Հայաստանի նախագահը հայ-ռուսական հարաբերությունները հաստատուն մեծություն է համարում

Արմինֆո.Հայաստանի նախագահ Արմեն Սարգսյանը հայ-ռուսական հարաբերությունները գնահատում է որպես կոնստանտ։

ՙԶվեզդա՚ հեռուստաալիքով հեռարձակված հարցազրույցում խոսելով հայ-ռուսական հարաբերությունների մասին՝ նա, մասնավորապես, ասել է, թե դրանք հաստատուն են, երբեք չեն փոխվում, ՙքանի որ մենք պատմականորեն եղբայրներ եւ բարեկամներ ենք ըստ զենքի, ճակատագրի, կրոնի՚: ՙԵս դրանք գնահատում եմ որպես մշտական մեծություն, որը ժամանակի ընթացքում չի կարող փոխվել։ Դա մեր ողջ մշակույթի, պատմության, փիլիսոփայության, անցյալի, ներկայի ու ապագայի մասն է՚, - ասել է Արմեն Սարգսյանը։

Պատասխանելով ռուսական բիզնեսի ՝ Հայաստանում ներդրումներ կատարելու պատրաստակամության մասին հարցին՝ Սարգսյանը հավաստիացրել է, թե ինքը չէ, որ պետք է հայտնի ռուսական բիզնեսի կարծիքը։ Նա փաստել է, որ ռուսական բիզնեսը աշխատում է Հայաստանում շատ տարիներ։ ՙՆերդրումներ կան տարբեր երկրներից, ներդրումներ կան թե Եվրոպայից, թե Հեռավոր Արևելքից, թե Մերձավոր Արևելքից, թե Ամերիկայից։  Բայց ռուսական բիզնեսը միշտ գոյություն է ունեցել, և ինչ-որ առումով մենք շատ հաճախ չենք նկատել այդ ներդրումները, կարծես, դրանք ներքին են։  Առավել ևս, Հայաստանում ներդրումներ են կատարել ոչ միայն զուտ ռուսական ընկերությունները, այլև ռուսական ընկերությունները, որտեղ ազգությամբ հայեր են մասնակցում։  Այդ ներդրումները շատ մեծ են, ես կարծում եմ, որ ապագայում էլ դրանք քիչ չեն լինի՚, -

նշել է Հայաստանի նախագահը։

Անդրադառնալով առաջիկայում Մոսկվա կատարելիք այցին՝ Սարգսյանը նշել է, որ մոտ ժամանակներս չի նախատեսում պաշտոնական այցով մեկնել Ռուսաստանի մայրաքաղաք՝ թեեւ հաճախ է լինում այնտեղ։

Նշենք, որ Ռուսաստանն առաջատար դիրք է զբաղեցնում ինչպես արտաքին առևտրաշրջանառության վիճակագրության, այնպես էլ Հայաստանում ընդհանուր և ուղղակի ներդրումների մեջ։ Այսպես, ըստ Ազգային վիճակագրական հանձնաժողովի տվյալների, Հայաստանի եւ Ռուսաստանի միջեւ  առեւտրաշրջանառությունը 2018 թվականին կազմել է 1.9 մլրդ դոլար՝ 11.2% տարեկան աճով: Ընդ որում, արտահանումը կազմել է 666.5 մլն դոլար՝ 19.6% աճով, իսկ ներմուծումը՝ 1.3 մլրդ դոլար՝ տարեկան 7.2% աճով։ Նույն հանձնաժողովի տվյալների համաձայն ՝ 2018 թվականին ՀՀ տնտեսության մեջ ընդհանուր ռուսական ներդրումները կազմել են 970 մլն դոլար՝ 23.5% տարեկան աճով, ընդ որում՝ ՈւՕՆ կազմել են 417.8 մլն դոլար՝ 31.7% տարեկան աճով։