Հայաստանի վարչապետի ու կառավարության դեմ սոցիալական ցանցերում համակարգված արշավ է իրականացվում. Atlantic Council-ը ռուսական հետք է տեսնում

Արմինֆո.Հայաստանի վարչապետի ու կառավարության դեմ սոցիալական ցանցերում համակարգված արշավ է իրականացվում, որի հետքերը տանում են դեպի Ռուսաստան: Ըստ ՙԱզատություն՚ ռադիոկայանի, այդ մասին պնդում է ամերիկյան հեղինակավոր վերլուծական կենտրոնը՝ Atlantic Council-ը:

Հրապարակած հետաքննությունում կազմակերպության Digital Forensic Research Lab-ի փորձագետները փաստում են, որ անցած մայիսին Հայաստանում տեղի ունեցած թավշյա հեղափոխությունը մի կողմից վերականգնել է հասարակության հավատը կառավարության հանդեպ, ճանապարհ հարթելով ժողովրդավարական փոփոխությունների համար, մյուս կողմից՝ համախմբել նրանց, որ դեմ էին քաղաքական փոփոխություններին:

Անցած ամիսներին, փաստում է հետաքննությունը, ընդդիմախոսներից մի քանիսը համախմբվել են #SutNikol հեշթեգի տակ, ու խճճված օնլայն արշավ սկսել, որի նպատակն է վարկաբեկել Նիկոլ Փաշինյանին ու նրա աջակիցներին՝ ապատեղեկատվություն ու կողմնակալ լրատվություն տարածելու միջոցով: Ըստ փորձագետների, այս խմբերը հասարակությանը մոլորեցնելու հատուկ մեթոդ են կիրառում. ներկայանում են իբրև անկողմնակալ ու փաստերի իսկությունը ստուգող կազմակերպություն՝ օգտատերերին վստահություն ներշնչելու և հետևորդներ հավաքելու համար, հետո միակողմանի ու հասարակությանը պառակտող հայտարարություններ տարածում քաղաքական զարգացումների վերաբերյալ:

«Այս գործողություններն անկեղծ չեն, և գնալով ավելի են ակտիվանում», - փաստում է փորձագիտական զեկույցը, մանրամասնելով՝ ապրիլի 15-ին հայկական օնլայն մեդիա տարածքում սկսեց շրջանառվել #SutNikol հեշթեգը: Ուսումնասիրելով սկզբնաղբյուրը՝ Atlantic Council-ի մասնագետները առանձնացրել են դրա հետ փոխկապակցված 4 անձանց, որոնք էլ հիմնականում պատասխանատու են բովանդակության և այն տարածելու համար՝ AntiFake.am-ի հիմնադիր Նարեկ Սամսոնյան, «Ադեկվադի» հիմնադիրներ՝ Արթուր Դանիելյան, Նարեկ Մալյան և Blognews-ի հիմնադիր Կոնստանտին Տեր-Նակալյան:

«Ադեկվադը» ներկայանում է որպես մշակութային կենտրոն, որն իբրև թե «ներկայացնում է այն, ինչի մասին լռում է Ազատությունը»: Էջը ստեղծվել է հեղափոխությունից հետո՝ անցած տարվա հունիսին, և տարածում է պատկառելի թվով տեսանյութեր՝ Արթուր Դանիելյանի մասնակցությամբ, որտեղ վերջինս իբրև թե ներկայացնում է Փաշինյանի կառավարության անօրինական քայլերը կամ կեղծ հայտարարությունները՝ դրանք համեմելով հակաամերիկյան հռետորաբանությամբ:  «Տեսանյութերից մեկում, օրինակ, Դանիելյանը մեղադրում է Փաշինյանին «ֆեյքերի բանակ» ունենալու մեջ, մյուսում՝ կասկածի տակ դնում բյուջեի վերաբերյալ վարչապետի ներկայացրած վիճակագրությունը, կամ, ասենք, վերջինիս քաղաքականությունը էներգետիկայի ոլորտում», - փաստում են փորձագետներն, ընդգծելով, որ պնդումները հիմնված են ոչ թե հիմնավոր փաստերի, այլ՝ համակիր լրատվամիջոցների հաղորդումների վրա:

Մյուս էջը՝ AntiFake.am-ը, պնդում է, թե «վերջին շրջանում Հայաստանում տեղի ունեցող իրադարձությունների առանցքը կազմում են կեղծ լրատվությունը, քարոզչությունը և մանիպուլյացիան։ Ըստ այդմ, կայքը հայտարարում է, թե իր նպատակն է բացահայտել չկատարված խոստումները, կեղծ լուրերը, մանիպուլյացիաները, պրոպագանդան, հրապարակել օդում կախված լուրերը և ստուգել դրանց հավաստիությունը»։

«Հակառակ անկախ ու չեզոք լինելու մասին պնդումներին՝ AntiFake.am-ի բովանդակությունը մեծապես կենտրոնացած է Փաշինյանին վարկաբեկելու վրա, փաստում են Atlantic Council-ի փորձագետները, մանրամասնելով.  «Էջի ամենաշատ քննարկված հոդվածներում հասարակությանը պառակտող քաղաքական մեկնաբանություններ են, չհիմնավորված հաղորդումներ, որոնք պնդում են, թե Փաշինյանն այցելել է գործարան, որը գոյություն չունի, կամ թե Փաշինյանն իրեն է վերագրում նախորդ կառավարության հաջողությունները»:

Ընդ որում, փորձագետները նկատել են մեկ այլ միտում՝ երկու էջերն էլ քաղաքական արշավից բացի կենտրոնանում են նաև պատվաստանյութերի դեմ պայքարի, մասնավորապես՝ «Գարդասիլի» վրա, ներկայացնելով ակնհայտ կեղծ լրատվություն դրա վերաբերյալ:

Արևմտյան մամուլում կարծիքներ են հնչում, որ պատվաստումների դեմ արշավը սկիզբ է առել և հովանավորվում է Ռուսաստանից: Սա, սակայն, դրսից միջամտության մասին վկայող միակ փաստը չէ: Atlantic Council-ի փորձագետները, պնդում են, թե հստակ ապացույցներ են գտել, որոնք վկայում են՝ առնվազն AntiFake.am-ը ամբողջությամբ Հայաստանից չի կառավարվում, դոմեյնի ուսումնասիրությունը ցույց է տալիս, որ էջի ինտերնետային հասցեն գրանցված է Ռուսաստանում՝ Սանկտ Պետերբուրգում: Ավելին, նշում են փորձագետները, whois.net֊ում այդ դոմեյնի գրանցման և դրա պատասխանատու անձի մասին տվյալները փակ են՝ «անձնական տվյալների գաղտնիության նկատառումներով»:  «Սա ենթադրում է, որ AntiFake.am կայքի պատասխանատուները քայլեր են ձեռնարկել, որպեսզի թաքցնեն իրենց ինքնությունը», - նշում են փորձագետները, ընդգծելով, թե գտել են ապացույցներ, որոնք վկայում են, որ AntiFake.am-ը կարող է կապված լինել Ռուսաստանում գրանցված անձանց կամ կազմակերպությունների հետ:

Հավելենք, որ Atlantic Council-ը (ՙԱտլանտյան խորհուրդ՚) միջազգային հարաբերությունների ոլորտում ամերիկյան ոչ կառավարական վերլուծական կենտրոն է, որը հիմնադրվել է 1961 թվականին՝ Երկրորդ համաշխարհային պատերազմից հետո  ԱՄՆ-ի եւ Եվրոպայի միջեւ համագործակցության պահպանման եւ ուժեղացման նպատակով: Գոյության առաջին տարիներին աշխատանքում շեշտը դրվել է տնտեսական հարցերի լուծման վրա, որոնք կապված են ԱՄՆ-ի եւ Եվրոպայի միջեւ առեւտրի զարգացման հետ: Հետագայում Atlantic Council-ը ընդլայնել է իր գործունեությունը Եվրոպայից և ԱՄՆ-ից դուրս։  Այսօր այն կառավարում է տարածաշրջանային 10 կենտրոններ և ֆունկցիոնալ ծրագրեր, որոնք զբաղվում են միջազգային անվտանգության և գլոբալ տնտեսական զարգացման հարցերով։  Ֆորում է հանդիսանում քաղաքական, գործարար և ինտելեկտուալ միջազգային առաջնորդների համար։  Կենտրոնն ունի կենտրոնակայան Վաշինգտոնում։