Ոստիկանի սպանության համար կասկածվողները հայտնաբերվել եւ բերման են ենթարկվել

Արմինֆո. Ոստիկանի սպանության մեջ կասկածվողները հայտնաբերվել եւ բերման են ենթարկվել: Այդ մասին հայտնել է ՀՀ ոստիկանության հասարակայնության հետ կապերի վարչության պետ Աշոտ Ահարոնյանն իր էջում, հավելելով, որ ավելի մանրամասն տեղեկատվություն կտրամադրվի ավելի ուշ։

Ոստիկանության հաղորդման համաձայն, հոկտեմբերի 16-ին, ժամը 04:30-ի սահմաններում, Ոստիկանության Արաբկիրի բաժնի ծառայողները "Հաղթանակ" զբոսայգու մոտ գիշերային հերթապահության ժամանակ նկատել են երկու անձի, որոնք, տեսնելով ոստիկանական մեքենան, փախուստի են դիմել: Ոստիկանության ծառայողներն Ազատության պողոտայում փորձել են բերման ենթարկել փախուստի դիմած անձանց, սակայն նրանցից մեկին հաջողվել է ոստիկանից խլել նրա տաբելային զենքն ու կրակել ոստիկաններից մեկին և հարվածել մյուսին: Դրանից հետո նրանք հեռացել են դեպքի վայրից: Միջադեպի հետեւանքով 38-ամյա ոստիկան Տիգրան Առաքելյանը մահացել է: 

Դեպքի առթիվ հարուցվել է քրեական գործ ՝ ՀՀ քրեական օրենսգրքի 238-րդ հոդվածի 1-ին մասի, 316-րդ հոդվածի 2-րդ մասի և 104-րդ հոդվածի 2-րդ մասի 2-րդ կետի հատկանիշներով: