Պաշտոնական Բաքուն արձագանքել է Երևանում Սերգեյ Լավրովի խոսքերին

Արմինֆո. Պաշտոնական Բաքուն արձագանքել է Երևանում Ռուսաստանի արտաքին գործերի նախարար Սերգեյ Լավրովի խոսքերին այն մասին, որ Լեռնային Ղարաբաղի հակամարտությունը պետք է կարգավորվի երեք անխախտ միջազգային սկզբունքներով' ուժի կամ ուժի սպառնալիքի չկիրառում, տարածքային ամբողջականություն և ժողովուրդների ինքնորոշման իրավունք:

Ադրբեջանի ԱԳՆ մամուլի ծառայության վարչության պետ Լեյլա Աբդուլաևան հավաստիացրել է, որ Լեռնային Ղարաբաղի ադրբեջանական համայնքը հակամարտության կարգավորման ցանկացած առաջարկվող ծրագրի բաղկացուցիչ մասն է, ընդ որում, բոլորովին մոռանալով այդ բանակցություններին Արցախի բուն բնակչության ներկայացուցիչների մասնակցության իրավունքը:  "Ինչպես միշտ նշել ենք, ցանկանում եմ եւս մեկ անգամ ընդգծել, որ միայն այդ տարածաշրջանից արտաքսված ադրբեջանցիների վերադարձը Լեռնային Ղարաբաղի իրենց տներ կարող է իրական հնարավորություններ բացել հակամարտությունը լուծելու համար՝ ինքնակառավարման բարձր կարգավիճակի հիման վրա, որը նախատեսում է ադրբեջանական եւ հայկական համայնքների համատեղ բնակություն Ադրբեջանի Հանրապետության սահմաններում՝ խաղաղության եւ անվտանգության պայմաններում: Դրա համար, առաջին հերթին, պետք է անցկացվեն սուբստանտիվ բանակցություններ հակամարտության կարգավորման շուրջ, եւ Հայաստանի օկուպացիոն ուժերը պետք է լքեն Լեռնային Ղարաբաղը եւ դրան հարող Ադրբեջանի յոթ շրջանները", - պատասխանել է Աբդուլաեւա Լավրովին։

Նախօրեին Երեւանում Լավրովը նշել էր, որ Լեռնային Ղարաբաղի հակամարտության վերջնական կարգավորումը պետք է ընդունելի լինի Հայաստանի, Լեռնային Ղարաբաղի եւ Ադրբեջանի համար: Անդրադառնալով Արցախի վերադարձին հակամարտության կարգավորման բանակցային սեղանի շուրջ ՝ ՌԴ ԱԳ նախարարը հիշեցրել է, որ ձևաչափը, ինչպես և կազմը համաձայնեցնում են իրենք՝ կողմերը։  Այս համատեքստում նա հիշեցրել է, որ սկզբնական փուլում Լեռնային Ղարաբաղը մասնակցել է բանակցություններին, սակայն ինչ-որ փուլում Հայաստանի նախորդ նախագահներից մեկը որոշել է, որ Ղարաբաղի շահերը ներկայացնելու է Երեւանը: "Ամեն դեպքում, մենք՝ որպես համանախագահների խմբի անդամ, առաջ մղելով այդ գործընթացը, փորձում ենք հասնել նրան, որ այն ընթանա ընդհանուր համաձայնության հունով։  Եվ բոլորի համար էլ հասկանալի է, որ առանց Լեռնային Ղարաբաղի ժողովրդի, բնակչության համաձայնության՝ ոչ մի պայմանավորվածություն հնարավոր չի լինի ձևակերպել։ Հենց դրանից էլ մենք ելնում ենք", - ընդգծել է Լավրովը։

Նա, միեւնույն ժամանակ, նշել է, որ հանդիպման ժամանակ Հայաստանի վարչապետ Նիկոլ Փաշինյանը հիշատակել է իր հրապարակային հայտարարությունն այն մասին, որ ամփոփիչ պայմանավորվածությունները պետք է հաշվի առնեն Հայաստանի, Ղարաբաղի եւ Ադրբեջանի շահերը: "Դրան դժվար է առարիկել", - ասել է ՌԴ ԱԳ նախարարը:

Խոսելով ղարաբաղյան հակամարտության կարգավորման սկզբունքների վերաբերյալ՝ Լավրովը ևս մեկ անգամ ընդգծել է, որ պետք է հաշվի առնվեն Հայաստանի, Լեռնային Ղարաբաղի և Ադրբեջանի շահերը։  Նրա խոսքով, տարածքային ամբողջականության, ժողովուրդների ինքնորոշման իրավունքի եւ խաղաղ կարգավորման սկզբունքներն ամրագրված են բոլոր այն տարբերակներում, որոնք քննարկվում են կողմերի միջեւ: "Վերջնական որոշումը պետք է հաշվի առնի բոլոր սկզբունքները։ Դրա հետ ոչ ոք չի վիճում։  Մնացածը բանակցությունների հարց է։  Դիվանագիտության արվեստը փոխզիջումն է: Մենք, որպես համանախագահներ, փորձում ենք, որպեսզի փոխզիջումներն ազնիվ լինեն եւ արտացոլեն շահերի իրական հավասարակշռությունը", - եզրափակել է Լավրովը։