Արմինֆո. Հայաստանի կառավարության համար կարեւոր է կորոնավիրուսի համավարակի հետեւանքով առաջացած ճգնաժամի ֆոնին քաղաքացիներին ցուցաբերվող օգնության հասցեականությունը։ Այդ մասին ապրիլի 6-ին առցանց հարցուպատասխանի ժամանակ հայտարարել է վարչապետ Նիկոլ Փաշինյանը, պատասխանելով այն հարցին, թե ինչու է կառավարությունը որոշում կայացրել օգնել ոչ թե բոլոր երեխաներին, այլ միայն նրանց, ում ծնողները կորոնավիրուսի պատճառով զրկվել են աշխատանքից։
Նրա խոսքով, կառավարության տրամաբանությունն այն է, որ օգնություն ցուցաբերվի նրանց, ովքեր իսկապես դրա կարիքն ունեն, կան բնակչության շերտեր, ընտանիքներ, որտեղ երեխաներն այնքան էլ սուր կարիք չունեն օգնության, ինչպես մյուսները: "Մենք նպատակ ունենք օգնել ամենակարիքավորներին։ Բացի այդ, կառավարությունն աջակցության տարբեր ծրագրեր ունի։ Եվ լինում է այնպես, որ մի ընտանիքի անդամներն օգտվում են կառավարության աջակցության տարբեր նախագծերից", - ասել է նա, հավելելով, որ կառավարությունը նման 9 նախագիծ ունի, սակայն այդ նախագծերը շարունակական են լինելու, մոնիթորինգ է իրականացվում և բացահայտվում են նոր խոցելի շերտեր։
Նա նաեւ արձանագրել է, որ կառավարությունը տեղեկատվություն է ստացել, որ մի շարք ձեռնարկություններ աշխատակիցներին հարկադիր արձակուրդ ուղարկելուց հետո, միեւնույն ժամանակ, չվճարելով դրա դիմաց: Փաշինյանն արձանագրել է, որ այդ մասին տվյալները կստացվեն ապրիլի երկրորդ տասնօրյակում, երբ կներկայացվի հարկային եկամուտների վիճակագրությունը, եւ վերլուծության հիման վրա կդիտարկվեն այդ մարդկանց օգնելու հնարավորությունները:
Խոսելով բուհերում ուսման վարձերի մասին՝ Փաշինյանը նշել է, որ ուսումնական գործընթացի վերսկսումից հետո կրթության նախարարի հանձնարարական կա՝ չպահանջել ուսանողներից առաջին երկու շաբաթները վճարել, ապա դա անել անհատական ժամանակացույցով՝ յուրաքանչյուր ուսանողի համար: Ընդ որում, նա կոչ է արել այն ուսանողներին, ովքեր հնարավորություն ունեն գումար փոխանցել, դա անել, որպեսզի հնարավոր լինի դասախոսներին վճարել աշխատավարձերը։
Անդրադառնալով բարձրաստիճան պաշտոնյաներին տրվող պարգևավճարների վերաբերյալ հարցին՝ վարչապետը նշել է, որ մարտ ամսվա համար նրանք պարգևավճարներ չեն ստանա՝ իր իսկ որոշմամբ, և դրանք կփոխանցվեն կորոնավիրուսի օգնության հիմնադրամին։
Անդրադառնալով դիտարկմանը, թե ավելի լավ չէր լինի այդ միջոցներն ուղղորդել թոշակառուներին, Փաշինյանը նշել է, որ պարգեւավճարների տարեկան ֆոնդը կազմում է 1 մլրդ դրամ, եւ եթե այդ միջոցները հաշվարկենք թոշակառուների թվի վրա, ապա ամսական հավելավճարը կկազմի 165 դրամ, մինչդեռ նախորդ տարի կառավարությունը 24 անգամ բարձրացրել է կենսաթոշակների չափը:
Ընդ որում, նա հավաստիացրել է, որ հենց այդ պարգեւավճարների շնորհիվ է հաջողվել երկրում ապահովել աննախադեպ տնտեսական ցուցանիշներ եւ ավելացնել 1 մլն 90 հազար քաղաքացիների աշխատավարձերը: