կողմը եւ էլ ավելի է սպառնում հայերի կյանքին ու տարածաշրջանի կայունությանը: