Հինգշաբթի, 23 Ապրիլի 2020 11:50

Արմինֆո.ՀՀ մշակույթի նախկին նախարար Արմեն Ամիրյանի և ռեժիսոր Հովհաննես Գալստյանի միջև ծագած սկանդալը շարունակում է թափ հավաքել։

 

Հիշեցնենք, որ նախորդ շաբաթ Քննչական կոմիտեն հայտարարել էր առանձնապես խոշոր չափերի յուրացում կատարելու և պաշտոնեական լիազորությունները չարաշահելու հիմքով քրեական գործ հարուցելու մասին։ Քրեական գործն ուղարկվել է ՀՀ դատախազություն՝ հատուկ քննչական ծառայություն ուղարկելու միջնորդությամբ:ՔԿ համաձայն՝ <2017թ. Կաննի կինոփառատոնին ՀՀ պատվիրակության մասնակցության ծախսերը հոգալու պատրվակով ՀՀ մշակույթի նախկին նախարարը «Տատիկիս վարսերը» ֆիլմի ռեժիսորից պահանջել և միջնորդավորված, մաս-մաս ստացել է նշված ֆիլմի նկարահանումների համար նախատեսված գումարներից շուրջ 6.800.000 դրամ գումար>։

 

Գալստյանը, բազմիցս նշել է, որ վստահել է Ամիրյանին և այդ գումարը տրամադրել Կաննում հայկական պատվիրակության պատշաճ մասնակցությունն ապահովելու համար ։ Նախարարը, ըստ նրա, վերցրել է գումարը ՝ սեղմ ժամկետներում դրանք վերադարձնելու պայմանով, սակայն այդպես էլ չի պահել իր խոստումը ։ Ռեժիսորն ստիպված է եղել վարկ վերցնել «Տատիկիս վարսերը» նախագծի իրականացման համար:

 

Մինչդեռ Ամիրյանը, ով, որոշ տվյալներով, իր հրաժարականից հետո գտնվում է ԱՄՆ-ում, ասօր ֆեյսբուքյան էջում հայտարարություն է արել Գալստյանի դեմ հայցով դատարան դիմելու մասին։ <Իմ ապրած 52 տարիների ընթացքում այնքան սուտ և կեղծիք չէի լսել, որքան լսեցի վերջին երկու շաբաթվա ընթացքում։ Կարծում էի՝ Քրիստոսի հարության տոնը կմաքրի չար մտքերը, կբուժի հիվանդ , նենգ երևակայությունը։ Մտածում էի՝ լռեմ, կհասկանան իրենց մեղքը։Բայց ստի կծիկն այնքան գլորվեց, որ հիմա մեծ, դատարկ փուչիկի նման բանսարկությունը պայթելու է ոմանց ճակատին։ Ճշմարտությունը մեկն է, ու որքան էլ ցանկանան նենգափոխել, միևնույն է, այն արևի շողի նման ճառագելու է։

 

Իսկ ճշմարտությունը հետևյալն է․Հովհաննես Գալստյանը ինձ ներկայացրել է Կաննի կինոփառատոնին պատշաճ մասնակցելու մեծ ծրագիր։ Ներկայացված ծրագրի բյուջեն նախարարության բյուջեում նախատեսված գումարից մեծ էր։ Ասաց՝ հովանավորներ ունեմ, կօգնեն։ Հետո կինոկենտրոնը դիմեց, ես էլ հավանության արժանացնելով ծրագիրը, հրամանով կինոկենտրոնին (այն ժամանակ տնօրեն Գևորգ Գևորգյան) հանձնարարեցի կազմակերպել։ Պատվիրակության ղեկավարն էր Հովհաննես Գալստյանը։ Մեկնելուն մնացել էր գրեթե մեկ շաբաթ։ Ինձ զեկուցեցին, որ Կաննի ծրագիրը տապալվում է, և տապալվում է ղեկավարի մեղքով։ Արագ որոշում կայացվեց փոխել ծրագրի ղեկավարին։ Հովհաննես Գալստյանը ամեն բան փոխանցեց ծրագրի նոր ղեկավարին։ Տեղավորվեցին ժամկետների մեջ, և պատվիրակությունը, այդ թվում՝ Հովհաննես Գալստյանը, մեկնեցին Կանն։ Վերադարձան՝ ներկայացնելով բովանդակային և ֆինանսական հաշվետվություն (օդանավի տոմս, հյուրանոց, օրապահիկ, տաղավար և այլն)։ Հետո Հովհաննես Գալստյանից տեղեկացա, որ իր հովանավորը մասամբ հրաժարվել է խոստումից։ Պատասխանատու աշխատանքի ընթացքում պատահում է, որ ոչ ստանդարտ իրավիճակներում, մարդուն օգնելու համար, պետք է որոշում կայացնել։

Ես Հովիկին ասացի, որ կքննարկենք հարցը և անպայման լուծում կգտնենք, թեև որևէ պարտավորութուն չունեի։ Կարճ ժամանակ անց ես հրաժարական տվեցի։ Սա է ամբողջ պատմությունը, որը Հովհաննես Գալստյանը նենգափոխում և ներկայացնում է՝ իբր ես իրենից գումար եմ պահանջել և ստացել։ Ե՞րբ, որտե՞ղ, ինչի՞ համար... Ի՛նքն է գնացել Կանն, ի՛նքն էլ ծախսել է, հաշվետվության մեջ էլ պարզ երևում է՝ ինչի վրա են ծախսել։ Վերջին օրերին Հովհաննես Գալստյանը հրապարակային բազմաթիվ զրպարտչական ու վիրավորական արտահայտություններ է արել, ինչն անպատասխան չի մնալու։ Նա անձամբ պետք է հրապարակայնորեն հերքի զրպարտությունները և ներողություն խնդրի վիրավորանքների համար։ Այդ նպատակով հայցադիմում ենք ներկայացնում դատարան։ Վստահ եմ, որ այս դատը լավագույն դասը կլինի բարոյականության սահմանն անցնողների համար>,-հայտարարել է նախկին նախարարը։