Արմինֆո.ԱրմԻնֆո-ին տված հարցազրույցում ԼՂՀ նախագահի թեկնածու, Արցախի հերոս Վիտալի Բալասանյանը խոսել է կորոնավիրուսի տարածման հետ կապված քաղաքական իրավիճակի, նախընտրական քարոզարշավի և այլ հարցերի մասին:
Այսօր մենք ծրագրում էինք քննարկել ձեր քաղաքական ծրագիրը՝ որպես ԼՂՀ նախագահի թեկնածու, սակայն իրավիճակը կտրուկ փոխվեց Հայաստանում կորոնավիրուսի պանդեմիայի պատճառով արտակարգ դրություն մտցնելու հետ կապված: Ինչպե՞ս եք գնահատում իրավիճակը։
Այո, իրավիճակը բարդ է։ Այժմ քաղաքական քարոզչության ժամանակը չէ, կարեւոր է միավորել մարդկանց՝ նոր մարտահրավերին դիմակայելու նպատակով: Ես հասկանում եմ, որ մեր համաքաղաքացիները հոգնել են մշտական մոբիլիզացիայից ։ Ռազմական սպառնալիքը, ադրբեջանցիների և հայերի համատեղ բնակավայր կառուցելու վտանգը մարդկանց ստիպում են ապրել մշտական տագնապի վիճակում ։ Ես մտավախություն ունեմ, որ հերթական՝ նոր տիպի սպառնալիքը լուրջ չի ընդունվի։ Հանրապետության ղեկավարությունը պետք է խիստ հետևողական լինի քաղաքացիներին վերահաս վիրուսի մասին տեղեկացնելու հարցում, խստորեն վերահսկի կանխարգելման և մեկուսացման ռեժիմի պահպանումը, որպեսզի չկրկնվի Հայաստանի օրինակը։
Դու՞ք կարծում եք, որ ներկայիս կառավարությունը կհաղթահարի իրավիճակը։
Հիմա դեռ այդ մասին դժվար է վերջնականապես խոսել, բայց ես շատ ավելի ակտիվ կգործեի։ Այո, Արցախը երիտասարդ երկիր է, և նման բանի առաջին անգամ ենք բախվում։ Բայց եկեք օբյեկտիվ լինենք, երբ վիրուսն արդեն ներթափանցում է երկիր, ոչ ոք չի կարողանում դեմն առնել. Իտալիան չի կարողանում, Իսպանիան չի կարողանում, Հայաստանն էլ չի կարողանում։ Բայց Արցախում հիմա տեսնում եմ իշխանությունների անփութությունն ու հանցավոր անգործությունը։ Բնակչության անվտանգության ապահովման, ԱՀԿ-ի հանձնարարականների տարածման և այսօր անհրաժեշտ բազմաթիվ միջոցառումներ չեն ձեռնարկվում կամ քաոսային բնույթ են կրում ։ Հիմա պետք է վերահաս ճգնաժամի հաղթահարման ռազմավարություն, այլ ոչ թե՝ տակտիկական փոքր քայլեր։
Ինչպե՞ս են ձեր քաղաքական ընդդիմախոսներն արձագանքում իրավիճակի փոփոխությանը։ Կարո՞ղ է խոսք գնալ ընտրությունների օրը հետաձգելու մասին ։
Առայժմ, բարեբախտաբար, ընտրությունները հետաձգելու պատճառ չկա, բայց ամեն ինչ կարող է լինել։ Եվ մենք ողջ հասարակությամբ կընդունենք դա, որովհետև ոչ մի քաղաքական ամբիցիա չի կարող գերիշխել ազգային անվտանգության հարցերի նկատմամբ։ Որքան ինձ հայտնի է, քաղաքական մրցավազքի բոլոր մասնակիցները, ընտրական հանձնաժողովի հանձնարարականների համաձայն, փոխել են քարոզչական միջոցառումների ձևաչափը ։ Փակ տարածքներում զանգվածային միջոցառումներ չեն անցկացվում։
Հաղթանակի դեպքում ի՞նչ եք նախատեսում անել տնտեսական զարգացման առումով:
Զարգացած տնտեսությունն ու կյանքի բարձր որակը այն է, ինչ ես ուզում եմ իմ ժողովրդի համար ։ Բայց առանց անվտանգության ապահովման, ոչ մի բանի մասին չի կարելի մտածել։ Արցախն այնպիսի վիճակում է, որ յուրաքանչյուր սխալ քայլի հետևանքով կարող ենք երկիր կորցնել: Ինչ վերաբերում է կոնկրետ տնտեսությանը, ես թիմում ունեմ փոքր երկրների տնտեսությունների զարգացման առաջավոր տեխնոլոգիաների արտասահմանյան մասնագետներ, որոնք պնդում են, որ Արցախի ներուժը բավական է տնտեսական հրաշք գործելու համար: Անհրաժեշտ է սկսել աուդիտից և գույքագրումից, այնուհետ՝ ծրագիր ըստ ուղղությունների, պատասխանատու անձինք, կատարման ժամկետներ: Բայց այդ աշխատանքն սկսելու հիմնական պայմանն անվտանգության երաշխիքն է: Որպեսզի դա սկսվի, երկիրը պետք է ունենա ուժեղ, սկզբունքային եւ անկախ առաջնորդ։