Արմինֆո. "Մենք ամեն տարի հավաքվում ենք Օշականի հերոսների հուշարձանի մոտ, որպեսզի հարգենք ռուս սպաների եւ զինվորների սխրանքը՝ գեներալ Կրասովսկու գլխավորությամբ, ինչպես նաեւ Հայաստանի ազատության համար պայքարում իրենց կյանքը զոհաբերած հայ աշխհազորայիններին, որոնք պաշտպանել են գլխավոր Սրբավայրը՝ Մայր Աթոռ Սուրբ Էջմիածինը":
Այս մասին օգոստոսի 17-ին Օշականի ճակատամարտի 192-ամյակին նվիրված միջոցառման ժամանակ հայտարարել է Հայաստանում Ռուսաստանի դեսպանության գործերի ժամանակավոր հավատարմատար Ալեքսեյ Սինեգուբովը։ Նրա համոզմամբ, Օշականի ճակատամարտը ոչ միայն դարձավ 1827-1828 թթ. Ռուս-Պարսկական պատերազմի կարևորագույն ճակատամարտերից մեկը, այլև հերթական անգամ հաստատեց մեր երկու ժողովուրդների խորը, անխախտ կապը, արտաքին սպառնալիքին համատեղ դիմակայելու, ընդհանուր արժեքների համար զոհվելու կարողությունը դարերում փառաբանելով ռուսահայերին բնորոշ արիությունը, տոկունությունը և հերոսությունը", - նշել է ռուսական դեսպանության գործերի ժամանակավոր հավատարմատարը:
Արմավիրի փոխմարզպետ Կարեն Գրիգորյանը, իր հերթին, հիշեցրել է Հայաստանի եւ Ռուսաստանի միջեւ բազմադարյա հարաբերությունների մասին: "Մենք բարձր ենք գնահատում Հայաստանի և Ռուսաստանի միջև բարեկամությունը, որ ժամանակի փորձություն է անցել։ Եւ Օշականի ճակատամարտը երկու ժողովուրդների բարեկամության վառ օրինակներից մեկն է", - ասել է Գրիգորյանը:
Հայաստանում ՌԴ դեսպանատան ռազմական և ռազմաօդային կցորդ, գնդապետ Անդրեյ Գրիշչուկն էլ հիշեցրել է, որ 1827 թվականի օգոստոսի 17-ին, տեղի ունեցավ ռուս-պարսկական պատերազմի ամենաարյունալի իրադարձությունը: "Այդ հարթավայրում ողբերգական իրադարձություններ էին զարգանում, թվում էր ՝ ամեն ինչ դեմ էր գեներալ-լեյտենանտ Կրասովսկու ռուսական էքսպեդիցիոն ջոկատին և դրա կազմում ընդգրկված աշխարհազորայիններին, այդ թվում՝ հայերին։ Եվ հակառակորդի տասնապատիկ գերազանցությունը, և անբարենպաստ պայմանները, որոնցում ստիպված էին գրոհել՝ պաշարված Էջմիածնին հասնելու համար։ Բայց նրանք լի էին հավատով, նրանց հետ էին Աստված և ճշմարտությունը, ուստի նրանք կատարեցին են իրենց պարտքը և, ի վերջո, հաղթեցին", - ասել է Գուշչինը, հավելելով, որ ի հիշատակ այդ իրադարձությունների այստեղ Եփրեմ Առաջին կաթողիկոսի և Ներսես արքեպիսկոպոս Աշտարակեցու նախաձեռնությամբ կանգնեցվել է կոթողը, որը խորհրդանշում է միասնականությունը և նպատակասլացությունը", - ասել է ռազմական կցորդը:
Միջոցառմանը ներկա էին հայ և ռուս հասարակայնության, ՌԴ և ՀՀ պաշտպանության նախարարությունների, Հայ առաքելական եկեղեցու և Ռուս ուղղափառ եկեղեցու հոգևոր դասի ներկայացուցիչներ: Միջոցառումը սկսվել է մեկ րոպե լռությամբ՝ ի հիշատակ զոհվածների, այնուհետև հնչել են Հայաստանի և Ռուսաստանի օրհներգերը։ Հայ և ռուս զինվորականների մասնակցությամբ կազմակերպվել է պատվո պահակախումբ։
1827 թվականի օգոստոսի 17-ին Օշական գյուղի մոտակայքում 30-հազարանոց պարսկական բանակի և 3-հազարանոց ռուսական ջոկատի միջև ճակատամարտում ռուս զինվորները և հայ աշխարհազորայինները, որոնց գլխավորում էր կաթողիկոս Ներսես Աշտարակեցին, կարողացան հետ մղել թշնամու գրոհները և հասել Էջմիածին։