Պետդեպարտամենտում պարզաբանել են, թե ինչով են զբաղվում ամերիկյան լաբորատորիաներում Հայաստանում, Վրաստանում, Ուկրաինայում եւ Ադրբեջանում

Արմինֆո. ԱՄՆ Պետդեպարտամենտում պարզաբանել են, թե ինչով են զբաղվում ամերիկյան լաբորատորիաներում՝ Հայաստանի, Վրաստանի, Ուկրաինայի եւ Ադրբեջանի տարածքներում:

ԱՄՆ պետքարտուղարի Եվրոպայի եւ Եվրասիայի հարցերով օգնականի տեղակալ Ջորջ Քենթը Մարշալի հիմնադրամի հետ համատեղ անցկացված տեսակոնֆերանսի ժամանակ, անդրադառնալով օտար պետություններում ամերիկյան բիոլաբորատորիաների գործունեությանը, հավաստիացրել է, որ ապատեղեկատվության եւ բացասական ազդեցության դեմ պայքարը դարձել է ընդհանուր խնդիր:

"15 տարի առաջ Արեւելյան գործընկերության երկրներում ԱՄՆ-ի կարեւորագույն ներդրումներից մեկը  ախտորոշիչ լաբորատորիաներն էին, որոնք հայտնի են որպես" Լուգարի լաբորատորիաներ", որոնք այժմ գրոհում է ռուսական քարոզչամեքենան։ Վրաստանում, Հայաստանում, Ուկրաինայում եւ Ադրբեջանում այդ լաբորատոր ենթակառուցվածքը թեստավորում եւ պայքար է մղում COVID-ի դեմ: Այդ ենթակառուցվածքը ստեղծվել է ավելի քան մեկ տասնամյակ առաջ ԱՄՆ-ի հաշվին։ Լաբորատորիաների անձնակազմը նույնպես վերապատրաստվել է ամերիկացիների կողմից, որպեսզի երկրները կարողանան գործել հենց ներկա իրավիճակում։ Թեեւ մենք փնտրում ենք միջազգային համագործակցության եղանակներ, Ռուսաստանը շարունակում է ապատեղեկատվությունն ընդդեմ Լուգարի լաբորատորիաների, հայտարարելով, թե մենք ստեղծել ենք այս հիվանդությանը եւ չենք պայքարում դրա դեմ: Ցավալի է, որ չինացիները վերցրել են Ռուսաստանի այդ ապատեղեկատվությունը", - հայտարարել է Քենթը։

Նկատենք,որ Վաշինգտոնի արձագանքի առիթը ՌԴ ԱԳՆ պաշտոնական ներկայացուցիչ Մարիա Զախարովայի հայտարարությունն էր, որը, մասնավորապես,  հայտարարել է, թե Մոսկվային հայտնի է Թբիլիսիի մոտ Լուգարի կենսալաբորատորիայում ռազմական նպատակներով հետազոտություններն ընդլայնելու ԱՄՆ-ի առաջարկների մասին, եւ վտանգավոր կենսաբանական ներուժ ունեցող ենթակառուցվածք է ձեւավորվում  ՌԴ սահմանների մոտ:

Նշենք նաև, որ Մոսկվան և Երևանը հայտարարել են, թե դեռևս 2018 թվականին աշխատանքներ են տարվում Հայաստանում ամերիկյան կենսալաբորատորիաներ ռուս մասնագետների մուտքը թույլ տալու վերաբերյալ փաստաթղթի ուղղությամբ: Ավելին, 2019 թվականի նոյեմբերի 11-ին Երևանում Հայաստանի և Ռուսաստանի արտաքին գործերի նախարարները համատեղ մամլո ասուլիսում տեղեկացրել են այդ ուղղությամբ աշխատանքների ավարտի և երկու երկրներում միջգերատեսչական մակարդակով փաստաթղթի համաձայնեցման փուլի մասին: Սակայն դրանից հետո բոլոր խոսակցություններն այդ հարցի շուրջ դադարել են։

Հիշեցնենք, որ 2016 թվականին ԱՄՆ ՊՆ ֆինանսավորմամբ Հայաստանում բացվել է երեք լաբորատորիա ՝ Երեւանում, Գյումրիում եւ Իջեւանում։ Դրանց բացումից հետո հայկական և ռուսական ԶԼՄ-ներում պարբերաբար հրապարակումներ են հայտնվել այն մասին, որ այդ լաբորատորիաները երկակի նշանակության օբյեկտներ են և կարող են օգտագործվել նաև ռազմական նպատակներով կենսաբանական զենքի ստեղծման և արտադրության համար։ Երեւանում ռեֆերենս-լաբորատորիայի ստեղծման համար ԱՄՆ ՊՆ-ն հատկացրել է 15,5 մլն դոլար, իսկ ֆինանսավորման ընդհանուր ծավալը կազմել է 18 մլն դոլար: