Արմինֆո. Մայիսի 12-ին տեսակապի ձևաչափով տեղի է ունենալու ԱՊՀ ԱԳ նախարարների խորհրդի նիստը, որին մասնակցելու և ելույթով հանդես է գալու նաև ՀՀ ԱԳ նախարար Զոհրաբ Մնացականյանը:
Ինչպես ԱրմԻնֆո-ին հաղորդեցին ԱԳՆ մամուլի ծառայյյությունից, նիստի օրակարգում ներառված են տարբեր ոլորտներում ԱՊՀ մասնակից պետությունների համագործակցության խորացմանն առնչվող հարցեր:
ԱՊՀ գործկոմի մամուլի ծառայության հաղորդման համաձայն, ԱԳՆԽ մասսնակիցները կարծիքներ կփոխանակեն միջազգային օրակարգի արդիական թեմաների շուրջ, կքննարկեն առանցքային ուղղություններով համագործակցության հետագա զարգացման եւ խորացման հարցերի լայն շրջանակ: Նիստում նախատեսվում է քննարկել ԱՊՀ-ում 2019 թվականի բազմամակարդակ միջգերատեսչական խորհրդակցությունների ծրագրի իրականացումը եւ 2020 թվականի համար հաստատել համանման ծրագիր: Փաստաթղթի նախագծում ավանդաբար ներառված են թեմաներ, որոնք վերաբերում են ՄԱԿ-ին անդամակցության շրջանակներում Համագործակցության պետությունների դիրքորոշումների համակարգմանը, այլ միջազգային կազմակերպությունների հետ փոխգործակցությանը, տեղեկատվական ոլորտին, նոր մարտահրավերներին ու սպառնալիքներին հակազդեցությանը, զինաթափմանը, ինչպես նաեւ արտաքին քաղաքական պլանավորմանը եւ սպառազինությունների վերահսկմանը: Առաջարկվել է խորհրդակցություններ անցկացնել հյուսիսամերիկյան եւ լատինամերիկյան խնդիրների, ԱՊՀ-ում եւ ԵԱՏՄ-ում ինտեգրացիոն գործընթացների զուգակցման, էկոլոգիական դիվանագիտության ոլորտում, ինչպես նաեւ ՄԱԳԱՏԷ-ում եւ ՅՈՒՆԵՍԿՕ-ում փոխգործակցության շուրջ:
ԱԳՆԽ նիստի օրակարգի նախագծում ընդգրկված փաստաթղթերի զգալի մասը վերաբերում է հումանիտար ոլորտին։ Մասնավորապես, կքննարկվի 2021-2030 թվականների միջազգային երիտասարդական համագործակցության ռազմավարության նախագիծը։ Փաստաթղթի ընդունումը թույլ կտա համախմբել պետական իշխանության մարմինների, երիտասարդական հասարակական եւ այլ կազմակերպությունների ջանքերը, որոնք մասնակցում են պետական երիտասարդական քաղաքականության իրականացմանը, ԱՊՀ ոլորտային համագործակցության մարմինների ջանքերը ՝ միջազգային երիտասարդական փոխգործակցության համար բարենպաստ պայմաններ ստեղծելու ուղղությամբ: Արտաքին գործերի նախարարները կքննարկեն նաեւ Համագործակցության ցանցային համալսարանի հիմնադրման եւ գործունեության մասին համաձայնագրի նախագիծը: Փաստաթղթի համաձայն՝ այն իրենից ներկայացնելու է կրթական կազմակերպությունների ցանց, որոնք միավորված են գործընկեր կազմակերպությունների ռեսուրսների օգտագործմամբ համատեղ կրթական ծրագրերի իրականացման համար:
Բացի այդ, ԱՊՀ ԱԳՆԽ նիստին կներկայացվի 2021-2030 թթ. զբոսաշրջության ոլորտում համագործակցության զարգացման ռազմավարության նախագիծը: Ակնկալվում է, որ փաստաթուղթը կնպաստի ԱՊՀ երկրների պետական իշխանության մարմինների, Ազգային զբոսաշրջային կազմակերպությունների եւ տուրիստական ինդուստրիայի այլ սուբյեկտների ջանքերի համախմբմանը: 2021-2030 թվականներին ֆիզկուլտուրայի եւ սպորտի բնագավառում ԱՊՀ պետությունների համագործակցության զարգացման ռազմավարության նախագիծը, որը նույնպես ներկայացվել է ԱԳՆԽ-ի քննարկմանը, ուղղված է ԱՊՀ տարածքում ֆիզիկական կուլտուրայի եւ սպորտի ազգային կազմակերպությունների միջեւ գործընկերային հարաբերությունների խորացմանը:
ԱՊՀ երկրները մտադիր են զարգացնել փոխգործակցությունը մշակույթի ոլորտում։ Այդ կապակցությամբ ԱՊՀ ԱԳ նախարարների խորհրդի քննարկմանը կներկայացվի 2021-2025 թթ. մշակույթի ոլորտում համագործակցության հիմնական միջոցառումների նախագիծը:
Հարցերի ուժային բլոկում ներառված է կոռուպցիային հակազդման գործում ԱՊՀ երկրների համագործակցության մասին համաձայնագրի նախագիծը, որը կոչված է բարձրացնելու այդ ուղղությամբ ազգային ջանքերի եւ համագործակցության արդյունավետությունը: Բացի այդ, արտաքին քաղաքական գերատեսչությունների ղեկավարների քննարկմանը կներկայացվեն փաստաթղթեր, որոնք վերաբերում են հումանիտար ականազերծման եւ ԱՊՀ արտաքին սահմաններում ճգնաժամային իրավիճակների կարգավորմանը, ԱՊՀ պետությունների զինված ուժերի կապի համատեղ համակարգի ստեղծմանը: