Արմինֆո.Ամեն տարի հունիսի 1-ին Գաֆէսճեան արվեստի կենտրոնը (ԳԱԿ) նշում է Երեխաների պաշտպանության միջազգային օրը` այցելուներին ներկայացնելով հետաքրքիր միջոցառումների ծրագիր:
Այս տարի Կենտրոնն առանձնահատուկ շուքով է նշելու Հունիսի 1-ը, քանի որ 2019 թ.-ին լրանում է Կենտրոնի հիմնադրման տասնամյակը: Այս կապակցությամբ 2019 թ.-ին իրենց տասնամյակը նշող ավելի քան 200 դպրոցականներ փուչիկների օգնությամբ կպատկերեն ԳԱԿ 10-ամյակի պատկերանշանը: Բացի այդ, «Քո դրոշակը» ստեղծագործական ծրագրի շրջանակում երեխաները կպատրաստեն ԳԱԿ արվեստանմուշները պատկերող դրոշակներ:
Այցելուներին նաև հնարավորություն կընձեռվի մասնակցել «Ստեղծիր քո շրջայցը» նոր կրթական ծրագրին՝ ուսումնասիրելով Կենտրոնում ցուցադրված արվեստանմուշները և միաժամանակ կատարելով մի շարք ինտերակտիվ առաջադրանքներ:
Բոլոր այցելուները հնարավորություն կունենան լուսանկարվել խայտաբղետ կառնավալային կերպարներում, որոնք պատրաստվել են 2016 թ.-ին ԳԱԿ-ում Ռոբերտ Էլիբեկյանի «Արտացոլումներ» ցուցադրության հիման վրա՝ «Գարնանային կառնավալ» կրթական ծրագրի շրջանակում:
Ի լրումն, Գաֆէսճեան քանդակների պարտեզում տեղի կունենա բացօթյա համերգ Հայաստանի ամենահայտնի երիտասարդական էթնիկ ռոք խմբերից մեկի՝ ԹմբաԹա նվագախմբի կատարմամբ: Համերգից անմիջապես հետո այս տարի իրենց տասնամյակը նշող երեխաները լապտերների օգնությամբ կստեղծեն ԳԱԿ 10-ամյակի պատկերանշանը:
Բացի այդ, այցելուները հնարավորություն կունենան 10% զեղչով ձեռք բերել Թանգարանի խանութի նշված տեսականին, իսկ ԳԱԿ անդամների համար կգործի 20% զեղչ:
Տոնական միջոցառումները կեզրափակվեն ճոխ հրավառությամբ:
«Քո դրոշակը» ծրագիրը և ԹմբաԹա նվագախմբի համերգն իրականացվում են Beeline-ի հովանավորությամբ: Beeline-ը և Գաֆէսճեան արվեստի կենտրոնը համագործակցում են 2011թ.-ից: Երկարաժամկետ համագործակցության շրջանակում Կենտրոնում պարբերաբար անցկացվում են տարաբնույթ կրթական ծրագրեր:
ԳԱԿ-ի հունիսմեկյան միջոցառումների ծրագրի ժամանակացույցը ներկայացված է ստորև.
Միջոցառումների ժամանակացույց
ՀՀ
Միջոցառման անվանում
Ժամ և վայր
1.
Հայտնվիր կառնավալում 10:00-18:00
Գաֆէսճեան քանդակների պարտեզ
2.
ԳԱԿ 10-ամյակի պատկերանշանի ստեղծում փուչիկներով 11:00-11:30
Խանջյան հարթակ
3.
«Քո դրոշակը» ստեղծագործական ծրագիր 14:00-15:00
Գաֆէսճեան քանդակների պարտեզ
4
«Ստեղծիր քո շրջայցը» ճանաչողական-ժամանցային առցանց հարթակ 16:00-18:00
Պատկերասրահ Մեկ
https://www.cmf.am/Create-Your-Journey
5.
ԹմբաԹա նվագախմբի համերգ 19:30-21:30
Գաֆէսճեան քանդակների պարտեզ
6.
ԳԱԿ 10-ամյակի պատկերանշանի ստեղծում լապտերներով 21:30-21:45
Խանջյան հարթակ
7
Հրավառություն 22:00
Աստղազարդ երկինք