Արմինֆո. 17-ամյա կանադահայը դարձավ Շառլ Ազնավուրի առաջին կրթաթոշակառու Դիլիջանի միջազգային դպրոցում: Շառլ Ազնավուրի կրթաթոշակը մեկնարկել է 2018 թվականի հոկտեմբերին «Ավրորա» մարդասիրական նախաձեռնության կողմից՝ ի հիշատակ մեծ արտիստ և հումանիստ Շառլ Ազնավուրի: 2019-2020 ուսումնական տարում Դիլիջանի միջազգային դպրոցը իր դռներն է բացել կրթաթոշակին արժանացած առաջին ուսանողի առջև:
Մոտ մեկ տարի առաջ «Ավրորա» մարդասիրական նախաձեռնությունը հայտարարեց Շառլ Ազնավուրի անվան կրթաթոշակի հիմնադրման մասին: Ազնավուրն ի սկզբանե իր անվամբ և ջանքերով աջակցեց Ավրորայի կայացմանը. նա կարևոր դերակատարում ունեցավ 2016-ին և 2017-ին «Ավրորա» մրցանակաբաշխությունում: Որոշվեց, որ իր հիշատակին նվիրված նոր կրթաթոշակն ամեն տարի շնորհվելու է Ֆրանսիայից և ֆրանկոֆոն երկրներից ուսանողներին, որոնք հնարավորություն կունենան սովորելու UWC Դիլիջանում՝ Հայաստանում գործող միջազգային գիշերօթիկ դպրոցում, որը հանդիսանում է UWC շարժման մաս։ Այս կրթաթոշակը միտված է համախմբել Ազնավուրի երկու աշխարհները՝ Ֆրանսիան և Հայաստանը, որպես այդ կապերը հիշատակելու և սերնդե սերունդ Շառլ Ազնավուրին երախտագիտությունը հայտնելու մի փոքրիկ միջոց:
Դիլիջանի միջազգային դպրոցը «Ազնավուր» հիմնադրամի հետ միասին սահմանեցին կրթաթոշակի յուրահատուկ չափանիշները: Հաջողակ թեկնածուից ակնկալվում էր, որ նա կցուցաբերի գեղարվեստական հմտություններ՝ երաժշտություն ստեղծելու կամ կատարելու, գրական ստեղծագործություններ արարելու, թատրոնում խաղալու, նկարելու և այլ ունակություններ: Նիկոլա Ազնավուրը՝ Շառլ Ազնավուրի որդին և «Ազնավուր» հիմնադրամի համահիմնադիրը, անձամբ մասնակցել է դիմումների քննարկմանը և թեկնածուների ընտրությանը: Շառլ Ազնավուրի առաջին կրթաթոշակառու ընտրվեց Արմեն Էրզինգացյանը:
Դիլիջանի միջազգային դպրոցի առաջին կուրսի 17-ամյա ուսանող Արմենը ծնվել է Կանադայի Մոնրեալ քաղաքում և այնտեղ ապրել իր կյանքի մեծ մասը: Նա կանադահայ է՝ հայկական ծագում ունեցող ծնողների զավակ: Արմենը շատ հետաքրքրասեր, մոտիվացված անձնավորություն է, տարված է գիտությամբ, կենսաբանությամբ, շատ է սիրում երաժշտությունը՝ վաղ հասակից դաշնամուր է նվագում: Վերջին երկու տարիների ընթացքում Արմենը նաև ներգրավված է եղել իր հետաքրքրությունների հետ կապված բազմաթիվ միջոցառումներում և կամավորական աշխատանքում, այդ թվում՝ հիվանդանոցներում աշխատանքը, իր դպրոցում կանաչ կոոպերատիվի վարումը և տեղական մանկապարտեզներում ֆրանսերենի ու մաթեմատիկայի դասավանդումը:
Արմենը Դիլիջանի միջազգային դպրոցի մասին առաջին անգամ լսեց իններորդ դասարանում, երբ դպրոցի խորհրդատուն այցելեց իր դասարանը և համառոտ ներկայացրեց UWC շարժումը, որտեղ գալիս, ապրում և երկու տարի միասին սովորում են աշխարհի տարբեր երկրներից երիտասարդներ: Պատմությունը հիացրեց տղային, և նա ինքն իրեն խոստացավ, որ մի օր կսովորի Հայաստանի UWC Դիլիջան քոլեջում: «Ես շատ հպարտ եմ իմ ծագմամբ, և արմատներիս վերադառնալու գաղափարը հետաքրքրաշարժ թվաց ինձ»,- ասում է Արմենը: 2018-ի աշնանը Արմենը Շառլ Ազնավուրի անվան կրթաթոշակի թեկնածու դարձավ իր երկրի ազգային կոմիտեի կողմից:
«Անհավատալի էր: Ես չէի կարող պատկերացնել անգամ, որ ինձ կդիտարկեն այս հեղինակավոր կրթաթոշակի համար, դա երազ էր: Ես միջազգային հանձնաժողովին ուղարկեցի տեսանյութ, որում ասվում էր, թե ով եմ ես, ինչ եմ արել, ինչու եմ ուզում գնալ UWC և ինչո՞ւ հենց ես պետք է ստանամ կրթաթոշակը։ Որոշ ժամանակ անց նրանցից էլեկտրոնային փոստով նամակ ստացա, որ ես սովորելու եմ UWC Դիլիջանում: Չեմ կարող նկարագրել, թե ինչ էի զգում՝ ստանալով կրթաթոշակ բոլոր հայերի, ֆրանսախոսների և, հիրավի, ողջ աշխարի համար այդպիսի նշանավոր մարդու անվամբ: Մի մարդու, ում երաժշտությունը լսել էի ամբողջ մանկությունս, ինչպես լսում են նրա երաժշտությունը գրեթե բոլոր հայկական ընտանիքներում: Ես բառեր չեմ գտնում՝ շնորհակալությունս հայտնելու «Ավրորա» և «Ազնավուր» հիմնադրամներին ինձ այս կրթաթոշակը շնորհելու, UWC Դիլիջան գալու, այստեղ ապրելու և նման բազմազան ու հարուստ միջավայրում սովորելու համար։ Իսկապես ինձ համար երջանկություն է Դիլիջանի միջազգային դպրոցում ուսանելը՝ գտնվելով Հայաստանում, իմ հայրենիքում»,- ասում է Արմեն Էրզինգացյանը:
«Մենք շատ ուրախ ենք, որ ունենք Շառլ Ազնավուրի առաջին կրթաթոշակառուն: «Ազնավուր» հիմնադրամի առաքելությունն է աջակցել կրթության ոլորտին և երիտասարդներին իրականացնել իրենց երազանքներն ու ներուժը: Այս ամենամյա կրթաթոշակը նոր հնարավորություններ կընձեռի նրանց, ովքեր հավատում են կրթության ուժին և ցանկանում են դառնալ UWC ընտանիքի անդամ»,- ասում է «Ազնավուր» հիմնադրամի համահիմնադիր Նիկոլա Ազնավուրը:
UWC Դիլիջանը հետխորհրդային տարածքում հիմնված առաջին միջազգային գիշերօթիկ դպրոցն է, որը գործում է UWC կրթական մոդելով։ Դպրոցն իր դռները բացել է 2014 թվականին Հայաստանի Դիլիջան քաղաքում: Այն ներկայումս ունի 228 ուսանող աշխարհի ավելի քան 80 երկրից, իսկ դասախոսական կազմը ներառում է 36 ուսուցիչ՝ 15 երկրից։
UWC Դիլիջանի ստեղծման գաղափարը պատկանում է հանրօգուտ ներդրողներ և սոցիալական ձեռներեցներ Ռուբեն Վարդանյանին և Վերոնիկա Զոնաբենդին, որոնքայն կյանքի են կոչել այլ հիմնադիր նվիրատուների աջակցությամբ: Քոլեջը կառուցվել է ավելի քան 330 բարերարի առատաձեռն նվիրատվությունների շնորհիվ: Քոլեջիընդունելության քաղաքականությունը հիմնված է ֆինանսական աջակցության կարիքի վրա և թույլ է տալիս դիմելու բոլորին՝ անկախ սոցիալ-տնտեսականկացությունից։ Աշակերտների 96%-ն ստանում է լրիվ կամ մասնակի կրթաթոշակ. միջին կրթաթոշակը կազմում է 82%։
UWC Դիլիջանում ուսումնառության և դասավանդման գործընթացն իրականացվում է «Միջազգային բակալավրիատ» (International Baccalaureate, IB) դիպլոմայինծրագրով, որը գնահատվող ծրագիր է՝ նախատեսված 16-19 տարեկան երիտասարդների համար:
UWC Դիլիջանն արդեն իսկ ունի շրջանավարտների չորս սերունդ (2016-ից 2019 թվականներ), որոնցից շատերն իրենց ուսումը շարունակում են աշխարհիառաջատար կրթական համալսարաններում, այդ թվում՝ Հարվարդի համալսարանում, Փրինսթոնի համալսարանում, Եյլի համալսարանում, Կոլումբիայիհամալսարանում, Լոնդոնի համալսարանական քոլեջում, Դյուկի համալսարանում, Կալիֆոռնիայի համալսարանում (Բերկլի), Մակ-Գիլի համալսարանում, Էդինբուրգի համալսարանում, ՔՀԿԻ-ի (Քեկի հետբուհական կրթության ինստիտուտի) Միներվայի դպրոցում և այլն:
«Միացյալ աշխարհի քոլեջներ» (United World Colleges, UWC) շարժումը հիմնվել է 1962 թ. և այսօր ներառում է 18 դպրոց և քոլեջ աշխարհի 4 մայրցամաքում, 155 երկրում գործող ազգային կոմիտեներ և մի շարք կարճաժամկետ կրթական ծրագրեր: UWC շարժման առանցքային արժեքներն են միջազգային և միջմշակութային ընկալումը, բազմազանության խրախուսումը, անձնական պատասխանատվությունը և ներգրավվածությունը, փոխադարձ պատասխանատվությունը և հարգանքը, կարեկցանքը և ծառայությունը, հարգանքը շրջակա միջավայրի նկատմամբ, իդեալիզմի զգացումը, անձնական մարտահրավերը, գործնական քայլը և անձնական օրինակը: