Հայաստանի հասարակայնությունը մտահոգված է Ամուլսարի հանքավայրում ուրանի պաշարների առկայության հնարավորությամբ

Արմինֆո. "Ջերմուկը պետք է մնա առողջարանային քաղաք", - հայտարարել Է Ջերմուկ քաղաքի մի բնակչուհի, որի դուռը թակել է ՀՀ վարչապետ Նիկոլ Փաշինյանը և հետաքրքրվել Ամուլսարի հանքավայրի շահագործման վերաբերյալ նրա կարծիքներով:

Պատասխանելով վարչապետի ճշգրտող հարցին, թե՝ արդյոք իր կարծիքը չի փոխի, եթե ապացուցվի, որ ծրագիրը միանգամայն անվտանգ է, Ջերմուկի բնակչուհին հայտարարել է. "Չեմ կարծում, որ առողջարանային քաղաքի անմիջական հարեւանությամբ կարելի է շահագործել հանքը: Ես չեմ կարծում, որ այդ հանքը կարող է շահագործվել: Նման կարծիք ունի քաղաքի ողջ բնակչությունը"։ Արդեն երբ վարչապետը շենքից դուրս է եկել, քաղաքի բնակիչները նրան դիմավորել են՝ վանկարկելով "Ամուլսարն առանց հանքի"։

Նշենք, որ Ամուլսարի ոսկու հանքավայրը Ջերմուկից 10 կմ հեռավորության վրա է գտնվում։ Այն բանից հետո, երբ Փաշինյանը օգոստոսի 19-ին ֆեյսբուքյան ուղիղ եթերի ընթացքում  "կանաչ լույս վառեց" ծրագրի համար, հայտարարելով, թե միջազգային փորձաքննության տվյալներով, Ամուլսարը չի վնասում Սեւանին եւ շրջակա միջավայրին, Ամուլսարի մերձակա շրջանների եւ Ջերմուկի բնակիչները հայտարարել են, որոր դուրս կգան անժամկետ բողոքի ակցիաների, բայց թույլ չեն տա շարունակել հանքի շահագործումը:

Նշենք, որ ավելի վաղ վարչապետը Ֆեյսբուքի իր էջում ուղիղ եթերի ժամանակ հայտարարել էր, որ ՀՀ կառավարությունը մշտական մոնիտորինգ է անցկացնելու հանքավայրի շահագործման ժամանակ: Նա հերթական անգամ հավաստիացրել էր, որ եթե հանկարծ բացահայտվեն փաստեր, որոնք կասկածի տակ կդնեն հանքավայրի շահագործման նպատակահարմարությունը, ապա իշխանությունները կվերադառնան խնդրին, քանի որ ոչ մի բանով կաշկանդված չեն:

Օգոստոսի 14-ին ՀՀ Քննչական կոմիտեն ներկայացրել էր Ամուլսարի նախագծի վերաբերյալ Earthlink&Advanced Resources Development (ELARD) խորհրդատվական ընկերության փորձաքննության եզրակացությունը, որի հիման վրա կարծիք է էր հայտնել, թե բացակայում է ուղիղ կապը Ամուլսարի նախագծի տարածքում գտնվող ստորգետնյա ջրերի և Ջերմուկի ջերմային տաք աղբյուրների միջև,  բացակայում է նաեւ կապը Սեւանի ավազանի ջրերի հետ։

Սակայն, բացի ջրային ավազանից, հանրության շրջանում մտահոգություն է առաջացնում նաեւ հանքավայրում ուրանի պաշարների հնարավոր առկայությունը: Այսպես, հայտնի գիտնական, երկրաբանական գիտությունների դոկտոր Պետրոս Գևորգի Ալոյանն իր "Ուրանի պարունակությունը Հայաստանի երկրաբանական ֆորմացիաներում" աշխատությունում նշել է, որ Ամուլսարի ուրանաին դրսևորումը գտնվում է Կեչուտ գյուղից 4 կմ դեպի հարավ-արևելք և համանուն լեռան գագաթից 5 կմ դեպի հյուսիս-արևմուտք:

Ամուլսարի դրսևորման հինգ տեղամասերում հաշվարկվել է մոտավորապես 76 տոննա ուրան, իսկ, հաշվի առնելով թորիումի տեղամասում ուրանի առկայությունը,  ընդհանուր պաշարները կարող են գնահատվել 100 տոննա:  Ավելին, մեկ այլ գիտնական, պրոֆեսոր Գ. Ս. Ավագյանի ուսումնասիրությունների համաձայն, Ամուլսարի հանքաքարի 40 նմուշների տվյալներով այնտեղ կա 195 տոննա ուրան և թորիում: Մինչդեռ, ուրանի հանքավայրերի մշակման համար անհրաժեշտ է կառավարության հատուկ թույլտվություն, որը "Լիդիան" ընկերությունը չունի։

Ընկերության տեղեկությունների համաձայն,  հանքավայրը պարունակում է շուրջ 73733 կգ ոսկի ՝ 1 տոննայում 0.78 գրամ միջին պարունակությամբ, ինչպես նաեւ 294.367 տոննա

արծաթ՝ մեկ տոննայում 9.29 գ միջին պարունակությամբ։  Ընդ որում, բուն ուրանի մասին՝ ոչ մի խոսք։

ՙԼիդիան Արմենիան՚ բրիտանական Lydian International-ի դուստր ընկերությունն է: Ամուլսարի նախագծի ընդհանուր արժեքը կազմում է 370 մլն դոլար: Հանքավայրի շահագործման ժամկետը կկազմի 10 տարի եւ 4 ամիս, ընդ որում, տարեկան կտրվածքով նախատեսվում է արդյունահանել միջինը 200 հազար ունցիա ոսկի: