Եվրոպական ներդրումային բանկը 4,25 մլն եվրոյի դրամաշնորհ կտրամադրի Հայաստանին ճանապարհային անվտանգության բարելավման համար

Արմինֆո. Եվրոպական ներդրումային բանկը (ԵՆԲ) 4 մլն 250 հազար եվրո դրամաշնորհ կտրամադրի Հայաստանին ճանապարհային անվտանգության բարելավման համար, մասնավորապես՝ Մ-6 ճանապարհահատվածում և հարավային ուղղությամբ:  Հայաստանի կառավարությունը նոյեմբերի 7-ին հավանություն է տվել համապատասխան դրամաշնորհային համաձայնագրի կնքման առաջարկությանը:

Ինչպես հայտնել է տարածքային կառավարման և ենթակառուցվածքների փոխնախարար Վաչե Տերտերյանը՝ ներկայացնելով որոշման նախագիծը, համաձայնագրի նպատակն է ապահովել ճանապարհների անվտանգությունը՝ բարեկարգելով ճանապարհները լայնածավալ ճանապարհային աշխատանքներին զուգահեռ ՝ անվտանգության ժամանակակից չափանիշներին համապատասխան:

Նրա խոսքով ՝ կառավարությունը նպատակ ունի նվազեցնել վթարների հետեւանքով ծանր դեպքերի տեսակարար կշիռը: Դրա համար, ինչպես նշել է փոխնախարարը, սկզբում պետք է բացահայտվեն այդ տեսանկյունից առավել վտանգավոր հատվածները, նախապատրաստվեն համապատասխան նախագծեր, հնարավոր է նաեւ, որ պատասխանատու կառույցները դիմեն քարաթափումների կանխարգելման աշխատանքներին:

Այսպես, ըստ որոշման նախագծի, միջոցները կուղղվեն Մ-2 (Երեւան-Մեղրի), Մ-4 (Երեւան-Իջեւան), Մ-5 (Երեւան-Արմավիր-Թուրքիայի սահման), Մ-12 (Գորիս-Արցախ), Մ-17 (Կապան-Ծավ-Մ-2), Հ-8 (Երեւան-Արտաշատ-Այգևան) ճանապարհահատվածների անվտանգության բարելավմանը: Հնարավոր է, որ ծրագրում ներառվեն նաև այլ հատվածներ, որտեղ կբացահայտվեն նման խնդիրներ ։

Ընթացիկ տարվա հունիսին ԱրմԻնֆո-ն հայտնել էր, որ Երևանում տրվել է Հայաստանի ճանապարհային անվտանգության բարելավման ծրագրին Եվրոպական միության կողմից տեխնիկական աջակցության մեկնարկը։ Եվրոպական ներդրումային բանկը (ԵՆԲ) Հայաստանին հատկացրել է 5,15 մլն եվրո դրամաշնորհ, որից 0,65 մլն եվրո՝ տեխնիկական աջակցության (խորհրդատվական ծառայություններ), 4,25 մլն եվրո՝ շինարարական աշխատանքների և 0,25 մլն եվրո՝ այլ կազմակերպչական ծախսերի համար։ Հայաստանում և Վրաստանում Եվրոպական ներդրումային բանկի տեխնիկական աջակցության ծրագրերի համակարգող Ալեքսանդր Բախտամյանը ներկայացրել է ծրագրի տեխնիկական աջակցության խորհրդատվական ծառայություններ մատուցող կոնսորցիումը, որի մեջ ներգրավված են CESTRA (Սերբիա), COWI (Դանիա), SWEROAD (Շվեդիա) ընկերությունները։

Տեխնիկական աջակցության շրջանակներում նախատեսվում է վերանայել ավտոճանապարհների վրա ընտրված վտանգավոր տեղամասերի բարելավման առկա նախագծերը, մշակել նոր նախագծեր, իրականացնել վտանգավոր տեղամասերի բարելավման շինարարական աշխատանքների տեխնիկական հսկողությունը, հայտնաբերել վտանգավոր այլ տեղամասեր, կազմակերպել ճանապարհային անվտանգության հարցերին նվիրված դասընթացներ, պատրաստել և սերտիֆիկացնել ճանապարհային անվտանգության աուդիտորների, իրականացնել այլ միջոցառումներ։ Բացի այդ, կվերանայվեն և կարդիականացվեն ճանապարհների նախագծման՝ Հայաստանում գործող ստանդարտները՝ դրանք ճանապարհային անվտանգության առումով Եվրոպական միության և միջազգային լավագույն փորձին համապատասխանեցնելու նպատակով։ Դրամաշնորհի շրջանակներում իրականացվելիք աշխատանքները նախատեսված է ավարտել 1,5 տարվա ընթացքում՝ 2020 թվականի վերջին։