Արմինֆո. Ադրբեջանի համեմատ Հայաստանին ռազմական կարիքների համար ամերիկյան օգնության ոչ մեծ ծավալները պայմանավորված են ՀԱՊԿ հավաքական անվտանգության համակարգին հանրապետության անդամակցությամբ։ ԱրմԻնֆո-ին այդպիսի կարծիք է հայտնել վերլուծաբան, Ադրբեջանի խորհրդարանի պատգամավոր Ռասիմ Մուսաբեկովը։
<Այսպիսով՝ պատճառները բավականին օբյեկտիվ են, քանի որ Իրանի և Թուրքիայի հետ Հայաստանի սահմանները գտնվում են ռուսական սահմանապահ զորքերի պաշտպանության ներքո ՝ համապատասխան պայմանագրերի հիման վրա ։ Իսկ Հայաստանի ռազմական համագործակցությունը ԱՄՆ - ի հետ հիմնականում սահմանափակված է հումանիտար ուղղություններով>, - նշել է նա ։
Հիշեցնենք, որ 2018-2019 թվականներին ԱՄՆ վարչակազմը Ադրբեջանին հատկացվող ֆինանսական օգնությունը հասցրել է 101,5 մլն դոլարի, մինչդեռ 2016-2017 թվականներին այդ գումարը կազմել է 3 մլն դոլար: Զուգահեռաբար տեղի է ունեցել Ադրբեջանի սահմանապահ ծառայության բյուջեի աճը 2018 թ. 90 մլն դոլարից մինչև 2019 թ. 116 մլն դոլար: Ընդ որում, ԱՄՆ-ի կողմից Հայաստանին տրամադրվող ֆինանսական աջակցությունը կազմել է 4,2 մլն դոլար 2018 թվականին, 2,8 մլն դոլար 2019 թվականին, եւս 2,1 մլն դոլար նախատեսված է 2020 թվականին: Այս տվյալները առիթ են հանդիսացել հայ-ամերիկյան համագործակցության ոչ բավարար մակարդակի շուրջ քաղաքական մանիպուլյացիաների համար։
Մինչդեռ, Մուսաբեկովի խոսքով, Ադրբեջանին, ինչպես եւ Ղազախստանին, ամերիկյան ֆինանսները հատկացվում են CaspianGuard կոնկրետ նախագծի շրջանակներում: Վերջինս նպատակ ունի աջակցել սահմանների անվտանգության բարձրացմանը, կանխել ահաբեկչական սպառնալիքները, թմրանյութերի շրջանառությունը, այլ անդրազգային սպառնալիքների տարածումը:
Ըստ Մուսաբեկովի, կասպիական էներգետիկ նախագծերում մեծ ներդրումներ կատարած ԱՄՆ-ն ձգտում է բարձրացնել Բաքվի և Աստանայի՝ իրենց անվտանգության ապահովման հնարավորությունները: Մասնավորապես՝ նախագծի շրջանակներում ԱՄՆ-ն Ադրբեջանին օգնել է սահմանապահների պատրաստման, հարավային եւ հյուսիսային սահմաններում սենսորների եւ ռադարների տեղադրման հարցում, ինչպես նաեւ տրամադրել է ռադիոակտիվ կամ արգելված քիմիական նյութերի հայտնաբերման սարքերով նավը:
CaspianGuard-ը, վերլուծաբանի գնահատմամբ, առաջին հերթին ԱՄՆ-ի համար կարեւոր էներգետիկ նախագծերի պաշտպանության և իրեն հետաքրքրող երկրների տարածքով Ռուսաստանից Իրան եւ հակառակ ուղղությամբ կասկածելի բեռների անցումը կանխելու նպատակ է հետապնդում:
<Ամերիկյան օգնության հասցեատերը ոչ թե պաշտպանության նախարարությունն է, այլ՝ Ադրբեջանի սահմանապահ ծառայությունը, ինչը պայմանավորված է Ադրբեջանի ցամաքային, օդային և ծովային սահմանների անվտանգության ապահովմամբ։ Այս առումով ԱՄՆ - ի ֆինանսական աջակցությունն Ադրբեջանին ոչ մի ընդհանուր բան չունի ղարաբաղյան հակամարտության շուրջ բանակցությունների եւ, առավել եւս, տարածաշրջանում ռազմական գործողությունների վերսկսման հետ>, - ամփոփել է Մուսաբեկովը: