Արմինֆո. Հայաստանի կառավարությունը Ամուլսարի հանքավայրի շահագործման ժամանակ մշտական մոնիթորինգ է անցկացնելու։ Այդ մասին օգոստոսի 19-ին ֆեյսբուքյան ուղիղ եթերում հայտարարել է ՀՀ վարչապետ Նիկոլ Փաշինյանը։
"Եթե մոնիտորինգի ժամանակ հանկարծ արձանագրենք, որ Լիդիան-Արմենիա ընկերությունը չի պահպանում մեր կողմից առաջադրված պայմանները, ապա մենք նրանց 90 օր կտանք բացթողումների վերացման համար, կամ էլ հանքավայրը կփակվի։ Այսինքն ՝ կառավարությունն ունի բոլոր գործիքները այդ գործընթացը կառավարելու համար", - ասել է նա, հավելելով, որ ներկա պայմաններում հանքավայրը շահագործվելու է աննախադեպ բարձր բնապահպանական չափանիշներով։
Ընդ որում, վարչապետն արձանագրել է, որ դա կառավարությանը հնարավորություն կտա փուլ առ փուլ ստիպել մյուս ընկերություններին նման կարգի բարձրացնել շահագործման իրենց չափանիշները ։ Նրա խոսքով ՝ ՀՀ կառավարությունը ստիպված է լինելու տասնյակ միլիոնավոր դոլարներ ծախսել հանքերի շահագործման որակը բարձրացնելու համար։ Փաշինյանը նաեւ ընդգծել է, որ Հայաստանում հանքարդյունաբերությունը պետք է աշխատի ամենաբարձր չափանիշներով: Միաժամանակ, ըստ նրա, եւս մեկ կարեւոր հարց է Ջերմուկի ապագան որպես առողջարան: Վարչապետը հիշեցրել է, որ այս հարցում անկյունաքարը հանքային աղբյուրներն են, և դրանք վտանգված չեն։ Նա վստահեցրել է, որ աշխարհում զբոսաշրջային բնույթի բազմաթիվ քաղաքներ կան, որոնցից ոչ հեռու հանքեր են գործում, սակայն դա ոչ մի կերպ չի ազդում այդ ուղղությունների ժողովրդականության վրա: Որպես վառ օրինակ նա նշել է ամերիկյան Սոլթ Լեյք Սիթի քաղաքը։
Կառավարության ղեկավարը նաև արձանագրել է, որ հանքավայրի վերաբերյալ եզրակացություն պատրաստած ԷԼԱՐԴ ընկերությունը, որում Լիդիան Արմենիա-ի համար տրվել է 16 հանձնարարական, որոնցից 10-ն արդեն ընդգրկվել են արդյունահանող ընկերության նախագծում, ևս 6-ը պատրաստ է նաև մտցնել նախագծում: Ընդ որում, նա նշել է նաեւ, որ շատ առաջարկություններ նախատեսված են հանքավայրի փակումից հետո իրացման համար, իսկ դա արդեն բոլորովին այլ գործընթաց է:
Նա հերթական անգամ հավաստիացրել է, որ եթե այս օրերին հանկարծ ի հայտ գան փաստեր, որոնք կասկածի տակ կդնեն հանքի շահագործման նպատակահարմարությունը, ապա կառավարությունը պատրաստ կլինի այն դիտարկել, քանի որ ոչ մի բանով կաշկանդված չէ: "Կցանկանայի անդրադառնալ կարևոր մի նրբերանգի։ Այսօր դուք գիտեք, որ մենք հանդիպումներ ենք ունեցել հարակից համայնքների բնակիչների, ակտիվիստների հետ։ Բոլոր նշված փաստերը ներկայացվել էինմ մեկ տարի առաջ։ Եվ քրեական գործը տվել է այդ բոլոր փաստերի պատասխանները։ Եվ այսօր բնակիչների կողմից հանդիպման ժամանակ ընթերցված տեքստերը մեկ տարվա վաղեմության են", - ասել է Փաշինյանը, հերթական անգամ հավաստիացնելով, որ եթե հանկարծ ինչ-որ սպառնալիքներ ի հայտ գան, ապա հանքն անմիջապես կփակվի, քանի որ իրենք ոչնչով կաշկանդված չեն, քանի որ այդքան էլ հեշտ չէ ճնշում գործադրել ժողովրդի վստահությունը վայելող լեգիտիմ իշխանությունների վրա:
Ամփոփելով՝ վարչապետն ասել է, որ մեկ տարի առաջ կառավարությունը երեք պայման էր դրել. պարզել, թե արդյոք Ամուլսարը կվնասի Սեւանին, Ջերմուկին եւ, ընդհանրապես, ջրային համակարգին։ Եվ հրապարակավ հայտարարում էին, որ եթե քննարկումների արդյունքում պարզվի, որ վնասում է, ապա հանքավայրը կփակվի ՝ անկախ մի շարք պետությունների արձագանքից։ “Իսկ եթե պարզվի, որ չի վնասում, ապա այն կշարունակի գործել։ Եվ այսօր, մեր հստակ տվյալներով, Ամուլսարը չի վնասում Սեւանին։ Այն կաշխատի բնապահպանական ամենաբարձր չափանիշներով։ Եթե մենք չկատարենք մեր դրած պայմանները, մեզ անլուրջ կընդունեն։ Ես 99.9% վստահ եմ, որ հանքավայրը վտանգ չի ներկայացնում ՀՀ բնապահպանության համար: Հետևաբար, մենք պետք է կատարենք այն պայմանները, որոնք մենք դրել ենք", - հայտարարել է Նիկոլ Փաշինյանը՝ տարակուսանք հայտնելով քաղաքացիների կազմակերպած անհնազանդության գործողությունների առնչությամբ։