Հինգշաբթի, 12 Մարտի 2020 10:57

Արմինֆո. Մարտի 15-ին հայկական «Atlantis European Airways» ավիաընկերության կողմից Հռոմից կազմակերպվելու է չարթերային թռիչք դեպի Երևան, որի ֆինանսական ծախսերը կհոգան ՀՀ կառավարությունը, «Atlantis European Airways» ավիաընկերությունն ու «Արմենիա միջազգային օդանավակայաններ» ընկերությունը: Այդ մասին ՙՖեյսբուքի՚ իր էջում հաղորդել է փոխվարչապետ Տիգրան Ավինյանը:

ՙԹռիչքի ժամի ու Հռոմի կոնկրետ օդանավակայանի մասին լրացուցիչ տեղեկատվություն կտրամադրվի Իտալիայում ՀՀ դեսպանության միջոցով: Կարճաժամկետ այցելությամբ, ուսման և գործուղման նպատակով Իտալիայում գտնվող ՀՀ քաղաքացիներին կոչ եմ անում հնարավորինս սեղմ ժամկետում կապ հաստատել մեր դեսպանության հետ։ Թեժ գիծ՝ +393775226710 կամ +393898296324, +393423382875, +393442451433 Էլ. հասցե՝ [email protected]՚, - գրել է փոխվարչապետը:

 

Նախօրեին երեկոյան վարչապետ Նիկոլ Փաշինյանը տեղեկացրել էր, որ Հայաստանում հաստատվել է կորոնավիրուսի երեք նոր դեպք.  երկու վարակակիր ՝ Հայաստանի քաղաքացիներ (45 և 27 տարեկան), ևս մեկը՝ Իտալիայի քաղաքացի (51 տարեկան), որն աշխատում է մեր երկրում: Նրանք բոլորը Հայաստան են ժամանել Իտալիայից։ Այսպիսով, COVID-19 կորոնավիրուսով վարակվելու հաստատված դեպքերի ընդհանուր թիվը Հայաստանում կազմել է 4 մարդ։

 

Նշենք, որ մարտի 12-ի դրությամբ Իտալիայում գրանցվել է հիվանդության 12 462 հաստատված դեպք (մահացել է 827 մարդ)։ Հիշեցնենք, որ COVID-19 կորոնավիրուսով վարակվածների ընդհանուր թիվն աշխարհում շարունակում է աճել, եւ մարտի 12-ին հասել է 122 926-ի, հաղորդում է South China Morning Post թերթը, որը վարում է ողջ աշխարհում վարակվածների, մահացածների և առողջացածների թվի վերաբերյալ տվյալների էլեկտրոնային հաշվարկ։ Ընդ որում, մայրցամաքային Չինաստանին բաժին է ընկնում հիվանդության 80 793 հաստատված դեպք, դրա սահմաններից դուրս վարակվածների թիվը գերազանցել է 37 հազարը ՝ անցած օրվա ընթացքում ավելանալով 4,9 հազարով:

Ընդհանուր առմամբ, աշխարհում կորոնավիրուսի հարուցած հիվանդությունից մահացության 4 601 դեպք կա, Չինաստանի մայրցամաքային մասում ՝ 3 169,  Իրանում՝ 9 հազար (354), Հարավային Կորեայում ՝ 7 869 (66), Իսպանիայում ՝ 2 140 (48), Ֆրանսիայում ՝ 1 784 (33), Գերմանիայում ՝ 1 296 (երկու), Ֆրանսիայում ՝ 1 126 (19), Ճապոնիայի տարածքում (ներառյալ ուղեւորները եւ Diamond Princess զբոսանավի անձնակազմը) ՝ 1 281 (19), ԱՄՆ - ում ՝ 987 (31), Շվեյցարիայում ՝  476 (երեք), Մեծ Բրիտանիայում ՝ 456 (ութ), Նիդեռլանդներում ՝ 382 (չորս), Շվեդիայում ՝ 326 (մեկ), Նորվեգիայում ՝ 277, Բելգիայում ՝ 267, Ավստրիայում ՝ 206, Բահրեյնում ՝ 189, Սինգապուրում ՝ 178, Մալայզիայում ՝ 149, Հոնկոնգում՝ 129 (երեք), Դանիայում ՝ 113, Ավստրալիայում ՝ 112 (երեք): Վարակման 100-ից պակաս դեպք է գրանցվել աշխարհի 96 երկրներում և շրջաններում ։

Կորոնավիրուսի պատճառով մահեր են գրանցվել Իրաքում (6), Սան Մարինոյում, Ֆիլիպիններում եւ Լիբանանում (2-ական), 1-ական՝ Ինդոնեզիայում, Իռլանդիայում, Կանադայում, Եգիպտոսում, Թաիլանդում, Թայվանում, Ֆիլիպիններում, Ալբանիայում, Արգենտինայում, Մարոկկոյում, Պանամայում, Բուլղարիայում: Ընդհանուր առմամբ, աշխարհում բուժվել է ավելի քան 67 հազար մարդ։ Նախօրեին Առողջապահության համաշխարհային կազմակերպությունը (ԱՀԿ) COVID-19-ին առնչվող իրվիճակը հայտարարել է համավարակ: