ՎՏԲ-Հայաստան Բանկը, համագործակցելով  “Armenian Assembly” ՀԿ հետ, բազմարժութային վիրտուալ քարտեր կգործարկի զբոսաշրջիկների համար

Արմինֆո.  ՎՏԲ-Հայաստան Բանկի և Armenian Assembly հասարակական կազմակերպության միջև ստորագրվել է համատեղ նախագծի մեկնարկի մասին համաձայնագիր, որով ազդարարվել է Armenia Guide հավելվածում ՎՏԲ-Հայաստան բանկի վիրտուալ զբոսաշրջային քարտի ներդրման համատեղ աշխատանքների սկիզբը։ Ինչպես ԱրմԻնֆո-ին հաղորդեցին բանկի մամուլի ծառայությունից,  վիրտուալ բազմարժութային զբոսաշրջային  քարտը Armenia Guide հավելվածում հասանելի կդառնա արդեն 2020 թվականին:

Նշենք, որ գործարար և մշակութային նախաձեռնությունների աջակցության Armenian Assembly հասարակական կազմակերպության այս նախագիծը ՎՏԲ-Հայաստան Բանկի կողմից 2019 թվականի օգոստոսի 1-ին և 2-ին ներկայացվել էր Բելոռուսի Մինսկ քաղաքում կայացած «ՎՏԲ Խմբի մանրածախ բիզնեսին նվիրված Visa-2019 նորարարական ֆորումի» շրջանակներում կազմակերպված մրցույթին և զբաղեցրել էր առաջին տեղը՝ որպես լավագույն նորարարական ստարտափ նախագիծ:

Armenia Guide հավելվածի հիմքի վրա մշակված «Հայաստանի վիրտուալ զբոսաշրջային քարտ» նախագիծը Visa վճարահաշվարկային համակարգի կողմից ճանաչվել է լավագույնը` ԱՊՀ երկրների և Վրաստանի մանրածախ բիզնեսի զարգացման և թվայնացմանն ուղղված, ինչպես նաև Visa միջազգային վճարային համակարգում նորարարական լուծումներ առաջարկող նախաձեռնությունների միջև: 

Ինչպես նշել է ՎՏԲ-Հայաստան Բանկի Գլխավոր տնօրեն-Տնօրինության նախագահ Իվան Տելեգինը, ՎՏԲ-Հայաստան Բանկը միշտ աջակցում է հետաքրքիր գաղափարներին և առաջարկություններին, առավել ևս, երբ հարցը վերաբերում է ստարտափերին` նորաստեղծ բիզնեսի զարգացմանն աջակցելը՝ մեր առաջնահերթություններից է:  Armenia Guide հավելվածում մեր վիրտուալ տուրիստական քարտերի միջոցով զբոսաշրջիկները կարող են հեշտությամբ կատարել դրամական փոխանցումներ արտերկրից և միաժամանակ օգտվել վիրտուալ քարտի 4 հաշիվներից: Այս նախագիծը միտված է Հայաստանի ինչպես ներքին, այնպես էլ արտաքին տուրիզմի շուկայի ծավալի ավելացմանը և ծառայությունների ամբողջական ցանկի մատուցման արդյունքում տուրիստական ծառայությունների դիվերսիֆիկացմանը:

Armenian Assembly հասարակական կազմակերպության հանրային խորհուրդի բարձրագույն մարմնի նախագահ Վահե Ենգիբարյանն, իր հերթին, պատմել է. «Մենք վստահ ենք, որ այս նախաձեռնությունը Հայաստանի բնակիչներին և հյուրերին հնարավորություն կընձեռի առանց խոչընդոտների ճանաչել մեր երկիրը։ Վիրտուալ քարտի շնորհիվ հաճախորդներն արագ և առանց խնդիրների գրեթե մի քանի գործողությամբ կկարողանան ամրագրել թատրոնի և տարբեր միջոցառումների տոմսեր, անցկացնել լավ ժամանակ և ունենալ ավելի շատ լավ հիշողություններ»:

Արդեն 2020  թվականից Հայաստանի զբոսաշրջիկներին և բնակիչներին հասանելի կլինի Հայաստանի վիրտուալ զբոսաշրջային բազմարժույթային քարտը, որը կընդլայնի երկրով ճանապարհորդելու հնարավորությունները։ Վիրտուալ քարտը հնարավորություն կտա Հայաստանի հյուրերին և բնակիչներին հենց հավելվածի միջոցով վճարել ծառայությունների և պրոդուկտների (կինոյի տոմս, հյուրանոցի ամրագրում, ռեստորաններ, շրջագայություններ և այլն) համար, անմիջապես ձևակերպել վիրտուալ քարտեր՝ անցնելով նույնականացում` հավելվածից կատարվող վիդեո զանգի միջոցով, ստանալ հնարավորություն մուտք գործելու վիրտուալ քարտի միանգամից չորս հաշիվներ (AMD, USD, EUR, RUR), զբոսաշրջության նպատակով արտասահմանից փոխանցումներ կատարել վիրտուալ քարտի հաշվին և վիրտուալ քարտով տարբեր ծառայությունների համար վճարելիս՝ ստանալ արտարժույթի փոխարկման  արտոյալ պայմաններ։ Իրականացված գործարքների համար օգտատերերը կարող են նաև կուտակել բոնուսներ՝ հետագայում դրանք գործընկերային ապրանքների և ծառայությունների փոխանակման հնարավորությամբ:  

Բջջային հավելվածի պաշտոնական մեկնարկը տրվել է Armenian Summit of Minds գագաթնաժողովի շրջանակներում՝ 2019 թ.-ի հունիսին: Հավելվածը զբոսաշրջիկներին և տեղացիներին ներկայացնում է երկրի ամենասպասված միջոցառումները, հետաքրքիր երթուղիները և գլխավոր տեսարժան վայրերը: Armenia Guide-ը կարելի է ներբեռնել AppStore-ում (https://apps.apple.com/us/app/armenia-guide/id1412624238) և Google Play-ում (https://play.google.com/store/apps/details?id=ru.moscowseasons.armonia&hl=ru):